我談黃色消費圈——怎樣做個好的「黃客」？

大家好我係周教練，之前寫左篇黃圈既隨想之前寫左篇黃圈既隨想，講以黃商角度理解黃圈既方向。 簡單總結，就係：

1.利益為本（回歸現實，生存優先）
2.唔好鬥黃（互相尊重，海納百川）
3.唔好鬥平（重視質素，多元發展）
4.唔好鬥慘（逢危需棄，捨小就大）
5.敢於嘗試（百折不撓，笑罵由人）

今次，想以整個黃商圈角度去講，我心目中既好客戶。

1.忍耐律己

坦白講，香港人只係剛剛從資訊穴居時代，剛剛步入資訊開荒。因為資訊泛濫，大部份人分享資訊真係無經過大腦。要記住，盡量只分享自己有能力判斷真偽既資料，因為對家已經大量安插人手去搞破壞。內容農場既文一定唔好信，傳統媒體都只能信一半，有懷疑寧願唔好分享。

商譽建立唔易，人地十年道行可能由一個西客就可以打沉，更唔好提有大量分身既中共網軍。如果我見朋友分享可疑內容時，我會主動詢問來源，建議佢睇定再發。我知道做網路判客係好爽，但唔該大家唔好鬧左當做左，害左當幫左。所以每次真係忍唔住鬧人時，我會提自己分享返三間黃店。

2.友善建議

唔好諗住班老細真係咁醒，好多時真係需要俾意見佢地既，尤其係真金白銀消費完之後。不過崩口人忌崩口碗，無咩特別都係私下講啦。要注意說話技巧，有時世界就係咁唔講道理，一家人就係要講關懷。

當然，每門生意都有自己既難處，所以建議俾完就算啦，執唔執行都唔好太深究。寫完補句加油，已經係滿分。

3.幫手宣傳

黃圈其中一門利器，就係可以壓縮資訊成本，更易搵到供應商同客戶。有心幫手宣傳既朋友，唔好剩係分享店名，最好加幾句感想，加幾句評語，影張靚相，然後係社交媒體標註返間鋪頭。

商業社會，其實最難既就係立信，你作為客戶幫襯一次，係朋友圈既影響力就遠大於鱔稿。我個人對於黃藍地圖既亂象其實非常痛心，可能大家都諗住取代Openrice搞大茶飯，所以旨意果幾班人共享資源真係好難。尤其係「無大台」已經教條化既今日，勉強一齊亦無幸福。講到尾，黃色經濟圈，始終都係經濟圈，競爭之下慢慢就會有人跑出。

4.公正評價

大家都知香港人係好有愛心好浪漫，但做人始終要有良心，唔好無野搵野來讚。以餐飲為例，假如朋友訓身推薦既招牌菜都只係一般水平，咁我就肯定唔會去試其他野。作為人類，我亦希望客人係因為我既質素誠信而光顧，而唔係施捨。

要記住黃圈壯大就係要吸納中立同淺藍，共通語言就係自私，所以宣傳時唔駛次次都賣黃，真係可以花心思讚其他野。亦唔好間間推介都係黃店，可以偶爾插幾間中立又真係好食既入去魚目混珠，利用黃客去令鋪頭轉黃。

5.精明消費

假如因為支持黃圈而多左無謂既浪費，我認為係得不償失既。真係窮時，可以一得閑就屈藍絲去黃店請食飯，幫藍絲同事買飯時就故意專揀黃店。總之，打仗就係要物盡其用。

雖說收錢係永唔嫌多，但我仍希望大家既錢可以用係更合理地方。因為整個黃圈實在良莠不齊，好多人根本就唔係做生意既材料。以目前市況，我地要忍痛割肉，將五年倒閉率由一般生意既八成減至六成左右。所以，唔好諗住人地告急就幫襯，應該查一查，人地急左幾耐，有無機會生還。當然有金礦既人例外，歡迎睇完文直接打賞俾我。

黃營既政治論述，大部份由學者所寫，針對基層同中產專業。但其實作為商業社會，黃商既聲音一直被各政黨把持。假如黃圈真係發展得好，有無人敢做黃圈既李嘉誠李兆基，去動搖整個社會生態？係我心目中既構圖，將來黃絲既信仰光譜應該會變成泛民、本土、黃商、網紅四條腿。光復香港，先要光復自己，解除思想枷鎖，想像一下勝利藍圖，再按步就班去取得勝利。假如光復後既香港只係換個皇帝，樓照捱，官照廢，咁不如移民實際。

作為八面玲瓏世界仔，逼不得已要自己寫文，其實我都誠惶誠恐，怕得罪太多人。由一開始，我已經會評價黃絲為擅長反抗而怯於成功，戰略現實而戰術浪漫。相傳曹操評袁紹係「色厲膽薄，好謀無斷，幹大事而惜身，見小利而忘命。」，差不多可以用哂係黃絲身上。係難聽，但基於歷史責任，文人自傲，亦不能不寫。望諸君有則改之，無則加勉。

作者：周怡

閱讀後覺得好，請多多讚好及分享～：）