再見偶像，然後喺呢個艱苦嘅時代好好活着

無幾耐之前，周杰倫嘅自家製綜藝《周遊記》喺Netflix上架，卡士都幾勁，有林俊傑，有蕭敬騰。我去問一個由出道就開始迷周杰倫嘅人佢會唔會睇，結果答案係「依家嘅周杰倫，不了thz！」我知道，總有人會覺得無問題，如果唔係《周遊記》都唔會曾經上過香港top10。但亦都有人會覺得好大問題，因為佢已經唔係嗰個周杰倫，已經庸俗到同一個普通歌手冇分別。

我唔會怨恨嗰啲離我哋而去嘅偶像，我只係怨恨時間不斷向前走，走到一個地步，我哋唔再熟悉，寧願自己冇鍾意過佢哋。所以，我覺得羅志祥呢壇嘢，某程度都係一種告別，告別嗰個仲接受到和稀泥嘅美好時代。

21世紀嘅頭10年，港台偶像輩出，羅志祥亦都乘住呢段時間彈起爆紅。老實講，呢件事鬧得咁大，其實都係佢嘅本事，證明佢喺港台中嘅知名度係勁，曾經或者依家都仲有好多人鍾意或者憎佢。而呢個亦係佢點解可以得到中共垂青，招攬加入統戰一份子嘅原因。

其實，以前我都幾鍾意羅志祥。佢搞笑，歌藝講唔上好好，但啲歌夠大路易入口，而且髮型講究，加上自設孝順仔人設，對十幾歲嘅細路嚟講，簡直就係一流模仿對象。就算到依家，我都唔覺得迷過佢係一件咩羞恥嘅事。

當然時間過去，大家包括我對佢嘅觀感都越嚟越唔同，總體都係越嚟越差。睇住每一個自己細個嘅偶像墮落，雖然有一種落井下石嘅快感，但呢種快感伴隨嘅都係無奈，都係一種無辦法宣諸於口嘅痛楚。我哋會掛住嗰個喺娛百同康熙入面談笑風生嘅小豬，偶爾會模仿下其他人，變下魔術撩妹。雖然佢會對係人都知真相嘅緋聞扮晒嘢唔肯認，但遠未到令人討厭。

我哋會討厭嗰個同大陸走近嘅羅志祥，雖然佢做嘅嘢同以前一樣，但佢唔再親切。尤其佢縱橫大陸各個唔同嘅綜藝節目、尤其佢話「不用分那麼細，大家都是中國人」，又尤其佢選擇同一個整容嘅大陸女人一齊。雖然人各有志，有錢做乜唔搵，加上囡嘅嘢都係個人口味，但距離已經出現。

就承認時代已經唔同咗，走到2020年，港台青年滿滿都係亡國同亡港感，好多人食餐飯都要睇政治立場，飲杯珍珠奶茶都要睇間公司有冇曾經向中共獻媚或者跪低過，更何妨追過嘅偶像呢？

21世紀嘅頭10年，中共對港同對台政策相對溫和，加上有北京奧運嘅大前題，我等大中華膠都期待大一統到來，所以當時創造一個所謂「華語娛樂圈」嘅嘢，不問政治，不問地區，大家都係為咗令華語電影同音樂更好。SHE2007年有首歌叫《中國話》，基本上就喺嗰個時代最好嘅寫照，大家都唔執着「政治正確」，大家都接受到和稀泥。如果放喺呢個時代，繼續用呢個歌名肯定出唔到街，而且唱片公司同歌手本身都會被網民狂插，就已經證明時代唔同咗。

唔止我哋唔同咗，其實中國同成個國家機器都唔同咗，佢哋都唔會接受和稀泥，表忠賣乖都係基本。簡單嚟講係你討好嘅對象唔再係我哋，係佢哋。你覺得一樣，但其實已經唔同，但其實唔係你嘅錯，只係我哋唔可以當咩事都冇發生過。

又再講，當周杰倫、羅志祥、陳奕迅呢代過咗去，港台娛樂工業仲有咩拎得出檯面，大家都心中有數，中共都心中有數，佢哋亦只係搾取緊呢代人最後嘅利用嘅價值，因為下一代就係佢哋嘅天下。鋪天蓋地選秀節目，舊啲嘅易烊千壐，吳亦凡、新啲嘅就蔡徐坤都上緊嚟，唔求同Kpop爭一日長短，總之統治成個大中華圈子就已經徹底成功。你唔buy？人哋目標都唔係你，搵啲細你10年，甚至20嘅細路傾下計問下囉。

我相信唔止我，好多80，90後嘅港台青年都時不時回味嗰個美好嘅00時代。不過，我哋已經活喺禮拜六、日出街都會被警察恐嚇，都有機會頭破血流，甚至會無喇喇死咗都無可疑無人知嘅時代。我哋只好同偶像講聲再見，然後喺呢個艱苦嘅時代好好活着，食飽着暖，唔好死。

作者：阿享

一個戒緊牛肉，但打邊爐仍然會忍唔住既耶青。

閱讀後覺得好，請多多讚好及分享～：）