【外賣仔日記】我送外賣都月入四五萬,只係因為. . . . . .

 

 

香港人最鍾意實踐魚蛋論,幾時都係

首先要同啲唔知咩事嘅人講返個背景

話說我就做咗個短嘅訪問,話做外賣有接近5萬個月,兼簡單講咗啲外賣嘅數據,例如一個鐘大家做幾多單等等。(接近五萬,即係好多挨住4萬左右)

然後,外賣界好多嘅師兄師姐聽完為之震驚,話我吹水之類

話我吹水嘅嘢係無5萬啦,邊有可能送得咁快之類啦。

當時我睇返啲反應,因為都幾多人話無,我就覺得奇怪,明明我係根據好多人講嘅數據,我再整理之後先出街架,唔通我真係有錯? 然後我就決定即刻 Fact Check 一下,即刻搵下啲師兄師姐市況如何呀,有無單呀,有幾多單呀等等之類嘅嘢啦。我即日得出嘅結論係,個市正常喎。接近5萬一個月仍然都係大把人有,但係點解好多人會咁講呢?我完全唔明白。

(講返先,即係我覺得四萬幾一個月大把人有,五萬係好勤力開工嘅會有,不是指開全職好多都有5萬)

跟住,從海量話我吹水作大嘅留言入面,我發現到點解啦,而當中有幾個原因或者問題我一直都想講。

而且,我亦都親身感受到香港人最鍾意實踐魚蛋論,幾時都係。

2003 年黃子華講,到今時今日都無變過。

其中幾個留言都話

「你咁樣講,搞到啲中學生/其他街外人入晒嚟搞亂個局,影響我收入/我要養妻活兒等等」

首先中學生唔會有車,佢得兩隻腳,你啲單同佢啲單真係兩個世界。同埋你有車牌兼有車,係其他人冇。你估我哋台灣呀?全民皆車,唔係啦。你驚乜?同埋而家唔係無限制入人喎,仍然keep 住要報更,每小時都係有限人數,驚乜?同埋現實未有人全日都無單吖

仲有嘅係,外賣單量一直都有上升,keep 住請人去填補升幅有咩問題?就算我唔講,每個禮拜都keep 住有1000人上袋鼠見工呀。

如果佢哋係咁請人,而你哋真係咁不滿影響你收入,點解唔立即罷工?

另外有啲人唔信我,無5萬一個月,我就講返話港島北真係有咁嘅數

然後有人留言話

下?南亞唔通唔係人?做撚晒?搶晒啲位?咁我撞鬼呀?

同埋我從來冇聽過南亞會話比人搶晒啲單之類嘅說話,真係得香港人會咁

另一個話我吹水嘅留言所引用嘅嘢,亦都係長久我見到嘅問題嚟,嫌遠唔肯轉區做,然後話自己個區好差。

佢話我吹水,然後係即刻貼佢即日兼即時嘅做單數據出嚟,大大聲話無咩單。

之後留言入面就有銅鑼灣師兄貼佢自己做嘅數比佢睇

條數係咁(圖片及數據得到師兄授權使用及張貼)

 

(條數亦都係我平時睇開嘅數字,我覺得正常啦,亦都係我話好多人5萬一個月嘅方向)

咁呢位留言嘅師兄就叫個位冇單嘅師兄加油,咁無單嘅師兄就追問,問下做邊區會咁嘅數

個師兄覆返話銅鑼灣

佢回覆返話

 

佢竟然話唔識路呀 ~!!!!!!

咁你要咁多單你又唔去?因為唔識路?地球有樣嘢叫地圖,唔識路睇地圖啦。

我就好心勸籲呢位無單,又要羨慕人哋有單嘅師兄去銅鑼灣做

佢覆返我話

 

大佬,你自己個區唔到你心入面條數,叫你轉又唔轉,唔好怨冇單,你沒有這個權利

我周不時都會收到PM 問,話邊一區好唔好做,有冇單,搵得多唔多等等。而且大多數問得呢個問題嘅人都有個共通點,就係問我東涌/西貢/呢一類偏遠地區好唔好做。即係咁,有啲區本身都比較少單嘅,有啲直頭單都無。你要求有合理嘅單做,有合理嘅收入,然後響啲小單嘅區做,你嘅收入不符合預期就必然架喎。

當你唔知,話埋你知,兩大外賣公司都有得申請做其他區

熊貓要申請,袋鼠唔使,本身全香港任開

 

 

遊戲規則清清楚楚,公平公開透明,你無,其他人話埋你知邊度有,唔去,唔做,嫌辛苦,嫌遠。 然後嫌無單無收入,其實你係咪要考慮下送外賣是否適合你呢?

魚蛋論,幾時,邊度,只要有香港人都識合套落去

 

 

專題:【外賣仔日記】

 

作者:外賣仔

外賣仔

閱讀後覺得好,請多多讚好及分享~:)

其他熱門文章

歡迎讚好我們的facebook page,免費資訊源源送上。

文章資訊

ID: 204687
Date: 2020-03-13 07:14:43
Generated at: 2020-08-13 10:37:23
Permalink: https://www.vjmedia.com.hk/articles/2020/03/13/204687/【外賣仔日記】我送外賣都月入四五萬,只係因為