石油消耗量龐大，價格跌只因……

有關石油價格嘅各種說法，簡直令人大開眼界，不過肯做功課嘅人，真係少到出奇。

其實資料來源有好多，大同小異，睇下你想用乜嘢角度嘅啫。

例如用 how dare you 角度，再生能源大L 晒之類，咁唔該你同非洲班朋友解釋一下，biofuel 例如木柴或者牛屎之類最好掉晒佢。

不過原來呢啲土產，仍然佔全球能源使用比例第四位，排位係石油/煤（不相上下） 、天然氣、土產。之後先至排到水力，之後先至係核能。

水力都已經只係土產嘅一條毛，其他就真係要好比心機先計得出嘞。

咁當然，你係唔鍾意石油嘅，隨便詆譭佢囉。最近石油跌價，期貨市場當然係炒家天下啦，尤其是五六月要交收嘅合同，負資產真係喊都無謂。不過睇怕如果牛屎有期貨，又唔知有冇得炒喎？

所謂再生能源好穩定，只不過絕大部份有政府補貼，用 off-take guarantee 嚟「鼓勵投資」而已。唔係真係有市有價。歐洲嘅電力，直頭係日夜時差對倒，煤電同水電日夜交替互補，以維持供應平衡。冬天季節調整就靠俄羅斯天然氣補充。所謂環保，真係靠充咋。污染唔係減少，只係「再分配」啫。

有做過 project finance 嘅行家，通常都好少出聲嘅，之所以冇得怪一般人亂Q 咁吠，除非想同佢哋鬥吠嘅啫。不過我都總算做過下，呢啲 how dare you 又大我唔倒嘅。其實只不過係拎咗其他能源嘅收入去補貼再生能源之嘛。賣白粉籌錢俾你去戒毒咁上下，叻叻豬呀。

油價戰爭今次係想要做死美國頁岩油，因為十年前開始，美國已經成為石油淨出口國；呢種形勢，不論俄羅斯或者沙地，都係頂心頂肺嘅。試下瘟疫繼續吖，又睇下邊啲能源會死先？

不過最後死嘅，結果應該都又係木柴同牛屎。

能源同口罩一樣，平時大家唔覺得緊要，到你真係冇嘅時候，又睇下你叻得去邊囉。

仲有，口罩中間層慮膜，其實係膠嚟，石油副產品呀。

作者：蕭少滔

香港中文大學工商管理學院本科生校友會會長、 (前) 香港中文大學學生會辯論學會首席顧問、香港中文大學辯論隊校友會主席、香港中文大學工商管理學院 (國際商業/法律) HEC School of Management Paris, (Financial Engineer, Geopolitics) 恒生商學書院 香港華仁書院

閱讀後覺得好，請多多讚好及分享～：）