中聯辦嘅存在,就係侵總統當中國官媒係「外國使團」嘅最大證據

1950年時的新華社大門——北京國會街26號(現宣武門西大街57號)

 

仲記唔記得,2月時侵總統將中共設喺美國嘅5間國有媒體列為「外國使團」嘅,當時北京仲抗議過一輪,之後仲將5間美國媒體(當中只有1間真係係美國政府擁有)嘅記者逐出中國,仲順便引起多一次「一國兩制死咗未」嘅問題,只係呢個問題未嚟得切答,美國已經唔得閒理住。然而,無論侵總統依家得唔得閒處理,佢對呢5間中共國有媒體嘅處理,理據可以話極之充份,呢啲媒體機構作為使團呢個身份係證據確鑿,毋容抵賴。點解?因為呢個世界有兩間中聯辦。

如果大家有返咁上下年紀,喺90年代就已經懂事,相信一定聽過新華社香港分社;如果年紀再大少少,更加會記得有個人叫許家屯,作為新華社香港分社嘅社長支持學運,最後走咗佬去美國,再畀人開除黨籍。

新華社作為區區一間通訊社,分社社長「站錯隊」之後竟然要直接揀走人?搞到咁大,原因係,1989年嘅新華社香港分社,並唔係「區區一間通訊社」,而係中共喺香港嘅代表(唔係代理人,係代表),佢嘅真正身份係中國共產黨港澳工作委員會書記,簡稱中共港澳工委。喺中共嘅語言入面,如果「工作」前面冇講咩「工作」,就係啲唔講得出口嘅嘢,包括而不限於收買、滲透、策反、統戰、造謠等等嘅內容,可以話幾乎就係間諜頭目咁(當然唔止嘅,統籌親共團體都係佢嘅職能嚟),一個中共駐香港,負責港澳「工作」嘅人政治鬥爭時企錯位,梗係要走啦。

到呢度,你又會問點解:做咩會由一個通訊社長嚟做港澳工委書記呢?其實就係源於1950年之後,當英國承認咗中華人民共和國,中華民國外交部嘅駐香港機構關閉之後,需要一個長駐香港嘅中國代表;正常嚟講,只要中共派個中國駐香港領事過嚟就得。但係,由於中共對外宣稱不承認包括《南京條約》、《北京條約》、《展拓香港界址專條》嘅所有不平等條約,認為喺香港設領事館即係承認條約將香港割讓咗,所以就唔願派領事,而本身喺《展拓香港界址專條》入面打算預留嚟做中國駐港領事機構所在地嘅九龍城寨,雖然直接就係中國領土,但英國亦唔想中共接管,亦都冇用到。

除咗中共唔想派領事,英國亦都唔畀中共喺香港成立組織,因為英國怕中共喺香港建立正規組織,會令香港出現港英政府之外嘅另一個權力中心。至於中共呢一邊,當時佢哋亦都有需要喺香港繼續「做工作」,其實係有需要喺香港設立正式機構嚟就近處理。結果,係冇結果嘅。

但係,喺中共未打贏內戰之前,其實就已經將黨嘅通訊社新華社開咗嚟香港,所以中共就利用呢個固有嘅機構,冇再成立新組織,直接修改佢嘅內部架構,將港澳工委「埋」咗入去呢間傳媒機構度。喺50年代,港澳工委喺香港同澳門策動起義,將中華民國嘅國家企業、資產、機構策反;六四之後,港澳工委分拆成香港工委同澳門工委,兩個工委嘅書記依然係新華社香港同澳門分社嘅社長做(不過1987年之前澳門冇新華社,就由港澳工委嘅分支機構就偽裝成南光公司嘅部門,南光公司嘅創辦人本身就係中共間諜,佢嘅後人依家都仲喺澳門做緊高官)。港澳工委一直扮到2000年,因為中共已經將香港同澳門都收返,港澳工委冇必要再扮非政府機構,於是佢哋就直接將兩個新華社改名做中聯辦,再另行註冊咗真係傳媒嘅新華社。

咁,係唔係話工委已經消失咗呢?唔係,我係話佢哋唔需要扮非政府機構之嘛,工委作為黨組織,由於《基本法》唔准港澳入面成立共產黨支部,所以工委唔可以明目張膽咁設立,但就可以偽裝成政府部門──呢個就係中共內部為咗以黨治國而設計嘅「一個機構兩個牌子」嘅做法,即係有一個黨組織,因為某啲原因(通常係聯絡外國相應政府部門)所以會有兩個名,所有人都有兩個頭銜,對內時自稱黨組織,對外就自稱政府部門。例如中共中央軍委係作為黨組織而存在嘅,但對外就自稱中國中央軍委。中共香港工委嘅情況都一樣,對內佢係中共中央香港工委,對外就係香港中聯辦,「一個機構兩個牌子」,駱惠寧係中聯辦主任嘅同時,亦都係中共中央香港工委嘅書記。

講到呢度,其實就明白晒點解侵總統絕對有理據將包括新華社在內嘅中國國有媒體當成使團要加以限制,因為雖然中共唔講,你難保新華社北美總分社個社長唔係中共中央北美工作委員會嘅書記喎(事實上早期港澳工委職務係不公開嘅)!

仲有,講到呢度大家應該都明白,依家指指點點香港事務嘅人,佢唔係以中聯辦嘅職權嚟出聲,而係以黨中央代表嘅身份做緊工作,佢又點會冇權點林鄭做嘢呢?

 

作者:薰華

薰華
塵世中一件無名廢青,除咗偏見同口水就冇嘢多。

閱讀後覺得好,請多多讚好及分享~:)

其他熱門文章

歡迎讚好我們的facebook page,免費資訊源源送上。

文章資訊

ID: 205741
Date: 2020-04-22 19:47:54
Generated at: 2020-10-31 15:19:02
Permalink: https://www.vjmedia.com.hk/articles/2020/04/22/205741/中聯辦嘅存在,就係侵總統當中國官媒係「外國使