澳門啲外勞係點嚟嘅呢?點解有咁多合法外勞嘅呢?

政治 / 最新文章綜覽

 

大約70年代末,中國文革啱啱完,(根據好模糊嘅口述資料)當時有一段叫「大放」嘅時期,好多大陸人合法或者非法咁嚟咗澳門。非法嘅自然多過合法嘅好多啦,佢哋為咗生活,喺澳門嘅工廠同地盤打黑工,當時被稱為黑市居民(大約差唔多時候有身份證改革,但呢度我冇研究)。呢啲黑市居民造成澳門嘅治安問題:

1. 打劫身份證

雖然澳門喺70年代迎來工業化,但始終同香港差一截;加上本身香港有抵壘政策,只要入到市區就可以做香港人。一般人以為抵壘政策基本上就係得由深圳穿過山林或者游水到新界,再穿越新界進入九龍;但其實仲有一條路線,就係首先嚟到澳門,買張船飛就直接到達中上環,呢條路線只要入到澳門就安全,但缺點就係需要錢同要瞞到香港入境處放佢過關。

所以,有一部分本身唔打算長留澳門嘅人,就會打劫澳門本地人,搶完錢仲要搶證件,拎搶返嚟嘅錢同證博大霧坐船嚟香港,澳門嘅報紙亦經常報導有人證件有問題畀香港入境處打回頭,當中唔少就係呢啲人嚟。

有啲老人家憶述以前澳門人要去香港,會畀入境處當犯咁審,之前一輪有啲網友問點解澳門咁多人仇港,受過香港氣係其中一個原因嚟。但抵壘捷徑對香港嚟講都好大整蠱,所以當時係真係對澳門人好嚴架。

2. 打蛇

至於另一個治安問題就簡單啲。澳門出入境事務係歸治安警察管(澳門有兩隊警隊,可以簡單理解成,治安警係兵、司警係偵探,所以治安警要軍訓,而司警其實只需要讀書),所以黑市居民遇事基本上唔會報警,因為報警即係申請返大陸受。於是澳門嘅賊就會特登去打劫黑市居民,博佢哋唔敢報警,稱為打蛇。問題係,報紙都係三日唔埋兩日就報導有打蛇案,黑市居民係唔係真係唔報警呢?真係一個問題嚟。事實上係有遣返完又游水嚟過嘅人嘅。至於點解係都要過嚟,咁係因為澳門政府試過幾次頂唔順下令承認黑市居民身份,佢哋係喺澳門等下一次(個人估計老人家口中嘅大放唔係中共大放,而係澳門大赦)。

呢兩種犯罪喺澳門政府眼中,完全就係大陸黑市居民帶嚟嘅問題嚟,所以佢哋就打算全面遣返黑市居民。結果,以工聯(類似香港嘅工聯會)為首嘅5個社團反對,佢哋話黑市居民為澳門工業提供重要嘅勞動力。當時已經係123事件十幾年之後,葡國亦都民主化咗好幾年,葡萄牙人根本唔想為華人操心,但求早日將澳門踢返畀中國,對工聯呢個要求自然係有求必應。

但係,一次過批身份證畀佢哋亦都唔合理,於是乎澳門政府就諗咗「藍卡」出嚟,要所有黑市居民向政府登記,成功登記嘅人將會獲發作為合法外勞嘅證件,只要行為良好未來就有機會獲發身份證。唔登記或者登記期完咗先嚟嘅就遣返。登記過程方面政府亦唔想理,叫工聯佢哋代辦,但講明唔准用簡體字。呢件事就係點解澳門可以有大量合法外勞嘅制度性原因(因為呢啲人喺90年代拎晒身份證囉)。呢個時候係80年代初。

大約10年之後,呢啲外勞已經喺澳門結婚生仔,佢哋嘅仔女到咗入學年齡,但佢哋全部都係喺澳門出世但冇身份證嘅「無證兒童」;另外,發藍卡亦唔代表偷渡停咗,黑市居民一樣南下,一樣生仔,一樣做黑工。基於人道立場,政府好難遣返呢啲人,於是就催生「龍的行動」,最後發展成承認所有黑市居民同外勞係澳門人。

佢哋終於唔使做黑工或者二等公民,就返去同老闆講數加人工,結果澳門工業喺90年代中收皮,全部搬晒返大陸,而澳門亦回歸在即,葡萄牙人專心將澳門個唔大嘅庫房搬返里斯本咩都唔理,然後留返可以運作幾個月嘅資金喺庫房就走人嚕。

 

作者:薰華

薰華
塵世中一件無名廢青,除咗偏見同口水就冇嘢多。

閱讀後覺得好,請多多讚好及分享~:)

其他熱門文章

  • 【遊戲攻略】解鎖二三艘潛艇教學 《Monster Hunter Rise》刷國王獨角仙悶到瞓著 by 滅盡殺手
    早兩日我哋嘅一篇小知識技巧篇入面有提到要盡快解鎖收集道具必備嘅潛水艇,雖然做村任好快就會有第一隻潛水艇,但係要 […]…
  • 《星際啟示錄》全面大解構 by 湯子霈
    (以下內容全面劇透,及粗淺解釋科學理論)《星際啟示錄》(Interstellar)故事簡單,講述人類在地球面臨末日,美國太空總署探索新星球進行太空移民,延續人類文明。不過,全片涉及大量科學及物理常識,即使是理科生也未必完全明白;同時,劇情探…
  • 港大舍堂次文化雜談(上):迎新與仙制 by 殷琦
    迎新是Hall的大事。…
  • 【憂傷的嫖客】「環保吹」 by 菠蘿
    某天下午,就在我們對一樓一場所集中地進行實地考察的時候,遇見了一行三人、正在「洗樓」的嫖客小隊。所謂洗樓,就是嫖客在一樓一鳳姐集中的大厦,向每個鳳姐單位門口按鐘、逐個審視,直至他們遇上合眼緣的鳳姐,與她們進行交易為止。而這三人有別於一般的嫖…
  • 其實點先算係鍾意一個人? by 小盛女
    其實我都唔係好清楚(嗱唔好打我),不過以下有幾點可以畀大家參考吓。首先,你會乜都想同佢講,就算係啲無聊低能嘢,當你工作上好大壓力或者遇到唔開心嘅事,你都會同想同佢講,因為你知道佢會靜靜哋聽你呻,雖然唔一定會幫你解決到個問題,但係女人要嘅從來…
  • 【Reg Day 攻略】大學新生註冊四件事 by Cube
    不要以為,Reg Day只是單純報到,拿張學生證就完事。這一天是十分重要的,不想留下不愉快的回憶,就要好好準備了。…
歡迎讚好我們的facebook page,免費資訊源源送上。

文章資訊

ID: 205095
Date: 2020-03-27 05:38:14
Generated at: 2022-08-10 21:49:31
Permalink: https://www.vjmedia.com.hk/articles/2020/03/27/205095/澳門啲外勞係點嚟嘅呢?點解有咁多合法外勞嘅呢