「同公司共渡時艱」?其實仲難聽過粗口

 

「疫情影響,下個月開始所有人都會減薪或者轉兼職,人事部會再同大家傾,希望大家可以同公司共渡時艱。」腦細Michael說。
「呢個情況會維持幾耐?」我說。
「視乎疫情而定,暫時決定係三個月,唔排除會再長啲。」Michael說。

好快人事部已經搵我傾計,要減三成人工,如果唔接受可以點?自己遞辭職信,再唔係公司出信比你,做多一個月就走,比一日時間你諗。呢個時勢真係好難搵工,我唔係無睇過jobsDB,但真係好少工,就算有都九成係豬頭骨,唯有應承住先,再騎牛搵馬,不過當然唔係個個都咁諗,所以有三份一嘅同事已經辭咗職,一嚟係公司比嘅offer太刻薄,二嚟大家都好清楚呢度只會要你同公司共患難,一定唔會同你共富貴,所以早走早著。

其實減薪係好聰明嘅決定,因為你應承咗,之後炒你都賠少好多,至於點解唔繼續放無薪假?因為個個放晒假,咪無人比腦細點嚟做嘢?點得呀,而家減咗你三成人工,人又走咗咁多,工作量加你幾倍,咁就抵到爛喇。其實如果係小生意,腦細有人情味,平時體恤員工,同你一齊捱又點話?可惜你係有錢到爆,而家仲要拎我哋呢啲小員工嘅血汗錢嚟填氹,我真係想問你個良心去咗邊?

講到咁慶,又唔辭職?衣食住行樣樣都係錢,口罩都唔平啦,裸辭係唔會即刻餓死,但係疫情唔知幾耐先完,我真係無乜信心短期內會搵到工,咪唯有忍住先。為咗令心理平衡啲,我諗住準時收工,效率降低慢慢做,但係腦細愈來愈癲,一日24時都搵,星期六日又搵,覆遲一陣就話做咩唔應,群組唔應就私底下再whatsapp,不斷比佢疲勞轟炸,搞到精神緊張兼失眠,你估間公司我有份㗎?我打份工咋!仲要比你減咗三成呀DLNM!成個人都好負面,日日都勁唔想番工,放工煲劇、打機、聽歌都減輕唔到個壓力。

「我真係好後悔應承咗減人工留喺度,做咁多嘢只係得fresh grad嘅人工,我覺得侮辱咗自己。」我說。
「而家呢個時勢,理性諗係應該留低,不過你真係要試下放咗工唔好再覆你腦細。」朋友阿花說。
「我唔敢,佢試過因為咁而炒人。」我說。
「嘩,方丈份人好小氣喎,但係你要諗下,你再覆佢,遲早精神崩潰咪又係辭職,而且你驚佢炒你咩?無晒人做嘢,邊個驚啲先?攬炒囉。」阿花說。
「咁又係,最多都係炒啫!」我說。

有朋友問點解無人告腦細無理解僱,好簡單,因為法律面前,窮人含_,佢一句屈你做錯嘢,又或者偷睇公司機密文件,你已經輸咗,無得拗,佢都比人告慣,唔會驚你。呢個時候唯有祝大家好運,可以搵到份工,全職兼職都好,頂住先啦,衷心希望疫情可以快啲好轉。

 

 

作者:小盛女

小盛女
80後中環打工妹,誓要追求work life balance的生活,並當一個幸福的食家。FB PAGE:https://www.facebook.com/littlevibrantgirl

閱讀後覺得好,請多多讚好及分享~:)

其他熱門文章

歡迎讚好我們的facebook page,免費資訊源源送上。

文章資訊

ID: 205395
Date: 2020-04-07 06:18:51
Generated at: 2020-08-13 11:09:24
Permalink: https://www.vjmedia.com.hk/articles/2020/04/07/205395/「同公司共渡時艱」?其實仲難聽過粗口