戴唔戴口罩?咁你跟英美定跟中共?

 

周六晚見到網上一片嘩然,謂英國首相約翰遜草菅人命、不顧人民死活,推出「自生自滅佛系抗疫PLAN」。對於呢啲大事大非問題,我就直接搵到官方嘅TRANSCRIPT(有LINK),睇原文,搞清楚呢位被嘲為「瘋顛CLS」嘅首相,講咗啲咩同佢想點。

我睇完,內容同網民PO嘅差唔多,但我又唔係咁不滿同驚訝喎。呢位波莊首相,唔係無的放矢,佢講嘅係英國人想聽嘅嘢,佢嘅方針係有推論嘅,唔係亂吹亂嚟。你唔同意佢嘅做法係一回事,佢係理性地做呢啲決定。而英國政治呢,啲市民在大鑊嘢發生嗰時,你言語上越虐待佢、越係嚇佢,班英國鬼好似越爽咁。你唔講激啲,輕描淡寫,美化真相,佢地似乎係會唔信架。

返去約翰遜嘅《聲明》,其實佢都有避重就輕咁傳達個真相同邏輯,有啲唔方便直講嘅,都暗示咗出嚟。左膠瘋狂鬧佢無人性,犧牲國民。左膠鬧人就可能佢做啱咗,而英國人可能覺得佢誠實,呢啲大鑊嘢梗有人死,各自努力活下去係英國人腦入面嘅正路。我睇到一啲嘢,可能同其KOL有啲唔一樣,即管分享下。

 

第一,醫療資源就得咁多,佢地計過度過,一係系統崩潰攬炒死晒,一係由得啲老弱留在屋企安安樂樂咁走。錢、藥、人手、物資就係咁多,優先次序係一定要排。孟子都講過「以羊易之」,從政就係要做決定犧牲邊個圖利邊個,今次益你下次益佢,大家好好玩遊戲發發財。呢啲大鑊嘢,不能和稀泥搏一鋪可能會無事。嗱,武漢就搏,輸到眼突。

第二,佢攞到意大利詳細嘅數據,尤其係不同年齡段嘅發病率、重症率同死亡率。呢啲細節好重要、好重要、好重要,不一樣的決定係由細節主宰。BB細路、年青力壯,接觸到呢隻武肺病毒無咩事,係好小事,但係年紀越大就越大鑊。香港啲紅媒、庸媒係都用「染疫」「確疹」呢個聽落好大鑊嘅詞,其實,接觸到病毒,可以只係「污染」(Contaminated)無知無覺、輕微症狀咳幾日、重啲嘅發完幾日燒又無事、再重啲嘅就真係肺染吸唔到氣、去到盡就係瞓低瓜得。頭三種情況,真係唔恐怖,點解要製造恐慌?依家歐洲做咗咁多數據出嚟,我信佢地多過信大陸同WHO,咁我地係咪應該專重數據,量力而為。風險不可能歸零,盡力管理,利益最大化,才是正常理性的操作。

第三,好多左膠大力鞭屍唔封城唔叫人戴口罩阻遏病毒散播。有篇文話,戴口罩有用,做咩英國、美國、歐洲咁多左膠大國,唔叫人人戴口罩。「口罩有用」呢個係事實,嗰位作者用CONDOM嚟做比喻亦好洽當。但係嗰班首相、總理、總統睇住更多事實︰邊L個買晒英國歐洲啲口罩庫存?手頭上無口罩,叫人狂戴口罩係咩意思?口罩得咁多,呢啲政府都話要留番俾醫護(即係口罩有用喇,無用留俾醫護托咩?),人民喺市場買唔到口罩,政府又無得派,不如話「戴口罩無L用」,等大家唔好浪費時間,又唔好有啲人好似香港衙差嘅鳩戴鳩著啲防疫裝備。更重要係︰選民將話題轉去問責點政府應該有口罩但手頭真係無口罩件柒事,大家專注做一啲可以做嘅嘢。

第四,就係個HERD IMMUNITY策略,等啲人接觸病毒,發展人體自身免疫,該無事的無事、該小事的小事,人人有過事之後就大家無事,連啲老弱都可以在後期得益唔使隔離,但要注意,啲老弱到時遇到病毒,又無藥可以速速醫好的話,都係死路一條。呢個又係番去長中短期資源制約同死人概率嘅問題。約翰遜同侵侵好似都係落注玩呢個策略,搏佢地個社會夠壯健,在控制範圍內爆發,疏導咗佢,消費同經濟唔好停晒,錢係要運轉先至人人得益。嗱,佢地已經唔信圍堵政策,一條溪一條河可以防堵,雪崩海嘯係無得防。圍堵係武漢去做,爆到全世界周圍都係,即係周圍都爆屎渠,你只可以頂硬上通渠搞到一身屎,無得乾乾淨淨架。從經濟角度,封城邊個得利呢?有錢嘅等對手破產做收購(大陸對香港玩緊呢樣),有權嘅分配物資發大財(貪腐全世界都有),左膠就周圍鬧人收割稿費同光環(全世界一L樣),死嘅係中小企業主、傷嘅係自由業者同低收入嘅勞動者。仲有,呢兩日見啲紅媒、左膠、WHO鬧呢條計策鬧到拆天,就快講到係反人類咁。嗱,敵人咁嬲,係咪做啱咗啲嘢?我諗兩位金毛領袖都會問同一個問題。

