無罩交流,大鑊過無套性交?!

 

而家決定要同一個人食飯,就好似要決定同一個人唔戴套扑野咁。嗱!扑野你仲可以揀戴唔戴套,但我唔信你會戴住口罩食飯囉!喺而家呢個非常時期,我地所有人都唔知自己同身邊人有無感染又或者幾時會感染到武漢肺炎。基本上如果同你食飯嗰個身上有武漢肺炎病毒,你就九成九中硬嘅!

聽過一個説法,話唔戴Condom扑野,就等於同哂對方之前嘅所有SP扑野一樣,意思係會感染哂所有佢SP感染俾佢嘅性病。將呢個道理擺喺而家嘅情況,基本上你而家同一個人食飯,就係同哂佢喺呢段時間無罩交流過嘅所有屋企人同朋友食飯。佢同過幾多人無罩交流你知唔知?佢嘅屋企人同朋友又同幾多人無罩交流過,你又知唔知?即係可能你同一個人食飯,已經係等於同緊十幾廿個人無罩交流都唔定。

如果你狠下心腸決定斷五親,只揀最親嗰一個,黎緊三個月只同佢無罩交流,你會揀邊個?唔知你心入面有幾多個人選啦,我當你已經揀到一個人啦,但佢又係咪只係得你係佢唯一一個無罩交流對象呢?如果你只係得佢一個,但佢有十幾廿個,你會中招嘅機會都會俾呢個人搞大左十幾廿倍。你敢唔敢問對方除咗你之外,佢呢排同過咩人食飯?有冇信心佢會同你講真話?又如果佢都係只能夠揀一個無罩交流嘅對象,你有無信心佢會揀你?

再講就算你平日有幾少心都好,如果你選擇同一個衛生意識相對低嘅人食飯,基本上你都會前功盡廢。可能你係好信任一個人先會同佢無罩交流,但其實就算佢衛生意識有幾高,「信任」係唔應該存在,因為好似一開始話齋,你根本唔知道自己或者對方有冇感染。定抑或退一萬步,你覺得自己遲早都會感染,而對方係好重要嘅人,所以衰喺佢身上係ok?但如果嗰個人真係咁重要,點解你忍心將你身上嘅病毒(如有)傳染俾佢?

其實要解決見面食飯就會極大機會互相傳染病毒呢個問題好簡單,就係見面就只係戴住口罩見面,唔除低口罩食飯咪得囉!(當然而家有唔少case係冇所謂「密切接觸」都有機會感染,咁嗰啲就冇計啦)其實好多時同朋友聚餐都主要係為左社交而並非生理需要,即係你主要想見嗰個人,食飯只係順便嘅啫,咁唔食飯都可以見面嫁。但如果無咗食飯呢個環節,就會有另外一個問題產生,就係以前你想見一個人,你會問佢「幾時得閒一齊食飯?」,但而家無左食飯呢一個藉口,你又應該點開口約佢呢?「幾時得閒?我想見你。」如果直接講心入面呢句,就真係赤裸過無套性交又或者無罩交流,不了。

 

 

作者:萬忽瑪利亞

萬忽瑪利亞
搵個人去愛太難,搵個人做愛易D。

閱讀後覺得好,請多多讚好及分享~:)

其他熱門文章

歡迎讚好我們的facebook page,免費資訊源源送上。

文章資訊

ID: 205024
Date: 2020-03-22 23:30:11
Generated at: 2020-08-04 09:53:35
Permalink: https://www.vjmedia.com.hk/articles/2020/03/22/205024/無罩交流,大鑊過無套性交?!