漢十一年，呢年係漢朝建立嘅第6年，亦都係南越武帝趙佗離開中原嘅第18年[1]。呢一年，佢收到一個消息，話漢朝派咗個叫陸賈嘅人，要嚟番禺見自己。可能係因為離開中原太耐，或者係想畀個下馬威陸賈，當佢正式接見漢使嘅時候，趙佗紮起一個椎髻[2]，棟高隻腳坐喺度見佢。[3]
見到趙佗咁嘅表現，漢使陸賈當場劈頭第一句就話「你係中國人嚟架」，而且仲提埋人老豆老母，仲警告佢放棄文明與天子為敵，好快大難臨頭。[4]到底係咩搞到呢位長期喺漢高祖左右嘅金牌辯士要口出惡言呢？筆者愚見，可能陸賈係見到趙佗曬蕉先咁燥。[5]
首先，我哋要了解下秦漢時嘅人係點坐嘅先。今日我哋會坐喺櫈上面，其實係胡人帶嚟嘅文化嚟，早期華人嘅正式坐姿，就係今日日本人嘅「正坐」，係坐喺地上面嘅，而呢種坐法，冇練過嘅話我真係寧願唔坐。
櫈最初傳入時，稱為胡床。胡床喺漢代已經有，但並冇普及，漢魏以後，五胡亂華，胡人統治中原嘅時候，即使佢哋大部份都心慕華化，但係會坐到腳痺嘅坐姿佢哋可以話係敬謝不敏，胡床好快就喺隋唐大幅普及，不過似乎當時嘅人就搵咗日本人一個大笨，教咗佢哋正坐。
由 Anonymous artists of the Eastern Han period, late 2nd to early 3rd century AD – News.sina.com.cn
Zzldcn.cn, National Cultural Information Resources Sharing Project, Zhengzhou Branch
Bbs.photofans.cn
Synotrip.com, Henan Province
Tripadvisor.com, 公有領域, 連結
圖一：河南新密打虎亭漢墓出土壁畫顯示，漢代宴會上客人嘅坐姿
離咗少少題添，其實呢度都產生一個問題，今日我哋叫人坐地下，盤膝坐又好、伸直雙腳坐又好、棟高隻腳坐都好，都可以話係相當直觀嘅坐法，點解古人偏偏要正坐呢？咁就同當時嘅服裝有關喇。
喺明代或以前，華人嘅正式服裝都係闊袍大袖嘅，用今日嘅眼光嚟睇，即係人人都係著住條長裙咁。咁同著裙唔同嘅係，古人喺入面仲會著底衫褲，而條底褲亦唔係孖煙囪或者三角褲，而係一條長褲嚟（不過窮人因為冇咁長嘅袍著，反而會有條類似三角褲嘅犢鼻褌）。
去到呢度都仲未係問題嚟，棟高隻腳坐咪棟高囉，頂多都係粗魯啲啫，點解一定要正坐呢？又關趙佗條巨龍咩事呢？
圖二：南朝時描繪竹林七賢嘅壁畫，當中劉伶、向秀、嵇康、阮籍、山濤、王戎都係棟高隻腳嘅「箕踞而坐」，劉伶仲露出條白雪雪嘅小腿添
其實，個問題就係，自有史以嚟到漢朝初年嘅褲，並唔係我哋今日見到嘅褲。對比起後世嘅褲，當時嘅褲（漢代未有褲字，稱為袴）少咗一個重要部份：褲浪。點解當時嘅袴冇褲浪已經不可考，有啲講法就係話最初連褲都冇，後嚟為咗禦寒（遮下膝頭咁）先有人著褲，所以其實又叫脛衣；筆者就認為，可能係因為古人見已經有件長袍著喺出面，為咗方便去廁所，所以一開始發明袴時就冇諗過要有褲浪，遮到膝頭就夠。[6]至於褲浪係幾時先有？大概係越嚟越多人騎馬，條袴冇浪分分鐘壓爆春袋，所以就參考窮人嘅犢鼻褌，幫啲袴加返個褲浪，但呢件事就未必係喺漢初就普及囉，就算民間普及，要影響正裝都仲要啲時間。[7]至於犢鼻褌係點嘅呢？大概就係日本嘅兜襠布咁，而日文入面，兜襠布又真係寫成褌。
圖三：20世紀初著褌嘅日本漁民，佢哋嘅褌類似漢代平民著嘅犢鼻褌
