FF VII Remake 掂到幾多條中共嘅敏感帶?

 

 

同太細個冇玩過PS版FF VII嘅讀者講定先:以下含劇透。

回憶級大作 Final Fantasy VII Remake 已經出咗成個禮拜,小弟就玩得比較慢仲未爆機(不過我知呢度只係全個故事嘅序章),只係啱啱爬咗出第陸區貧民窟;不過,玩到一半嘅時候,發現有人摷咗份SE社嘅新聞稿出嚟,話 FF VII Remake 嘅發行地區唔包「中國本土」。咁我睇咗幾眼,份新聞稿仲寫住2020年3日3日發行,即係舊聞啦;不過點都好,無論佢依家喺中國區有冇,其實大陸人玩PS4,好多都係買大陸行貨然後改香港區(係呀又係靠香港先有機打)嚟玩,中國區有冇根本冇影響。

然而,呢單嘢畀人挖出嚟之後,大家都喺度講係咪因為過唔到中共審;老實講過唔到就梗嘅,而大陸人要轉香港區都係因為中國區特別少Game。講返FF VII ,其實佢嘅故事、角色設定、背景設定,基本上觸及咗一大堆中共嘅敏感帶,以下就以頭9章為限,數下到底隻Game可以揩親中共幾多下:

 

  1. 打差佬

Cloud一出場,第一批敵人係咩?咪就係差佬。唔止有一般嘅差佬,仲有揸盾嘅防暴警,而個盾亦都唔係咁易破嘅,但遊戲會引導你用火魔法對付佢……

 

  1. 炸發電廠

遊戲初段主角群就係反抗神羅公司統治嘅,主要係反對神羅持續開發魔晄能源嘅恐怖組織雪崩,而佢哋早期嘅兩大任務就係攻擊神羅嘅魔晄爐。呢幾年大陸因為發電廠或者其他公共設施引嚟嘅反抗都不時有出現……

 

  1. 反叛士兵身份

Cloud成日都要糾正其他人對佢嘅稱呼,要叫佢「前」神羅戰士(moto-Solider);而佢作為神羅嘅精兵,遊戲入面就不斷攻擊神羅,同叛兵冇分別;呢個當然又係解放軍大忌。

 

  1. 貧民窟環境

故事背景基本上就係神羅統治嘅米德加城,上層五光十色,整齊乾淨,但大部分人都係生活喺下層嘅貧民窟;貧民窟入面嘅人係點過神羅根本就唔理,治安要義警隊做,除非有事先會有神羅武裝落去。而垃圾同廢氣亦都係排落去嘅。前幾年北京要驅逐嘅低端人口,住嘅環境就應該好過佢哋嘅,但本質咪又係呢啲地方。而且,我個人認為中國大城市大部分內街嘅市容都係好第陸區貧民窟少少……

 

  1. 警察濫捕

故事入面,有個主線嘅細位係一班差佬要查雪崩,結果無啦啦走去捉Johnny仔去咗個僻靜嘅地方,搞到Cloud同Tifa要去救佢再趕佢出第柒區貧民窟。咁差佬拉佢去暗角當然就唔係請佢食煙仔攞料咁小事啦……

 

  1. 過度開發

FF VII嘅世界係喺一個因為魔晄被抽取令各地土地變得貧脊嘅環境,基本上你喺遊戲入面會見到嘅第一片自然植被要去到Aerith屋企門口先見到,而且由一開始Tifa見到Cloud有朵花時嘅反應嚟睇,大自然已經係離佢哋好遠嘅事物嚟,因為連真花都係稀有物囉。

 

  1. 出現「祈禱」字眼

Aerith加入之後,佢會自己帶住一粒祈禱魔晶石,而祈禱呢啲高度宗教性嘅行為,仲要係中共最忌嘅基督教同伊斯蘭教比較常用嘅講法,當然係中共容忍唔到;不過,Tifa嘅氣卦因為同氣功有關,可能對中共嚟講係OK?都唔一定,話唔定佢哋會將佢當法輪功……

 

  1. 就地掩埋災難現場

離開第伍區貧民窟之後,Aerith會帶你兜路,經過一條直接連接第柒區貧民窟嘅小徑去到第陸區貧民窟同第柒區貧民窟之間嘅大閘;然而,根據Aerith所講,呢條小徑其實係米德加上層跌落嚟之後嘅殘骸嚟,神羅嘅處理係就地封閉佢,至於有冇救人就不得而知,而且後面嘅劇情亦都暗示係神羅特登整冧嘅……點都好啦,仲唔明有咩咁敏感嘅,提你四隻中文字:溫州高鐵。

 

  1. 中國風格社區列為法外之地

第陸區貧民窟係一個特殊嘅地方,Aerith會話你知,呢度係當初興建米德加上層時形成嘅聚落,一開始就冇法律可言,但又冇辦法根除,所以就用圍牆圍起佢,入面你會見到充滿中國同日本混合風格嘅街區,但街區最華麗嘅地方始終都係中國風嘅。咁仲唔係影射唐人街係法外之地?仲唔係辱華?

