姐弟戀到底work唔work?

 

 

「無論幾多歲嘅男人,都係鍾意後生女㗎咋,你睇里安納度就知啦!」我說,然後即刻隊咗個圖表出嚟。

 

 

「咁又未必嘅,其實,最近都有個dede追緊我。」朋友Crystal說。
「小二,花生兩碟吖唔該!」我笑說,然後坐定定等聽故仔。
「其實又唔係話細好多,五年囉,同佢一齊都幾開心,佢好似永遠都唔會攰咁,成日帶我周圍玩,同佢一齊好似後生咗幾年咁。」Crystal笑說。
「愛情嘅魔力呀~~~」我說。

唔知係咪踏入咗中女年紀,身邊愈來愈多90後00後出現,通常我都當佢哋係dede,小朋友,劃入friend zone,但係都出現過例外,不過自從果次之後我就怕咗啲dede,因為我好怕果種好似拖住細佬出街嘅感覺,覺得自己好似好老咁,雖然佢話完全唔介意,而且一齊嘅時候有好多反白眼嘅事發生,果陣我覺得自己喺屋企煲劇仲開心,所以最後好快就分開咗,我承認我係鍾意比人照顧多過湊仔,我無乜母愛,又或者,係我對佢根本唔夠愛。

拍拖次數多咗,就愈知道自己鍾意咩,唔鐘意咩,有咩位可以妥協,有咩底線係一定唔可以過,然後個人會變得愈來愈理性,會考慮得好清楚先開始一段感情,性格夾唔夾?價值觀會唔會差好遠?年紀,工作,屋企,朋友都列入考慮範圍,唔再係以前「有feel就去馬啦!」或者「試咗先囉!」一嚟試真係好攰,二嚟無乜時間同心力,於是個人變得好現實,唔係話要識個有錢人,但係起碼要有啲經濟基礎,我唔使你養我,但係你起碼要養到你自己,有時我甚至會諗,同呢個人一齊睇唔睇到將來?如果睇唔到,咁不如唔好開始。

「喂,好心你去識吓人啦,成日做宅女!」朋友Crystal說。
「懶呀,煲劇不知幾開心,我有玄彬陪就夠。」我說。
「成日話懶,藉口!星期日個party一齊去啦!」朋友Crystal說。
「放過我啦,單身唔會死㗎。」我說。

其實有時我都想試下果種就算全世界都反對我同佢一齊,但係我仍然會死衝埋去嘅感覺,可惜我真係太理性,又或者係我太無信心,諗多兩諗就想縮,覺得佢應該搵個更加適合嘅人,唯有同佢講大家只係啱做朋友,等佢搵過第二個,既然都無結果,咁就唔好開始。

至於姐弟戀到底work唔work?只要夠愛,乜都會work,只係我唔夠啫。

 

 

作者:小盛女

小盛女
80後中環打工妹,誓要追求work life balance的生活,並當一個幸福的食家。FB PAGE:https://www.facebook.com/littlevibrantgirl

閱讀後覺得好,請多多讚好及分享~:)

其他熱門文章

歡迎讚好我們的facebook page,免費資訊源源送上。

文章資訊

ID: 204847
Date: 2020-03-17 05:57:46
Generated at: 2020-03-31 11:59:56
Permalink: https://www.vjmedia.com.hk/articles/2020/03/17/204847/姐弟戀到底work唔work?