其實點先算係鍾意一個人?

 

 

啲人成日話一見鍾情,邊有咁易呀,要遇到一個令你心跳加速嘅人其實真係幾難,就算遇到都好,可能都只係頭一兩次見面先會咁,之後好快就會平伏,咁講真一個人長期心跳加速都唔好啦,高血壓咩?平伏咗之後嘅感情反而會更加清楚,所以真係唔好太心急一齊,慢慢諗下自己到底係咪真係鍾意呢個人先,如果唔係就好易奶嘢。

至於點先算係鍾意一個人?其實我都唔係好清楚(嗱唔好打我),不過以下有幾點可以畀大家參考吓。首先,你會乜都想同佢講,就算係啲無聊低能嘢,當你工作上好大壓力或者遇到唔開心嘅事,你都會同想同佢講,因為你知道佢會靜靜哋聽你呻,雖然唔一定會幫你解決到個問題,但係女人要嘅從來都只係關心同理解,並唔係理性分析,甚至話錯嘅係你/你太緊張啫等等。

你會好注意佢嘅一舉一動,變到好容易呷醋,當你見到佢同其他異性嬉嬉哈哈,你就會莫名其妙咁怒火中燒,對佢單單打打,畀說話佢聽,但係佢問你做咩事,係咪唔開心,你又會話無事。

有時兩個人獨處嘅時候會有啲尷尬,可能會緊張得滯一片空白唔識對答,成個傻婆咁,又或者係自己一個人嘅時候會諗起佢講嘅低能嘢喺度傻笑,但係笑完你又會諗:「死喇,點解我會咁?係咪奶咗嘢?」

當有人講佢壞話,你會想為佢護航,但又唔敢做得咁出面,驚畀人發現會講閒話。就算全世界都話佢衰,唔適合你,你都唔想信,覺得只係世人誤解咗佢,唔了解佢,佢嘅缺點喺你眼中變咗優點,你對佢嘅包容力好大,就算佢有時口直心快傷害咗你,你都會一次又一次咁原諒佢,同自己講佢應該係無心嘅。

你嘅心情會因為佢而大上大落,佢氹你你就好開心,佢唔理你你就會胡思亂想,諗佢係咪同第二個傾緊計,佢而家又同邊個出街呢?真係要唱番句「曖昧讓人受盡委屈。。。」最後,如果你睇呢篇文嘅時候,一直諗住果個人,仲要逐點對自己有無中到,咁我恭喜你,你應該已經喺不知不覺間鍾意咗佢。。。

 

 

作者:小盛女

小盛女
80後中環打工妹,誓要追求work life balance的生活,並當一個幸福的食家。FB PAGE:https://www.facebook.com/littlevibrantgirl

閱讀後覺得好,請多多讚好及分享~:)

其他熱門文章

歡迎讚好我們的facebook page,免費資訊源源送上。

文章資訊

ID: 204440
Date: 2020-03-05 06:26:48
Generated at: 2022-09-29 00:41:23
Permalink: https://www.vjmedia.com.hk/articles/2020/03/05/204440/其實點先算係鍾意一個人?