結業隨想:黃圈的未來

 

 

大家好我係周教練,今日總算成功執左大埔分店。
首先多謝朋友關心,其實想發達就唔會開棋院,執左止蝕都係鬆一口氣。
多得林鄭幫我下定決定,睇來我可以正式轉型做KOL,King Of Loser。

黃色經濟圈發展至今好多問題浮現,我唔覺得意外,
因為做生意本來就係多意外,肯做野就係會遇意外。
有讀過經濟就知道,無咩規管既市場,商人利益必然係趨向零,賺到都係好彩。
根據統計全香港都係得一兩成既生意可以捱到五年。

我認為反送中運動其實已經比五年前做得成功好多,最重要就係肯去落定義。
「五大訴求」同「和勇不分」依兩個主調,就係抗爭者既公約數。
反之黃色經濟圈就發展得雜亂無章,我認為係因為大家都迷信反大台,
反到變成教條主義,而唔肯去面對經濟世界既常識。

我斗膽提出以下五個黃圈既發展方向,同意既可以分享,唔同意既歡迎討論,
黃圈仲係好新,我相信仲有好多野可以學習。

 

1.利益為本

其他人點睇黃圈我唔知,我搞類似性質既野已經有幾年,例如「小店撐佔領」之類。
起初係見到有小朋友被家長趕出門而輕生,先諗住收留下無家小朋友。
班小朋友飯都無得開時,班律師就籌到成億去打官司,
我就心諗不如留來做安家費啦,直接俾錢怕犯法,
咪想幫佢地搵工,然後整左個就業配對出來。
搞搞下連儂牆都有藍絲黑警,咪諗住拎自己鋪頭去貼文宣。

正所謂蝕本生意無人做,殺頭生意有人做,
搞黃圈唔係要害自己友,無理由要班老細孭哂條數,
咪盡量幫自己友宣傳下生意,幫襯多幾次一齊捱。
光復香港就係要解決深層矛盾,就係要企業多返少少社會責任,
但做生意唔可以靠光合作用,伙記唔出糧都要交租架。

 

2.唔好鬥黃

第一個黃色經濟圈最常犯既錯誤就係浪費資源去鬥黃。
假如要為黃圈劃一個定義,我認為只要幫到依一場反極權運動既,就係黃店。
老細肯上街做家長鋪頭貼滿文宣當然係黃店,
賺藍絲錢養手足既我認為都係黃店,打仗唔駛打開口牌架。
話之你淘寶又好賣俾大陸佬又好,總之第一件事就係要生存,執左笠就無仇報。

班黃衛兵講既野大家唔好信咁多,佢地無幾個真係搞開生意,唔知道市道有幾惡頂。
講笑咁講,開食店既,用東江水就自然唔係黃店。
用蒸餾水唔環保,都唔可以算黃店。
就算係自己收集雨水,人地都可以鬧你有錢唔幫手足。

 

3.唔好鬥平

鬥黃好大程度源於產業重覆,自己人都要爭來爭去,就好似泛民本土爭埋同一堆議席咁。
我地命名黃色經濟圈時,個圈唔係叫大家內鬥,係想大家搞一條資業鏈資金鏈出來呀。

依家通街都係食店,開多間同自己人爭食有咩謂?其實孫子火攻篇早就教哂路:

孫子曰:凡火攻有五:一曰火人,二曰火積,三曰火輜(讀知),四曰火庫,五曰火隊。

咩意思?孫子話:火攻有五種,一係燒敵軍,二係燒糧草,三係燒物資,四係燒倉庫,五係燒物流。
做生意都係一樣,既然黃食店已經咁多就唔好死衝,就應該嘗試係求變唔好攬炒。
鬧人食老麥吉野家時就唔該俾個替代品出來,廿幾蚊有野食邊間黃店做到?
話人玩大陸遊戲就唔該分享一下本地創作,其實香港都有唔少創作人架。
係有閑錢就諗諗黃色餐具、黃色食材、黃色地產、黃色保安、黃色公關(唔係果隻),
目標係形成一個無孔不入既經濟圈。

 

4.唔好鬥慘

雖然大家都知道煽情野最易傳出去,但係長貧難顧,其實汰弱留強都係一個健康狀態。
香港人無責任為人地既夢想埋單,無實力就應該考慮轉行。
我成日都話,難食即係反人類,衰到極唔該煮好碗飯。
我唔介意行多半個鐘搵野食,俾多廿蚊我當貼手足,但真係好介意咁耐都無進步。

香港人其實好善忘,依家好天唔斬埋落雨柴,真係衰過倒錢落海。
我唔希望黃商圈變成社福界,你睇班非牟利組織,香港出事時有幾多會出聲?
所以,黃色經濟圈應該係以有能力既中小企老板為主軸,
建立出一個有希望既社會階梯,唔好再用福利主義共產主義去執行啦。

 

5.敢於嘗試

唔好話咩圈,做生意就係要試要錯。
好多智者會走出來話依樣唔得果樣唔好,明明做保險既都敢搞創業講座。

「搞黃圈咪又係養地主?」
係架,所以我五年前已經講緊「網上營銷」「業務聯網」「共享空間」。
依個世界,資產係需要定義既,就算你買到塊地,
政府都可以限你用途焗你耕田,逼你請十個看更再加每個月維修,
然後禁埋你營業,講到尾就係權力。

「搞黃圈咪即係送頭俾政府?」
係架,對家係唔駛講道理架,咁係唔係打算等死?
我連上街都唔怕,唔犯法既怕得幾多?
依家係打緊仗,打仗就係要糧草,唔好諗住可以乞返來,要賺返來架。

 

依個世界想唔做錯,唯一既方法就係乜都唔做。
試完錯完,再努力諗辦法,人類就係咁樣進化。

多謝各位抽空睇完。

 

 

 

 

作者:周怡

閱讀後覺得好,請多多讚好及分享~:)

其他熱門文章

歡迎讚好我們的facebook page,免費資訊源源送上。

文章資訊

ID: 205255
Date: 2020-04-04 05:38:28
Generated at: 2020-10-29 01:21:34
Permalink: https://www.vjmedia.com.hk/articles/2020/04/04/205255/結業隨想:黃圈的未來