總公司派嚟嗰幾百個人,原來唔係同我哋 share office 㗎咋?

 

 

係噉嘅,我而家喺一間跨國企業返工。呢度本身係獨立公司嚟嘅,後尾就俾另一間大企業收購咗,而家喺人哋旗下。總公司就越做越旺,個個都買佢怕嘅;我哋公司就越做越頹,不過爛船都有三斤釘,叫做有啲國際知名度,亦都算好揾得錢。

總公司以前撈開偏嘅,最近先至想洗心革面做返少少正當生意。行事作風就梗係同正常公司有啲出入啦。成個管理層都係總公司指派嘅,一個二個都係擦鞋仔。管理層以為自己學吓啲切口、暗語就可以討好上面,後尾仲學埋咩斬雞頭、燒黃紙。聽講而家做錯嘢隨時揾實Q嚟家法伺候,斬手指㗎。大家知道咗就梗係唔妥啦,我入職嗰陣係正當公司嚟𠺢嘛,你唔鍾意咪炒咗人囉,使唔使講打講殺先?總公司收購你返嚟,係想你幫手錢揾錢𠺢嘛。可惜而家總公司個阿頭就係鍾意人擦鞋,自己又好迷戀黑社會嘅江湖地位。結果好地地一門正行生意,變返做黑社會堂口仔噉嘅規模。

啲員工醒目仔醒目女嚟嘅,一早 feel 到勢色唔對,諗定晒後路。消極派就帶埋啲客另起爐灶,進取派就諗住揾個機會喺啲咩股東大會攞返夠股權,拆返間公司出嚟,最叻嗰批直頭周圍揾白武士 buy out 我哋,有幾個人直頭話不如燒咗個 office 做談判籌碼添喎。最被動嗰批,咪盡量保住自己個 branch,希望唔好黑社會化囉。

總公司百足咁多爪,自從收購咗我哋之後,不斷 send 啲其他分公司嘅員工過嚟,喺我哋寫字樓闢咗一層出嚟開工。嗰一層守衛森嚴,不過我哋都冇人會專登搭𨋢去。不過啲管理層好似成日上去嗰一層,我又聽過有啲員工組織可以入去參觀。

近日總公司出咗個通告,同大家講清楚原來呢幾百人呢,係總公司直屬㗎,係高級過晒我哋啲管理層,請佢哋返嚟就係要睇實我哋啲管理層有冇做嘢。

睇見呢份通告,坐我隔籬位個阿嬸發晒癲,喺度大嗌

「仆街喇,法治就死喇,玉皇大帝打到嚟,九龍新界避無可避呀!原來總公司派幾百個人嚟,唔係淨係玩 wechat 㗎。佢哋原來 head 住我哋老闆㗎。」

我又冇乜嘢呀。不過好驚訝點解佢哋好似發現新大陸噉。幾百人坐喺度,唔通真係淨係租個 co-working space,同你哋 share office 咩。好明顯係嚟睇住你哋公司有咩大小動作㗎啦,你間中見到 pantry 好生面口嗰啲人,咪就係嗰層啲人囉。

再講,如果你哋諗住反枱,又或者諗住出走,張通告關你叉事咩。管理層架構名義上重整啫。總公司向來都係噉樣嘅風格,之前冇人得閒寫返個公司結構表出嚟之嘛。

總之你哋見字飲水,唔好翹腳,得閒做多啲運動強身健體啦。

 

作者:擇言

擇言
每個禮拜有15分鐘嘅話歡迎你加入粵典編輯組。 words.hk計劃: http://words.hkFacebook專頁

閱讀後覺得好,請多多讚好及分享~:)

其他熱門文章

  • Client 問我點解自己係「仆街磁石」(上) by Professor Chan
    佢自從中學由女校畢業之後就無試過單身⋯⋯連一個月都無。每次同一個男仔分手,佢好快就會同另一個人一齊,佢話佢已經唔記得單身係咩感覺。…
  • Client 問我點解自己係「仆街磁石」(下) by Professor Chan
    依家,你重新行一次,你由出世到依家呢廿五年嘅經歷。好似一段Video咁,由過去,由開始播放,播放到依家呢一刻⋯⋯你可以由得唔同嘅片段喺你個腦入面播放,唔需要去控制佢,一路播一路同我講你見到咩。」我講。…
  • 香港人就係純樸到連日本人都可以喺度橫行霸道 by 白木乩
    就算係日本老母來到香港,無左其他日本人嘅目光,無左其他日本人文化監察,無左其他日本人鬧佢「打咩」、「巴加丫囉」、「渣媽」,出名桎梏出名壓抑嘅大和民族,都係會個性解放,係「個性」解放。…
  • 【遊戲新聞】NS糞級新作引起熱潮 《Final Sword》挑戰任記的可疑作品 by 五木
    以前超任、PS 年代因為資訊不流通,但係「買」Game 又極平嘅關係,所以成日玩到糞作。隨住資訊變得流通,今時 […]…
  • 由林美戀談起——藝人基督徒,係咪好好撈? by 殷琦
    無論16 年背夫偷食單野又好、現時與非基林作拍拖都好(雖然個人而言基與非基我是ok既...~)、「High Profile處理感情生活、信主後感情生活仍然混亂」是我覺得對你算中肯的評價。但這其實都超出一般教會的接納程度了吧?既然是藝人,言行…
  • 吃子的文化 by 健吾
    我有時會想,是不是真的有人會覺得「考得唔好唔緊要」,是一句安慰語。我考得好,所以我沒有辦法說什麼。對考得不好的同學,我也不能說「你考得不好不好意思」。更甚者,我有學生因為考得不好,進不了醫科而感覺遺憾終生,幸好他是一個鍥而不捨的人,讀完一個…
歡迎讚好我們的facebook page,免費資訊源源送上。

文章資訊

ID: 205715
Date: 2020-04-23 17:32:44
Generated at: 2020-07-08 21:45:14
Permalink: https://www.vjmedia.com.hk/articles/2020/04/23/205715/總公司派嚟嗰幾百個人,原來唔係同我哋-share-office-㗎咋