【西客】屯門藍地「大」街無位停車,各位乘客用下腦先好落柯打

 

 

大台有一個「取消費」嘅制度,主要有兩種做法。第一種,個客叫車後,五分鐘內取消係唔會收錢,但五分鐘後取消就要收錢;另外一種,司機去到上車地點等夠三分鐘(司機程式會喺到達上車地點就會計時),見個客未到就可以直接取消,拎返15蚊,另外仲有5蚊係預約費用俾返大台。即合共收20蚊取消費。

根據大台嘅講法,呢個取消費嘅制度係「用來補償司機夥伴前往接載你所付出的時間和努力」。不過,香港人係好度縮嘅,十元八塊都斤斤計較,最好唔洗錢,而且佢哋好多都係唔會揸車嘅人,永遠唔會明白揸車接人都係要用油同時間。最好就呼之則來,揮之則去,一個仙都唔洗俾。於是乎就會出現一種好奇特嘅諗法:司機撳取消掣就唔會收錢,乘客自己撳就會收錢。筆者都遇過呢啲客,通常筆者都會勸啲客自己取消,只要佢五分鐘內取消就免費。啲客好嘅就自己取消,唔好嘅就覺得你呃佢,死都要你幫佢取消,不過呢啲客都未最經典。筆者試過遇到一個客,20蚊就買起咗佢嘅人格。

話說有一晚,我係屯門市中心去屯門藍地大街接客,地點係藍地大街某綠咩居,個客叫我係七仔等佢。但係,藍地大街係個名「大」嘅啫,實際上係剛剛夠一架車過,仲要單程路。當時等咗一陣個客都未到,剛好仲要有車係後面,即係焗住向前走。而更重要嘅係一出咗條街就要兜個大圈先返到去上車地點。我就打電話俾個客,同佢講話未見人,咁佢話佢剛剛到,我同佢講要兜個大圈先返到嚟接佢,問佢肯唔肯等,唔肯就取消啦。個客就話要我取消,因為唔想俾取消費。我就話,咁我已經嚟到等你,係你遲嚟又唔肯等,呢個錢一定會收。個客聽完之後即刻「上身」,瘋狂問候我娘親。筆者亦不甘示弱,一於簡單三隻字問候返佢全家,再收佢線(做服務行業,唔係做奴隸,一買一賣,俾啲尊重。你小人時,人家都可以媽你)。

我即時再打電話上大台投訴。呢個大台都夠哂衰,本身唔俾返「取消費」我不特止,諗住係司機程式度刪走個行程扮冇事發生。我再打上去鬧佢個客服一輪。我話我明明到咗等佢,係佢遲到在先,個地方仲要冇位俾我停,仲要其實大台追踪到我係到過上車地點等過個客(一上線會有定位追蹤,冇得呃),點解唔俾返「取消費」?最後死死哋氣俾返15蚊我⋯⋯

各位貴客,如果真係咁在意嗰20蚊,你可以諗清楚先叫車,或者你可以叫車後五分鐘內自己取消(揸緊車唔得閒幫你,真係堅持要嘅就請等等啦,轉頭得閒停啱位再幫你)。再唔係嘅,出面街好多吉車,遞遞手有時仲快仲方便。反正街外錢賺唔哂,歡迎其他載客業界(的士)一齊賺,我哋好包容㗎。

 

【嗚巴軼事】

 

作者:車上人間

一個男人一架車,見盡香港人和事。

閱讀後覺得好,請多多讚好及分享~:)

其他熱門文章

歡迎讚好我們的facebook page,免費資訊源源送上。

文章資訊

ID: 204461
Date: 2020-03-07 06:15:54
Generated at: 2020-08-15 22:23:28
Permalink: https://www.vjmedia.com.hk/articles/2020/03/07/204461/【西客】屯門藍地「大」街無位停車,各位乘客用