團結係好,但唔好同藍絲一樣,盲撐劣品,可以嗎?

政治 / 最新文章綜覽

 

有人好好心私下同我講篇《我會打好呢份工》驚會俾人批鬥我分化,我就話承受得起。如果你有睇返我之前擺上輔仁嘅文(因為想紅文唔紅人)就知,我一直都好錫班區議員同社區主任。雖然佢地唔係政治素人,個個都係細細個就因為個社會問題而走出嚟從政,但區議員佢地大多都係新手,無新手何來熟手呀,佢地肯走出嚟服務社區,各區有各色各樣刁民同社區問題,真係玩生命嘅工作嚟,咁有心嘅佢地無理由要迫走人地㗎?就算佢地做得唔夠好,方向有啲偏離,只要肯去做肯去改進我都會大大力俾like㗎~

曾經我講過黃店唔應該盲撐嘅題材,即係做好一間食店嘅本份製作優質嘅食品出嚟,你無表態我都會去支持你。嗱,我就無食藍店嘅,如果一間藍店能夠做到叫黃絲好難戒甩靜雞雞去食嘅,我會真心佩服佢。相反點解啲黃店除咗表態外唔好好做好啲嘢食,叫藍絲忍唔住扮黃嚟食,以良幣驅逐劣幣唔好咩?因為佢有肯攞錢出嚟買嘢扶助手足而唔理質素去盲撐嘅,在商言商條數佢自己計到嘅,可以開到咁多分店,根本食場社會運動嘅人血饅頭都俾佢賺唔少,但長遠嚟睇對市民唔會有好處,因為有表態、肯出錢就可以做唔好一間食店嘅本份,最後惡果就係將來淨返好多劣店係各區,要求佢煮返啲嘢好食啲都係批鬥?追求優質都係分化?講返區議員,如果佢地做到改善社區,令唔同政向嘅人發覺想你繼續做落去都唔要蛇齋餅嘅,咁唔係更好咩?

大家追求自由都係崇優嘅傾向,大陸係好嘅,中共善待人民嘅,就算係獨裁啲人都無咁大反應㗎,以前英國咪一樣假民主咁對香港,鬼佬大晒㗎,但人民安居樂業有發展吖嘛。就係大陸製係同劣質同造假掛勾,中共嘅獨裁係俾政府貪腐,睇住大陸人資訊封閉被洗腦洗到只有自己同利益,就係佢地腐敗我地先會追求民主自由,咁我帶風向崇優都係批鬥同分化?團結係可以,但唔好同藍絲一樣,因為立場而盲撐無良心又無品質嘅人和事,我地團結崇優好嘛?話俾人知,我地嘅立場係同優質掛勾,令對立嘅人忍唔住過檔享受優質,咁樣唔係更好咩?

 

 

作者:牛靈

牛靈
屯門開荒牛加盟成員

閱讀後覺得好,請多多讚好及分享~:)

其他熱門文章

歡迎讚好我們的facebook page,免費資訊源源送上。

文章資訊

ID: 205212
Date: 2020-04-02 04:44:27
Generated at: 2020-09-22 12:23:22
Permalink: https://www.vjmedia.com.hk/articles/2020/04/02/205212/團結係好,但唔好同藍絲一樣,盲撐劣品,可以嗎