【武漢肺炎】做政府工真係人生贏家?

 

(photo via cc Flickr user Maxime Guilbot)

 

各行各業都擔心緊減人工,被逼放no pay leave的時候,政府工又宣佈加5.26%人工。每年訪問大學畢業生就業方向,做公務員肯定穩佔頭三,特別係非專科(乞食科),例如各大專院校的文學院和社科院的學生,更加係一車車咁去考。而家呢個年代中五學歷要求的ACO都有15K,大學畢業生可能都係得12、13K的時候,政府工穩定,年年加人工跳PT,準時收工,排隊升職,咁多種好處吸引大量人報考,其實筆者都明白,筆者都曾經是其一,但個個都考政府工,個個都真係想做政府工咩。

 

做住先低層再轉工?

近年好多一車車考做ACO的大學生多數都係抱住騎牛搵馬的心態,打算做住ACO先,跟住再慢慢考其他工做Officer。但到底有幾多個做ACO如願以償考到EO,ACO平日做的工作同EO的工作係兩個層次唔同的野黎,試諗下做左幾年ACO做Filing,訂文具,坐counter做reception呢類打雜咁的工作經驗真係可以幫到考EO咩,ACO的工作經驗對考Officer黎講基本上係完全無幫助,甚至可以話係負資產。另外,面試去到見board甚至會有老細見到你做過ACO,會覺得你份人頹,無大志,印象分都扣左。如果你做ACO做得唔好,甚至會俾老細寫花File,到時轉工就更加之難,做緊政府咁安穩又未必有心機跳返出去私人市場挨世界,到時只會終日係office覺得自己懷才不遇,鬱鬱不得志。所以筆者係到奉勸一句,如果真係想做officer就直接考officer,不要做政府低層。

 

升職慢甚至無得升

政府工起薪如果唔係professional grade大多數都係得萬幾兩萬多,頂薪往往有5萬左右對於一個fresh grad或者做左一兩年野的人黎講係幾吸引,但留意返5萬頂薪係要做十幾年先會拎到。政府工因為流失率低,職位數目唔會無端端大幅增加,你要升職只有等上級退休(或者死亡),或者你部門終於爭取到開多幾個位,往往你前面有大量年資比你多十年八年的同事等緊升職,唔少職系因為編制問題難以升職,所以唔少同事由入職到退休都係果個位。到時你就可以拎到恨左好耐的頂薪5萬退休(到時通漲應該唔止5萬),但你如果你係私人市場打滾,可能十年八載就有呢個數的人工。所以筆者認為政府工係俾平庸求安穩的人考,因為你未來的前途已經寫好曬係總薪級表,你呢世人就係搵到咁多。如果你覺得自己好smart可以係私人市場如魚得水,千祈唔好入政府

 

工作環境差

好多外行人會覺得公務員無野做,日日返工等收工,咁就真係大錯特錯。政府工真係服務市民,唔止好多前線要直接同市民打交道,後勤也需要接聽市民的電話和投訴,帶老母返工係基本要求,好多時市民的要求並不時一時三刻可以解決,因為要完成一隻csae需要經過多個同事幫手,甚至不同部門配合,以及大量admin工作,才可以完成,市民見幾個月都好似無做野就會投訴你。政府內部重有大量資深的同事,佢地夠年資拎頂薪又唔搏升,會實行養生式工作,任何file經佢地手進度又會拖慢。身為一個中層的officer,上級會捽數計你處理左幾多單case,既要管理下屬,又要面對市民,所以政府工都唔係坊間人諗到咁得閒。

呢篇文並非阻止大家考政府工,亦唔係鬥慘大會,只係想大家了解下實際上政府工係咪真係大家幻想到咁荀,薪高糧準,排隊升職,不用OT。只可以講政府工係一份好穩定的工作,論醫療褔利假期未必夠私人工好,如果大家係私人市場打滾左幾年,明白自己有幾多斤兩,再心甘情願咁入政府,咁就最好啦。如果你真係想服務市民,拼搏工作,即管考政府工啦,香港市民需要你。

 

作者:文文

18萬公務員之一

閱讀後覺得好,請多多讚好及分享~:)

其他熱門文章

歡迎讚好我們的facebook page,免費資訊源源送上。

文章資訊

ID: 204387
Date: 2020-03-03 00:32:49
Generated at: 2020-09-18 09:38:28
Permalink: https://www.vjmedia.com.hk/articles/2020/03/03/204387/【武漢肺炎】做政府工真係人生贏家?