第五,就係約翰遜都講科學同專家意見,佢聽咗一家之言就去做。咁當然有好多反對聲音喇,包括十九才子都鬧佢「腦袋出現殘障」。所謂「佛系措施」,會消極得過封城?你封得一個月定一季?左膠除咗戴口罩之外又有幾積極?香港人又好善忘,之前叫大家唔好信大陸同WHO,邊度有真數據?咁咪等意大利呢個一帶一路橋頭受晒靶有晒數據先至做嘢囉。在歐美民主國家,點止議會有權有勢?仲有官僚、學界、專業團體,N咁多人牛咁眼,佢地啲嘢我地知道清楚咩?單睇呢篇聲明,加埋其他信息,其實唔可以話呢個政府亂嚟。

 

鋪咗咁耐,總於要入正題,呢個HERD IMMUNITY謀略係唔係防疫咁簡單呢?見到有人PO文用搏奕論嘅圖表去分柝各國走不同策略下互動下之利弊得失,(之前只有圍堵一策,無選擇,依家有選擇就唔同講法),睇完之後,就即管陰謀一下去睇呢件事。

中共宣傳機器成日話要幫世界,WHO又話封城好計好妙,但睇到侵侵同波莊都唔信佢地,佢地有直覺,一定唔可以跟中共嘅劇本玩。諗下都知︰歐美手頭物資情況︰庫存上個月俾大陸買走晒,搏佢封住唔會出到嚟,錢收咗好多但就無物資喺手。全民口罩、有病都入醫院消耗儀器物資,呢個無底深潭,非不為也、實不能也。佢地都後悔緊點解將呢啲戰略物資生產轉晒去中國,玩封城、玩口罩的話,歐美一時之間真係要搞到仰人鼻息?焗住去「感謝中共」?以侵侵為首嘅鬼佬,唔會唔諗其他可行之路。

意大利人犧牲換翻嚟嘅數據,對歐美係好重要嘅,佢地就係咁見到HERD IMMUNITY唔單只可行,仲可以反將中共一軍。你做初一吖嘛,我同你玩大佢,十五玩到初一,踢翻個波俾習大大,睇下邊個頂得住?呢次真係第三次世界大戰,而戰場係每一個人嘅身體,「武器」就係呢件「武漢肺炎冠狀病毒」。

英美歐行HERD IMMUNITY,目標明確︰鬼佬最後都係帶住病毒周圍走,或者佢地有晒自身抗體唔再怕,亦唔再戴口罩,與病毒共存,回復正常。另一邊係「成功圍堵」嘅中國,病毒好似唔存在,戴住口罩唔知堵截到何年何月。咁呢,唔好話「種族歧視」,只係好直觀嘅正視︰「污染咗又唔戴口罩嘅鬼佬」同「純潔但戴口罩嘅中國人」。咁中國要繼續防堵,又點可以俾鬼佬入嚟?中國人又咁驚「染疫」、出咗去返歸又要隔離,即係唔使出去。唔使動槍炮,唔使談判,中國自絕於天下,DECOUPLE由中國搞掂,貿易戰仲係唔係要繼續傾呢?世界工廠都唔出窟,啲供應鏈就回流英美歐同佢地嘅盟國如墨西哥等等,中國真係可以自給自足,中共繼續唯我獨尊,閂埋門自HI,文成武德、千秋萬載、一統江湖都OKAY架。

封城封關咪即係同錢作對,貪官財閥仲要走佬架呢!咁中共面對嘅係,佢要ENGAGE就要加入HERD IMMUNITY,咁之前圍堵損失咗咁多錢事少,認衰無面事大。偉光正嘅黨雖然唔係得一次轉軚,但呢次轉軚,第二波爆發會死好多人,之前該死未死嘅老弱今次大檸樂,家屬以千萬計嘅巨嬰大鬧醫院,想唔亂?要花錢做醫療派口罩。想人收聲?要養好多網軍刪文帶風向。鎮壓咩?衙差使錢一樣倒水咁倒,唔滿意一樣可以兵變。財經上,人仔已經係咁「印」,開工日賣晒報紙大撒幣廿八萬億,仲可以點放水又唔谷爆?頭都大埋。

第三次世界大戰未開打,普京大帝一早就落閘,仲放埋狗斬死埋中國人添。佢就容易啲,反正油管啲石油天然氣一路泵出去歐洲同中國,佢就一直有錢去搞掂俄國嘅問題,雖然沙地同美國壓油價玩嘢,普京大帝仲大把貨可以慢慢玩。佢要諗嘅係,跟歐洲HERD IMMUNITY班伏特加上腦嘅子民頂唔頂得住唔好死幾千萬人。定係繼續圍堵,夥拍中國,挑戰歐美呢?

