「腥些」的夢與想

 

夢想,我相信每個人都會有,正所謂做人無夢想,同條鹹魚有咩分別?但實唔實踐到就係另一回事,大把人都只係「夢」與「想」,未必做到。

話說我最初識「夢想」呢個詞,第一樣諗起想做嘅野係家庭主婦。事緣細個仲會睇TVB,啲劇講到做師奶係好嘆,唔洗出去返工搵錢,淨係湊下仔,買下餸煮個飯,同其他師奶講八婆野,咁就一日㗎喇,非常港豬嘅生活。所以為咗成為一個稱職嘅師奶,我係有去買餸學格價,比心機學煮飯同做家務,後來發現自己性格係唔啱做主婦(唔代表我無能力)。

到個人大啲,我就開始諗自己想做咩同啱做咩。我記得中一個陣,自己真係諗住做「腥些」,覺得作育英才好偉大,好有貢獻。之後又有諗過做記者,但發現人工太低,又好鬼辛苦。到高中接觸多左政治時,更諗過做議員添(好白痴嘅想法)。幾年前我考完DSE,苦惱緊讀咩個陣,成個腦只係諗住讀政政或者社會學(完全係打算乞食)。點知去到最後個天都係想我做「腥些」,誤打誤撞入咗教育學系,一讀就讀咗五年。其實呢五年嚟,我都問過自己好多次,到底係咪要做呢行?我份人係咪啱做「腥些」呢?會唔會有其他路可以揀?點知都喺狗改不了吃屎哈哈!因為我真喺太鍾意教小朋友。

諗諗都叫做有七年教育經驗(計埋後生Part-time補習),多謝曬啲學生咁鍾意我,啲家長咁信我,又叫做有少少口碑,長做長有。每一個學生都教咗我好多好多野,係佢地身上深深體會到教育係幾咁重要。可能份人算係幾有感染力,無乜架子,又幾講得笑同好玩,所以啲學生都好鍾意我,成日會同我傾計吹水講心事。每次同學生傾計會好開心,因為佢地諗野好單純直接(但我係好相信人性本惡),所以傾得好舒服。透過同佢地傾計可以了解佢地多啲,會知道用邊套教學方式比較好,以及教埋佢地做人嘅道理。

啲學生成日都同我分享大個想做啲咩,基本上都無學生講想做警察(有時佢地會講句死黑警,都唔知邊個教到咁),想做Youtuber、想做足球員、想做消防員、想做社工、想做歌手⋯⋯每個夢想背後,都有一個故事。但係好可惜香港係一個好壓逼嘅地方,有夢想又點?「最緊要就係讀好啲書,學多啲野,唔好發咁多夢,比心機搵錢啦!」通常呢個時候就會聽到呢句,然後你個少少幻想就會無埋。

阿仔、阿女,腥些嚟緊會再努力啲,希望你地係我嘅教導下,至少仲可以發下夢,追下夢。

 

 

作者:圓碌碌腥些

圓碌碌腥些
人如其名圓碌碌(其實我真係唔肥),正職是誤人子弟,兼職是廢青暴徒

閱讀後覺得好,請多多讚好及分享~:)

其他熱門文章

歡迎讚好我們的facebook page,免費資訊源源送上。

文章資訊

ID: 205761
Date: 2020-04-23 03:19:18
Generated at: 2020-08-13 03:06:30
Permalink: https://www.vjmedia.com.hk/articles/2020/04/23/205761/「腥些」的夢與想