耶穌係會發脾氣發火反枱

文教 / 最新文章綜覽

 

我其實幾常去推翻框架,尤其係依家嘅社會,就算無社運依家個世界都因為舊框架叫人透不過氣。之前有係道推翻過「孝順父母」框架,唔好講父母,「尊敬長輩」都係差唔多一樣壓榨年輕人嘅框架嚟。

今次講下耶穌然後推翻一啲框架,本身我係一個偏向信基督教嘅人,由小學至中學都係基督教學校,又接觸到信徒帶我返教會,教會都返過好幾間。如果我講教會係一個邪教嘅地方,應該好多人會覺得我好痴線。香港神的教會、浸信會、神召會等等,就基督教已經有好多唔同嘅教派,而佢地就好似黃絲咁有個大台俾班信徒去捧,每個教派都有規條嘅差異,唔去信守就活像罪人,而耶撚就好易就咁產生,佢地推出嚟嘅規條唔夠貼地,無去彈性地面對人性,唔係好多個了解聖經,純粹跟足教會制約教條去做人,認為咁就可以上天堂或心靈得到救贖。即係基督教唔係邪教,只係教會嘅教條令個團體係邪教,其實有不少人會受不了啲離地教條而離開教會,而佢地唔係唔信教,仲會了解聖經中嘅旨意。

拉開咁講另一樣嘢我再返返嚟講耶穌,今日有人同我講某女同事個性好好,一直以嚟無講過粗口。喂呀~我真係唔會信人一直無講過一句粗口㗎,幾好脾氣嘅人係哩個雜亂嘅世界都無可能唔會發火,努力壓制自己嘅人遇到激到自己情緒崩壞嘅時候,就算任何時候去審視自己嘅人,都會有唔想自控嘅一刻,面對唔想失守嘅自設形象及個性下,選擇係無人情況或特定對象去講一兩句粗口,俾自己釋放情緒係一件普通嘅事,你同我講有人一直唔講粗口,仲要哩道係香港,香港嘅粗口係幾咁千變萬化而流行仲容易用上嘅嘢,隨口一出一句「妖」、「仆街」就無咁粗俗而又可以發洩一下,而且偷偷咁講又無人知,係香港真係會有人一直無講過粗口咩?唔好咁離地咁去高估人性啦~

又講返耶穌,我真係好鍾意佢,一個神可以如此貼地咁有人性。佢會發脾氣,係風浪後嘅船上鬧班門徒唔信任佢,一早叫佢地係船上面對咩都唔會有事,但之後班門徒又驚到亂晒;肚餓時候面對無果實嘅無花果樹,佢會詛咒棵樹以後不結果然後棵樹就咁死咗;啲人係神殿買賣搞到亂晒,佢就發火反枱、打爛錢箱又趕走啲人,話哩個係俾人禱告嘅地方;係佢明知就嚟受死前,會軟弱咁救神幫佢脫難,但又同神講跟返神原有旨意唔好理佢自己嘅軟弱救求;又預知Peter因為軟弱會三次雞啼前三次唔認佢而話俾Peter知。其實成本聖經係話俾你知哩個神係有幾咁貼地而有人性,無話亂咁大愛乜都接受同壓抑。

我講咁多耶穌都係想講,好多舊有壓抑道德框架真係好離地,乜鬼嘢有人乖巧到唔講粗口。關於精神健康更加要去接受自己嘅情緒,唔開心、會發脾氣係我地天生個腦俾我地舒緩嘅反應,就算因為有情緒病即個腦有零件壞咗而比普通大眾容易失控,其實都唔代表你唔正常,接受自己唔係普通大眾都係一個常人,只是不普通嘅常人。另外,接受每人都有暗黑面,真係無可能有人100%純潔,一嚟可以保護自己防止自己接受唔到而受傷害,就好似接受靚女都會放屁同痾屎一樣(喂!),二嚟了解人性非本善你先可以真正從心去善良接受人,接受自己及別人有暗黑面係好事嚟㗎~

 

 

作者:紫玥

閱讀後覺得好,請多多讚好及分享~:)

其他熱門文章

歡迎讚好我們的facebook page,免費資訊源源送上。

文章資訊

ID: 206159
Date: 2020-05-07 03:22:23
Generated at: 2022-09-30 06:50:57
Permalink: https://www.vjmedia.com.hk/articles/2020/05/07/206159/耶穌係會發脾氣發火反枱