台灣呢,圍堵之策係大成功,但亦成為下一步嘅包袱︰跟歐美HERD IMMUNITY前功盡棄,死番啲人加入美歐集團齊齊唔戴口罩?定係繼續圍堵自絕於歐美,泊大陸嘅碼頭?呢個世界都係無咁著數,你要站隊就要付出對價,呢次無得順風車。我諗,台灣人要早作討論,民主社會要謀共識唔容易,守住共識一直行落去唔彈出彈入都幾難。總統女士同佢嘅政府看來有能力作出明智嘅選擇。

香港人呀,呢次真係搵命搏。之前勇武去搏,呢次係問大家搏唔搏?之前政府就想大爆發死多啲香港人黑心,依家就跟國策圍堵防疫復工搵錢。英美開咗牌,HERD IMMUNITY就唔戴口罩,上陣肉體抗病毒。香港人要「投票」︰有病毒唔戴口罩,爆發死人(可能死嘅好多廢老,但都要諗到係自己、親人或者同路人去犧牲);無病毒就戴口罩,去唔到英美搵佢地嘅錢,要賺錢生活就只有投共,咁唔好講咁多民主與自由。香港人會揀生於憂患?定係死於安樂?(吓?俾衙差打到咁都仲安樂?)「To be, or not to be, that is the question.」

 

寫咗咁多,覺得自己有啲冷血。

 

作者:白恩樑

好讀書,不求甚解,每有會意,便欣然忘食。(陶潛《五柳先生傳》) 為天地立心、為生民立命、為往聖繼絕學、為萬世開太平。(張載) 子曰:「飯疏食,飲水,曲肱而枕之,樂亦在其中矣。不義而富且貴,於我如浮雲。」(論語.述而) 創業要準備一桶血,而最大的創業就是打天下。(王強,《亞洲週刊》訪問2009)

閱讀後覺得好,請多多讚好及分享~:)

其他熱門文章

  • 【辦公室智慧】Learn how to not give a fuck, you will be fine. by 沒有句號
    大佬個 Sales Assistant – Ann 姐入 form claim 電話費,一次過 claim 一至八月,公司 policy 講明只可以 claim 最近兩個月嘅單,會計部都係跟 policy 做嘢啫,過咗期自然就彈㗎啦,所以 …
  • 【真人真事】小表妹的胎前記憶 by 表姐
    「你仲記唔記得喺媽咪個肚果陣係點架?」 「唔記得啦」 「再之前呢?未去媽咪個肚之前你喺邊架?」 「喺個天度」…
  • 失戀時,朋友講嘅野,聽下好喇! by 壞孩子
    佢地唔係你,唔知你個心有幾多掙扎,唔知你同個ex嘅經歷同佢俾你嘅感覺,就算你講左,佢地都係當故仔咁聽。而且,朋友為免你傻落去,通常都會叫你放手,話個人唔值得你等或者挽留。但你聽完,就算心知肚明,你鬼做到咁灑脫,如果你得,朋友就唔洗成日睇住你…
  • 關心柳俊江,仲多過十二位手足 by Terence Yun
    此新聞一出,不論是藍絲群組還是黃絲群組,都對此新聞樂此不疲,藍絲見此新聞,當然不會放過這個機會,明白,必然強力追擊,一定打到唔停手。但係唔明所謂的黃絲群組,所謂的本土、城邦之類,都對此也樂此不疲,大家七嘴八舌,當家常話,當正他有如阿嬌藝人般…
  • 去到英國做警花(自稱),見盡社會光怪陸離。 by 英國警花
    早排見d移民谷,個個都好擔心治安,人人好似會抬個夾萬日日出街等人打劫咁款,好似治安除左偷竊打劫外就無野要考慮。講到治安,你有冇諗過英國好多警力其實花了在照顧精神病人身上?…
  • 【MHXX攻略資料】村下位 ⋆1-6 KEY 任表 by VJGamer
    村 下位 ⋆1 KEY 任表 任務名稱 狩獵對像 出現條件 備註 古代林の特性ゼンマイ 採集 8 個特産ゼンマ […]…
歡迎讚好我們的facebook page,免費資訊源源送上。

文章資訊

ID: 204837
Date: 2020-03-17 00:17:46
Generated at: 2020-09-23 00:56:16
Permalink: https://www.vjmedia.com.hk/articles/2020/03/17/204837/戴唔戴口罩?咁你跟英美定跟中共?