魯益師 (C.S. Lewis) 會點面對武漢肺炎?

The Gospel Coalition

 

武漢肺炎而家全球大流行,雖然死亡率冇沙士一型咁高,但病徵都可以好嚴重。加上潛伏期又長又可以傳染人,深切治療部可能會爆棚幾倍,搞到本來諗住放任國民染病嘅英國保健系統都決定褪軚,全民停工停課停市抗疫。

面對一個冇人知自己有冇命檻過嘅瘟疫大流行,基督徒應該點算?呢輯文章,會一連三集,回顧三位經典神學家面對世界大災難嗰陣寫嘅作品,睇下佢哋如果今日在生,會點面對武漢肺炎。

 

第一集請嚟嘅係英國文學家魯益師。佢嘅名著包括深入淺出概括基督教各宗派共同基本教義嘅《返樸歸真》(Mere Christianity)、喺奇幻兒童小說裡面呈現基督教救恩嘅《魔幻王國》系列(Narnia,又譯納尼亞,當中第一集《獅王‧女巫‧衣櫥》最出名)、同埋生動抵死噉用魔鬼角度解釋基督教倫理嘅《地獄來鴻》(Screwtape Letters)。魯益師全盛時期咁啱就係第二次世界大戰同冷戰初期。佢喺1948年寫咗篇文,評論原子彈對人命嘅威脅。只要將「原子彈」換咗做「武漢肺炎」嘅話,篇文擺落今日一樣啱用:

我哋諗原子彈真係諗得太多。有人問:「喺呢個一地原子彈嘅世界,我哋應該點生活?」我有啲衝動想答:「吓,十六世紀倫敦年年黑死病,啲人點生活?維京人時代沿海城市居民成日畀海盜割喉大屠殺,啲人點生活?其實呢,今時今日,老可以癌症死,扑嘢可以梅毒死,運動可以跌死,飛機可以中導彈死,揸車搭車可以撞車死,你又點生活?」

換句話講,唔好以為我哋嘅危機特別新鮮特別甘。各位讀者,你同你心愛嘅親友喺原子彈未發明之前以經註定終須一死㗎喇,而且多數人會死得好痛苦添。我哋比起我哋嘅祖先多咗一樣科技:止痛藥;但都死,本來就係必然嘅,而且呢個世界已經有唔少英年早逝嘅死法。班友因為科學家發明多咗核爆炸死呢種死法就喺度揦埋口面喊苦喊忽,佢哋都戇居嘅。

我個重點係,我哋係時候的起心肝,沉著應戰。就算我哋會中原子彈一鑊熟,我哋都要俾粒原子彈睇到我哋祈緊禱、開緊工、上緊堂、睇緊書、聽緊歌、沖緊涼、湊緊仔、打緊波、吹緊水,生活有條有理,似番個人,而唔係成棚羊臨入屠房噉攬埋一箸喺度等死。原子彈同瘟疫可以毁滅我哋嘅身體,但係我哋唔應該俾佢塞滿我哋個心。

—魯益師《論原子彈時代生活》(On Living in an Atomic Age)

魯益師提醒我哋,死唔係最大鑊,驚死驚到不似人形仲大鑊。基督徒要較啱心態,似返個人噉面對災難。

噉我哋的起心肝之後要點做?心口寫個勇字就衝出去吸收抗體?定係匿埋無限期家居隔離?下一集,我哋會睇下歐洲宗教改革先驅,馬丁路德 (Martin Luther, 1483-1546) 點勸戒各地教會,憑信心、理性齊心抗疫。

 

延伸閱讀:

 

譯註:

  1. 「飛機可以中導彈死」原文係 “an age of air raids” 「可以空襲死嘅時代」,因應時代變遷改動成廿一世紀粵文讀者比較關心嘅空戰死法。
  2. 「沖緊涼、湊緊仔、打緊波、吹緊水」原文係 “bathing the children, playing tennis, chatting to our friends over a pint and a game of dart” 「幫仔女沖涼、打網球、同朋友傾偈飲番杯、掟下飛鏢」,因應粵文修辭習慣重新編排。

 

作者:Deryck Chan

基督徒、工程師、旅英港人,劍橋大學畢業生,在修讀本科時曾接受業餘神學訓練。

閱讀後覺得好,請多多讚好及分享~:)

其他熱門文章

歡迎讚好我們的facebook page,免費資訊源源送上。

文章資訊

ID: 204951
Date: 2020-03-21 00:02:01
Generated at: 2020-03-31 17:57:28
Permalink: https://www.vjmedia.com.hk/articles/2020/03/21/204951/魯益師-c-s-lewis-會點面對武漢肺炎?