【外賣仔日記】請得多人會搞到你無單接?其實一個月搵唔到三四萬係你嘅問題

 

啱啱有人問我,點解你會咁熟悉呢個行業嘅?

我諗咗陣,跟住話:「咁我啱啱做,但係自己嘅收入不似預期,又見到人哋有單有收入,咁我又好想要,但係無理由淨係攞少少就滿足,咁咪諗要最高嘅收入,咁即係要最多嘅單啦。咁咪開始了解成個外賣行業囉」

係喎,點解我會咁熟悉嘅呢?因為想要最高嘅收入囉,然後好多時就會自不然了解下各外賣公司嘅發展。呢一行唔似其它行業,其他行業係無論市況或者生意如何,你嘅人工都會俾你嘅。我哋係接近俾晒啲嘢你睇,然後點樣做或者發揮就悉隨尊便啦(最誇張係見過有外賣公司開埋仔細嘅數據話你知,繁忙時間電單車響邊區等幾耐就有單)。

越做得耐,親身買得更多嘅時間成本教訓,開始知道市場狀況,亦都開始預計到市場會發生咩事,直頭係試過突然響屋企覺得某區之後個幾小時會有大量訂單(個間公司仲要無底薪,估錯連車費都蝕),特登走去做,最後當然成功準確預測啦。

因為如果你要爭取最多訂單或者收入,你就要即刻去估計其他區嘅生意,估錯就蝕,有底薪嘅公司咪蝕啲時間成本,無底薪嘅公司直頭車費都蝕埋吖,咁講緊你午市完咗,係幾個鐘後就晚市啦喎,咁估計係得好短時間,咁你仲要搭車食飯呢?考慮時間真係唔多。然後,就係嗰陣我徒手都識得背呢個行業嘅簡單運作以及非常關心行業發展。

呢篇文章唔係介紹我自己,目的係想講下香港嘅外賣業,因為發現好多行業入面嘅師兄師姐完全唔知行業發生咩事,就好大聲係咁鬧,重要個啲人唔係第一日入職㗎喎,點解都會咁?某個我相熟嘅師兄同我講,「做咗咁耐都唔知環球市況下話?」我覺得,明顯,真係唔知。

所以今日同大家講數據,講呢一行。

你好,呢度係外賣速遞行業,一個B2P 嘅行業,食客利用互聯網落單,餐廳煮嘢食,我哋送。

一間餐廳,任何情況下,餐廳都係得咁多嘅枱櫈數量,但如果你想訂枱,但餐廳無晒位嘅時候,佢可能會同你講,「先生,我哋無晒位啦,會唔會考慮book 第二個時間?」,而個拒絕原因顯然易見,因為餐廳無多餘空間容納佢哋食飯。

但係我哋嘅行業係響條街度工作,近幾乎係街道嘅容納量,就係我哋嘅最高生意容納上限(咁即係點都唔會爆啦)。咁我哋就可以諗一個問題,咁既然顧客同時容納量無上限,咁香港可以同時有幾多位顧客惠顧我哋嘅服務㗎?咁外賣送遞係為你嘅肚餓提供解決方案嘅行業嚟,即係我哋係協助解決一個人人每日都需要問三次,而且都一定要被解決嘅問題啦,簡單嚟講你無理由唔食飯㗎。咁即係話,全香港780萬嘅人都有機會係我哋外賣速遞行業嘅顧客喎。重要理論上係,同時接收顧客嘅數量係有幾多顧客排隊想落單,我哋收晒都得架喎。

咁好啦,問題嚟,咁一個每日都要被全港市民每日問2340萬次嘅問題,有幾多人搵我哋解決㗎?但始終我哋又唔係呢個問題嘅唯一解決者,我哋本身有兩個主要嘅競爭對手嘅,而且佢哋歷史悠久,包括係「自己煮」同「出街食」(扣除埋香港獨家擁有嘅土地問題,「自己煮」接近唔係我哋對手)。根據我收集到嘅數據啦,全個外賣行業疫情前每日平均大約保守估計由3萬人到大膽估計嘅9萬人左右會搵我哋解決(大膽數據估算係當一個家庭有三個人,估計佢哋同時落同一張單,數據未能扣除午餐同晚餐都落單嘅顧客,同時一個星期嗌幾餐嘅都未扣除,亦都未有計算疫情下顧客上升數字),即係話本身全香港每個月只有大約7%到嘅人會嗌外賣(甚至更少),遠遠低過台灣2019年年尾所統計嘅每月23%左右,咁即係仲有720萬嘅人唔嗌外賣架喎。

而家「自己煮」同「出街食」嘅人,周街都有。當我哋接近無上限嘅顧客容納數量,再加上周街都可以搵到新顧客。咁其實輕輕力宣傳下都會有大量新增顧客㗎喎,而家講緊某公司外賣訂單升超過6成,數字估計將會持續上升。

咁個問題嚟啦,多咗單會點?當一間餐廳突然爆紅,訂枱數量排晒隊都好啦,咁都唔會因此而需要增加更多嘅侍應㗎喎,咁間餐廳都係每日都服侍咁多張枱吖。咁但係,外賣速遞行業呢?我哋係一個外賣員每次都只會專注送遞一個顧客嗌嘅單架喎,而且如果同時有多幾位,甚至幾十位顧客,咁就要多個人啦喎,而家接近係有770萬潛在顧客,求其賣下廣告,做下推廣,一間執返萬零兩萬顧客,真係分分鐘易過食生菜(而且外賣公司都不斷有做廣告)。根據2019年響香港人嘅互聯網接駁率高達92.3%,用手機連接更加高達99.1%,高於台灣嘅88.8%。要增加大量顧客簡直容易啦,加埋疫情,嗰個留在家中,個升幅就更高啦。

咁而家係有上升趨勢嘅時候(有無疫情都係),點解外賣公司唔需要大規模請人?睇返香港外賣業個可持續增長單量係仲有大把空間,台灣有23%嘅人口會嗌外賣,香港分分鐘連7% 都唔到,單量增加都非常合理,而且互聯網普及率重要高過台灣,單量爆升?好正常呀。如果假設香港最終有23%人會嗌外賣,即係香港最終估計會有100萬人嗌外賣,甚至更多,遠遠多過而家大膽估計嘅9萬,即係香港嘅外賣單數量將會增加20倍喎。

咁多咗20倍單,咁加人手就緊啦。係,增加人手可能會因為估算升幅錯誤而變得泛濫,但係計返潛在單量升幅,高達100萬單嘅時候,真係到最終最終未必會夠人手。

你擔心有人搶你單,分薄晒你嘅單,從而減少收入,不如擔心下未來隨時唔夠人手做單吖。

 

專題:【外賣仔日記】

 

作者:外賣仔

外賣仔

閱讀後覺得好,請多多讚好及分享~:)

其他熱門文章

歡迎讚好我們的facebook page,免費資訊源源送上。

文章資訊

ID: 204817
Date: 2020-03-15 06:41:50
Generated at: 2020-03-31 13:24:45
Permalink: https://www.vjmedia.com.hk/articles/2020/03/15/204817/【外賣仔日記】請得多人會搞到你無單接?其實一