【武漢肺炎】西人老細返工唔戴口罩,做好自己有咩用?

 

新型冠狀病毒肆虐,小編都就快搞到神經質,日日年廿八咁款清潔。平時污糟開,好日都唔抹吓公司張枱,而家就日日喺度係咁抹。但你自己咁努力嘅時候,睇下同事做緊啲咩先……

大部份同事無時無刻戴口罩,但我哋腦細就一於少理,一返到公司就除口罩,仲話「我頂唔順長期戴,好焗,講唔到野!」

咦?呢句咁熟嘅? 好似之前有個公眾人物咁講過……唔通大家覺得戴口罩好舒服,得你一個先會唔舒服咩?!

不過算啦,呢啲每個人都有每個人嘅自由,唔可以迫個個都戴。咁最少同其他人保持距離,等大家都安心少少。但係腦細又一於少理,小編企遠啲同佢講嘢,佢就話聽唔到,仲叫小編行埋啲……

而家個個同事Lunch 都喺個位食外賣,腦細就硬係食飯時間特別有吹水Mood,係要趁個個食飯除低口罩就行埋嚟吹水,你想大家食你啲口水就早講啦,小編幫你將啲口水倒入部水機到。Sorry,好似有啲重口味咗。 XD

唔知大家有無喺街到留意到,通常香港人個個都好驚,戴哂口罩,反而外國人就好安心咁,多數都唔戴。呢個情況喺小編公司都一樣,外籍嘅膠層都唔習慣戴口罩。唔緊要,都係嗰句,呢樣野係自由,但你唔好見到人戴時就陰陰嘴笑,然後一邊咬住手指一邊問人做乜日日戴口罩。小編有時真係懷疑啲外籍嘅人係咪活喺另一個平衡時空,佢個世界係無新型冠狀病毒?!小編仲聽過有人話佢唔係亞洲人,所以唔驚……原來鬼佬係對呢隻病毒免疫?! 咁外國咁多人中招?Um……係啦,一定係啦,中招嗰啲一定係混血兒啦……=_=|| |

公司最大嘅大腦細都係典型嘅外國人,幾年前先嚟香港,可能佢冇見過好似 SARS 呢啲大場面,所以佢完全唔明白我哋係到驚乜,仲要話點解嗰個都 Overalert。 同其他部門經理開會嘅時候(係,佢嘅行為同未有新冠病毒之前無分別),唔使諗佢會戴口罩,小編經過會議室,見到平時刷開鞋嘅幾個經理都一於投其所好,一齊唔戴口罩,係個會議室焗一兩個鐘……見到呢幕,小編有啲冷汗直流……諗諗下,小編有啲懷疑人生,自己努力但有啲人又完全唔理,咁小編嘅努力到頭來會唔會無咩用……

點都好啦,以上嘅示範,好肯肯定係一啲唔係咁理想嘅做法,抗疫做多好過做少,大家千其唔好鬆懈,一齊努力!最後好似每一間公司嘅抗疫 Memo 一樣,最尾梗有返一句,「大家齊心努力對抗疫症,祝大家身體健康!」。

 

【職場膠事】

 

作者:HR 扮工週記

HR 扮工週記
HEA 到核爆、哩埋係枱底畫下圈圈直至 2046 退休既 HR,同大家分享一下每一日 HR 平淡既生活。

閱讀後覺得好,請多多讚好及分享~:)

其他熱門文章

歡迎讚好我們的facebook page,免費資訊源源送上。

文章資訊

ID: 204762
Date: 2020-03-14 06:21:17
Generated at: 2020-08-06 12:57:48
Permalink: https://www.vjmedia.com.hk/articles/2020/03/14/204762/【武漢肺炎】西人老細返工唔戴口罩,做好自己有