【新疆鬼故】（四）Over their dead bodies

時下流行講 dead body，咁紀曉嵐嘅新疆見聞又有冇出現過同 dead body 有關嘅故事呢？《灤陽消夏錄》[1]嘅第六卷就有兩則 dead body 故事放埋一齊，叫做喺鬼故同奇聞之間，我哋嚟一齊睇下：

烏魯木齊八蜡祠[2]嘅道士，已經八十幾歲。有一晚，佢用七千文錢鋪平，瞓喺上面就死咗，大家就話不如用呢啲錢嚟葬咗佢啦。入夜之後，道士報夢畀工房吏鄔玉麟，佢話：「我生前負責管理官立嘅廟宇，殮葬費應該係由官方出。呢七千文錢係我辛苦積蓄得嚟，可唔可以放入我嘅棺材入面，下世我自己返嚟拎？」鄔玉麟覺得道士都幾慘，就順佢意。安葬道士之後，鄔玉麟長嘆一聲，佢話：「棺材裝咁多錢，然後埋喺曠野，即係帶住寶物落葬，實會被人盜墓啦。」我就話：「當初話用佢啲錢嚟葬佢，佢都猛到嚟報夢啦。如果真係盜佢墓，佢變埋厲鬼都似。邊個會為嗰七千錢嚟同隻鬼鬥？」在場嘅人聽完都笑咗出嚟。不過，最後都係鄔玉麟講得啱。[3]

呢個故事入面，雖然紀曉嵐最後表示八蜡祠道士個墓真係畀人盜咗，但道士自己係唔係拎唔返啲錢呢？我又覺得未必嘅。假設真係有呢啲神異之事，個道士係個可以知道自己死期嘅人，咁個盜墓賊嘅出現又會唔會係佢一早知嘅呢？而佢會唔會又知道盜墓賊拎走咗呢七千錢之後，最後會輾轉落返去道士嘅轉世度呢？又甚至乎，呢個盜墓賊就係佢下一世嘅老豆？其實真係冇人知。

第一個 dead body 故事好似冇咩鬼，得鄔玉麟同紀曉嵐傾嘢，好似冇咩力咁，咁不如睇下呢個：

乾隆三十六年春季，我由烏魯木齊出發返去中原[4]，行到巴里坤[5]，老僕咸甯喺馬鞍上面瞓著咗，咁啱又遇到大霧，咁就同大家失散咗，之後仲因為跟錯咗野馬嘅蹄印入咗山，蕩失咗路出唔返嚟。正當咸甯心諗佢死梗嘅時候，佢發現山崖下面有條死屍，睇落係走甩咗嘅流放犯人嚟，不過就喺呢度凍死咗。咸甯發現屍體嘅袋入面有啲乾糧，於是就拎咗嚟充飢。之後佢又拜下呢位死者，話：「我會葬咗你，你教我匹馬點行啦。」跟住就將屍體搬去一個岩穴度，再執啲亂石埋實佢，然後就上返馬，由得匹馬自己行。過咗十幾日，咸甯發現到一條落山嘅路，一落山，就已經係哈密[6]囉。哈密遊擊[7]徐君係喺烏魯木齊時嘅舊相識，所以咸甯就去佢嘅官署度暫住等我。再過咗兩日我先嚟到哈密，主僕重逢恍如隔世。到底係隻鬼有靈帶佢落山？定係有神明心存善念保祐佢走得返出嚟？定係只係好彩？徐君就話佢就寧願話係鬼神有靈，等啲人見到荒野棄屍都會幫手收葬都好。[8]

至於呢個故事，我就比起紀曉嵐諗多一個問題：會唔會係鬼魂特登引咸甯入山，想搵咸甯幫佢收殮遺骸呢？但正如徐遊擊咁講，見到路邊有 dead body 時，幫呢個不幸嘅死者收殮都係件善事嚟。不過時值2020年，最好都係 call 黑箱車啦。

[1]《閱微草堂筆記》最初其實係五部紀曉嵐嘅筆記嚟，係喺乾隆五十年至嘉慶五年（1785年至1800年）之間寫嘅。呢五部筆記分別係《灤陽消夏錄》、《如是我聞》、《槐西雜志》、《姑妄聽之》、《灤陽續錄》，前四部喺成書之後就即時出版，到《灤陽續錄》成書之後，再由門人盛時彥結成總集《閱微草堂筆記》出版，日後亦以《閱微草堂筆記》之名行於世。

[2]八蜡為周代就有嘅八種農神，古代周圍都有八蜡祠、八蜡廟，唔止極之西北嘅烏魯木齊有，極之東南嘅台灣都有。

[3]原文：

烏魯木齊八蜡祠道士，年八十餘。一夕以錢七千布薦下臥其上而死，眾議以是錢營塟。夜見夢於工房吏鄔玉麟曰：「我守官廟，棺應官給錢。我辛苦所積，乞納棺中，俟來生我自取。」玉麟憫而從之。葬訖，太息曰：「以錢貯棺，埋於曠野，是以璠璵歛也，必暴骨。」余曰：「以錢買棺，尚能見夢。發棺攘奪，其為厲必矣。誰能為七千錢，以性命與鬼爭？必無恙。」眾者囅然。然玉麟正論也。

[4]根據《清史稿·高宗本紀》同《清史稿·紀昀列傳》，皇帝係喺乾隆三十六年十月七日赦免紀曉嵐嘅，而赦免之前皇帝首先已經下令畀佢東歸，到紀曉嵐接近北京一帶時，皇帝就咁啱去咗熱河，所以紀曉嵐就喺密雲等皇帝回程，皇帝見到佢就要佢即席賦詩，再借「寫得好」嚟畀返個翰林院編修佢做；所以計返路程，春季由烏魯木齊出發就差唔多架喇。

[5]巴里坤今屬新疆哈密市，由烏魯木齊出發東行，沿博格達山北麓行嘅路線就會經過巴里坤。巴里坤得名於境內巴里坤湖，另有漢名「宜禾」。雖然今日巴里坤受哈密管轄，清乾隆時反而係巴里坤管轄哈密（紀曉嵐離開新疆之後冇幾耐，巴里坤升格為鎮西府，轄宜禾縣、哈密廳等地）。

[6]哈密即今新疆哈密市，當時為哈密廳，當地又有世襲嘅哈密回王，一直傳承到民國三十八年。哈密就係出產哈密瓜嗰度。

[7]遊擊，或作游擊，明清軍官名，清軍於綠營有遊擊官，高一級為參將、低一級為都司。

[8]原文：

辛卯春余自烏魯木齊歸，至巴里坤，老僕咸甯據鞍睡。大霧中，與眾相失，誤循野馬蹄迹，入亂山中，迷不得出。自分必死，偶見崖下伏尸，蓋流人逃竄凍死者。背束布橐有餱糧，甯藉以療飢。因拜祝曰：「我埋君骨，君有靈其導我馬行。」乃移尸巖竇中，運亂石堅窒。惘惘然信馬行，越十餘日，忽得路出山，則哈密境矣。哈密遊擊徐君在烏魯木齊舊相識，因投其署以待余。余遲兩日始至，相見如隔世。此不知鬼果有靈導之以出？或神以一念之善佑之使出？抑偶然僥倖而得出？徐君曰吾甯歸功於鬼神，為掩胔埋骼者勸也。

作者：薰華

塵世中一件無名廢青，除咗偏見同口水就冇嘢多。

閱讀後覺得好，請多多讚好及分享～：）