「我會做好呢份工」

政治 / 最新文章綜覽

 

「我會做好呢份工」哩句說話成為曾任權當初競選特首嘅標語,曾經震撼幾多人心。就係因為大家都見證好多政棍,佢地玩政治把戲而「扮工」,香港回歸以嚟無乜邊個正正經經咁做返合適份人工嘅工作。

建制派嘅無能唔使我多講,但佢地背後嘅黨財鴻勢大,蛇齋餅旅行團乜都齊,就算做戲都有嘢俾到市民,只能講啲老人家低智而將自己將來賤賣,算係等價交換。咁泛民呢?好多都口才好好,啲政治理念非常動聽,但佢地做咗幾多實事?有幾多嘢係俾返市民?啲重要議會唔係缺席就投棄權票,咁唔係暗共係咩手法呀?成十萬一個月人工就成日唔開會,呃大家嘅票無做佢地承諾嘅政治理念,就算係議會上字字鏗鏘有力俾人J出血都無用,實踐重要過理論,對住個鏡頭鬧政府我地個個都識啦~不如你俾十萬我日日鬧都得呀!

區選民主派大勝個個好開心係咪?終於踢走賣港建制同暗賣港嘅泛民啦~大家都衝住政治理念嚟投票,因為大家都受夠啦,然後民主派嘅人呢?你地個個都係政治暴發戶,食緊社會運動嘅人血饅頭,唔係社會運動令咁多人政治覺醒你地嘅實力真係贏到建制及泛民咩?背後無財力無勢力去支撐,論學識、口才及背後暗勢力乜都唔及泛民,全靠哩場運動令到好多懶去落區、擺街站嘅參選人都贏到。

牛靈係專寫屯門區內嘅事,我都專留意屯門嘅區議員。區議員嘅職責係為區內居民監察政府各部門,我地市民嘅職責就係監察你地,哩個先係良好嘅社會運作。當初咁多位未上任先做事,就算落選咗嘅都衝出嚟落心落力真係叫人感動,但係之後呢?尤其疫情嚟嘅時候,有啲真係可以失蹤一段時間電話又唔聽,亦有啲避開人流時間,只係開足會,落下區打個咭就交代咗有做嘢?如果咁都得真心覺得你地份工幾好做,就算我地厭惡你地都唔會俾人炒㗎啦~我地係出面打工仔嘅,肯去接手做你地嘅嘢,其實真係舒服過依家返工。

當初你地選嘅時候,個個都好想你地贏而去主動做義工,工餘、課餘時間唔係去玩樂或休息,而且哩個時勢有部分人要去抗爭,唔使抗爭就走嚟幫你地拉票同做背後嘅嘢,你會覺得自己攰,但對比下你地嘅義工團隊更攰,佢地真係無乜點休息,六月開始好多都帶住對黑眼圈嚟幫忙。而且你地窮,話眾籌個個都盡幫咁俾,就算唔同區都會出下棉力,有啲仲做埋送飯餵食,個個出心、出力及出錢為嘅唔係你地寫篇感謝文,都唔係慶工宴,善待義工係基本應該要有嘅態度,佢地無糧出㗎,大家最想係你地能夠「做好呢份工」。

以往一直都好似你地民主派政客打手咁幫你地講盡好說話,希望少啲刁民,多啲開民智。但我係無錢收,作為監察你地嘅市民,絕對有責任指責你地,亦都需要提醒市民去監察你地,唔好為政治立場而盲撐,到最後食返嘅後果都係我地。就算你地四年後會唔會參選都好,無論你地係區議員定係社區主任,希望你地係以努力去代表民主派,證明你地代表嘅立場係以實力取勝,而唔係成為政治暴發戶,成為新泛民。

 

 

作者:牛靈

牛靈
屯門開荒牛加盟成員

閱讀後覺得好,請多多讚好及分享~:)

其他熱門文章

歡迎讚好我們的facebook page,免費資訊源源送上。

文章資訊

ID: 205161
Date: 2020-03-29 20:58:09
Generated at: 2020-10-30 21:41:19
Permalink: https://www.vjmedia.com.hk/articles/2020/03/29/205161/「我會做好呢份工」