 

  1. 性工作描寫

進入第陸區貧民窟之後,任務會要你去搵骨場老闆娘同夜總會頭牌牛郎幫手,過程之中亦會見到性工作嘅暗示同明示,甚至連女賓都有人招待,亦都暗示孤兒院老師可能有喺第陸區貧民窟做;咁根據周恩來總理咁講,中國係冇雞嘅……而且東莞都未好返啦~

 

  1. 同性戀暗示與乸型

蜜蜂之館頭頭牌牛郎 Aniyan 睇完古留根尾盃之後對 Cloud 產生興趣,決定幫佢變女裝混入古留根尾大宅入面,過程中要陪 Aniyan 跳舞,當中有唔少嘅同性戀暗示,而共產政權雖然自稱左派政府,偏偏對同性戀係相當唔友善;而且,之前幾年限韓令時順便將打扮中性甚至只係談吐溫柔嘅男藝人打成「乸型」,當做韓國化而加以批鬥,蜜蜂之館入面幫 Cloud 化粧嘅蜜蜂男孩,仲有健身館同 Cloud 鬥高級深蹲嘅大隻佬又會唔會畀限韓令打中呢?

 

  1. 黑幫描寫

上面都講過幾次古留根尾呢個名,佢係作為圍牆商店街嘅地下勢力之王而出現嘅,雖然個名係4個中文字、讀係用日文訓讀,甚至英文版係一個意大利文名 Don Corneo,但佢始終都係影射嘅一個中國黑幫,或者唐人街黑幫,首先喺紅社會係唔會有黑社會嘅,咁係抹黑中國;而且非法組織總部又係中國風格,辱華走唔甩。

 

以上都係我完頭9章過程之中見到,每一項都有機會過唔到中共官方審批要返廠大改嘅位嚟,當中有唔少係主線劇情嘅關鍵,改咗根本就唔係呢個故事,而且呢度似乎連遊戲故事嘅一半都未到……

所以呢,如果FF VII Remake真係要喺大陸正式上市,到底有幾大機會會ban呢?但係啦,如前所述,就算冇得賣佢哋大不了咪轉香港區玩囉(其實大陸版PS4係有鎖區,但你爆開佢Sony都唔多理,因為都係用嚟應該中國政府)。一路要香港人幫手先有機打,一路話要斬我哋,慣架啦。

 

P.S. 可能有人問點解1997年嘅FF VII似乎冇畀中國政府禁,其實係因為當時中國政府根本就冇管,同一年世嘉都喺中國賣過SS,但因為關稅問題賣得仲貴過出面,不過2000年中國政府就下令全國禁止遊戲機,即係中國人可以整遊戲機畀我哋玩但自己冇得玩,直至2014年先解禁;期間任天堂同Sony都曾經喺中國賣過神遊機(即係N64)、iQue(即係NDS)同PS2(但玩唔到中國文化部唔批嘅game),最後喺2014年之後因為上海自貿區要扮開明先可以開始賣XBOX ONE同PS4,2019年又有得賣Switch,但都係中國特別版,即係鎖區。

 

作者:薰華

薰華
塵世中一件無名廢青,除咗偏見同口水就冇嘢多。

閱讀後覺得好,請多多讚好及分享~:)

其他熱門文章

  • 【辦公室智慧】Learn how to not give a fuck, you will be fine. by 沒有句號
    大佬個 Sales Assistant – Ann 姐入 form claim 電話費,一次過 claim 一至八月,公司 policy 講明只可以 claim 最近兩個月嘅單,會計部都係跟 policy 做嘢啫,過咗期自然就彈㗎啦,所以 …
  • 去到英國做警花(自稱),見盡社會光怪陸離。 by 英國警花
    早排見d移民谷,個個都好擔心治安,人人好似會抬個夾萬日日出街等人打劫咁款,好似治安除左偷竊打劫外就無野要考慮。講到治安,你有冇諗過英國好多警力其實花了在照顧精神病人身上?…
  • 解鎖記 by 健吾
    在泰國演藝圈工作的朋友說,聽說泰國演員之間,都會看不起「拍BL走紅的演員」,會覺得他們沒有演技,用旁門左道上位。只是,在這個時代,如果他們仍看不穿《sex and the city》中,samantha 說的現世代走紅秘笈:「首先是gay,…
  • 【PR】LEGO Bricktober 與你《共闖遊「樂」園》 四款限量版機動遊戲歡度 10 月節慶嘉年華 by VJGamer
     2020 年不經不覺已渡過大半年,準備踏入 10 月之際, 意味著 LEGO® Bricktober「玩」樂 […]…
  • TikTok 其實好重要 by 毛言地
    每個社交媒體都會有唔同嘅低能及危險玩意,就好似Facebook早前都有出現藍鯨遊戲,不過「危險」始終唔係Facebook嘅主流,大家上Facebook嘅主因唔會係為咗睇藍鯨遊戲比咩任務你。但TikTok當中低能嘅影片基本上係主流,咩Skul…
  • 「作為一個女仔識做家務係一件好可恥的事」 by 瓔庭
    「作為一個女仔識做家務係一件好可恥的事,你要同我記住。」細細個便響阿媽度學識呢句說話的Pat一家很完美的實行了這個「理論」,佢係一個十指不沾陽春水的大小姐。家中清潔、煮飯什麼的都是Pat的老竇同阿哥去做。甚至學校有家政堂寧願肥佬都唔肯去做任…
歡迎讚好我們的facebook page,免費資訊源源送上。

文章資訊

ID: 205643
Date: 2020-04-17 21:32:50
Generated at: 2020-09-20 09:46:18
Permalink: https://www.vjmedia.com.hk/articles/2020/04/17/205643/ff-vii-remake-掂到幾多條中共嘅敏感帶?