所以，我哋返到趙佗接見陸賈嘅場景。趙佗佢著住條冇褲浪嘅袴，棟高隻腳嚟坐咁見陸賈，趙佗作為主人，殿上佢嘅坐席本身就可能高一級，而陸賈作為漢使，亦已經正坐喺堂下。[8]加埋當時佢哋所在嘅番禺城[9]天氣非常炎熱，長期喺南越居住嘅趙佗亦可能著得少布過喺中原時，下體若隱若現咁。
咁陸賈喺堂下行完禮之後，抬頭一望就係趙佗嘅南越巨龍，於是就借題發揮，話佢係中國人嚟，對漢天子嘅使者曬蕉即係唔妥漢朝啫，就係咁陸賈就成功咁大到趙佗，趙佗當場坐返好之餘，亦聽佢話接受漢朝賜予嘅南越王印綬，埋下幾十年之後漢朝吞併南越嘅伏筆。[10][11]
[1]《史記·南越列傳》入面話「與越雜處十三歲」，睇文理應該係指啲「徙民」與越雜處，《史記集解》入面徐廣幫大家計咗條數，話其實秦統一至秦二世元年係13年，而統一之後8年（秦始皇三十三年）秦先兼併越地。徐廣係以最終平定越地作為與越雜處嘅起點，如果照佢嘅計法，直至陸賈南下為上，趙佗應該係與越雜處咗至少18年。
[2]《史記·酈生陸賈列傳》原文為「魋結」，後嚟《漢書》鈔錄呢一部份放喺〈酈陸朱劉叔孫傳〉入面，而喺漢朝末年嘅服虔就注解話呢種髮形係當時士兵所紮嘅椎頭髻。《史記》喺呢度本身係想表達趙佗面對漢使態度無禮，估計呢種髻喺當時並唔係君王應該喺正式場合紮嘅髻。
[3]《史記·酈生陸賈列傳》原文為「箕倨」，同樣係後嚟《漢書》鈔錄咗呢一部份，而注《漢書》嘅顏師古又詳細解釋咗：「伸其兩脚而坐」。
[4]《史記·酈生陸賈列傳》原文為：「足下中國人，親戚昆弟墳在真定。今足下反天性，弃冠帶，欲以區區之越與天子抗衡為敵國，禍且及身矣。」
[5]當然啦，作為金牌辯士點會真係扯火呢？其實就係借趙佗曬蕉嚟打開話題啫。事實上陸賈嘅任務係為漢朝同南越建立良好嘅外交關係，因為啱啱建立嘅漢朝真係冇能力對付南越。
[6]事實上係點真係冇人知，因為甲骨文個象形嘅「坐」字就係一個人正坐嘅樣，商代文物之中亦都發現過正坐嘅玉人。到底佢哋係冇褲著先咁坐？定係條褲冇浪先咁坐？不過無論如何，唔正坐會曬蕉係一定嘅。
[7]另一種可能性係，褲浪呢個諗法喺漢朝建立之前100年，趙武靈王胡服騎射開始就已經傳入咗軍隊，之後因為漢朝建立騎兵部隊嚟打匈奴，所以進一步喺中原普及。
[8]古代唔好話接見來使，接見自己嘅超低級臣子時，大家都係坐嘅，唔會話上位者有得坐而下位者要企晒喺度。
[9]1990年代中期，廣州市中心嘅兒童公園地底發現一座地下花園，經考古研究發現就係南越國嘅御苑嚟，然後亦發現附近嘅街區地底估計埋住咗成座南越國都，仲順便發現埋五代時期第二南越國（即係南漢，立國之初國號為越，後嚟先改成漢）嘅宮殿地板。不過因為附近地面其實都有好多民國古蹟、政府部門、民居、商業街，所以亦都冇再掘落去，而掘咗出嚟嘅部份就設立咗南越王宮博物館。
[10]另外，其實趙佗對陸賈都係有一定好感嘅，因為佢自己都話喺南越冇咩人可以傾到偈，雖然有大量秦兵陪佢嚟到南方，但好似陸賈咁有料嘅人真係冇。
[11]後嚟，南越文王在位時漢朝就不時請佢去中原，南越文王推無可推，就送咗太子嬰齊去長安充宿衞；後嚟太子嬰齊成為南越明王，以喺長安生嘅細仔趙興為太子，引嚟越人不滿，明王一死就引爆內亂，越人殺死趙興，改立明王同越女所生嘅大仔趙建德為王，但就因而同漢朝關係決裂，漢朝亦已經有能力發兵南下，導致南越國滅亡。
【遊戲新聞】Bug 助你速通拿S+ 《生化危機 4 重製版》狙擊槍土遁大法輕鬆越過鎖上的門
當女朋友仲鹹濕過自己
Pokémon朱/紫！發掘古代，超越未來！訓練員進入開放世界！
女神新標準出爐！毒燃唔可以唔識嘅5位隱藏版女神MULCE
我在孤獨中找到了快樂
真正愛對方，唔好晚晚傾電話
2020年4月28日
