今時今日去日本玩，無論城市定鄉下，都有好多稻荷神社，而稻荷神就係日本嘅狐神；日本有狐神作為豐收神，喺中國，未有共產黨之前亦有好多狐仙故事流傳，除咗紀曉嵐《閱微草堂筆記》有，清代嘅其他筆記，例如蒲松齡《聊齋誌異》、袁枚《子不語》都有提及，而且呢啲狐仙唔止喺漢人為主嘅本部十八省出沒，連新疆都有架。不過今次我哋就唔提烏魯木齊喇：
哈密屯軍[1]多數喺西北面嘅深山入面牧馬，屯弁[2]周不時會去睇下養成點，中途成日都會去一戶民居度休息，屋主係一位老翁，佢會切啲瓜果[3]出嚟招呼屯弁，見佢咁恭敬，慢慢屯弁同老翁佢哋就熟咗，但屯弁一直都覺得，老翁周圍並冇鄰居，又唔見佢有種瓜種田，一個人喺座空山入面，唔知佢係點搵食嘅。有一日，佢哋傾傾下提到呢件事，屯弁就問老翁點解。老翁解釋唔到，就話：「我其實係已經蛻變成人形嘅狐狸嚟嘅。」屯弁又問：「平時啲狐狸中意同人類一齊生活，點解你會自己一個喺度？同埋狐狸多數係群居，點解你係自己住？」老翁答：「要修道，一定要喺塵世之外生活，精神先可以堅定。如果成日出入城鎮同集市，就好容易產生物慾，要修練就難咗，咁就要去迷惑人類嚟採外丹。如果採得太多，始終會干犯天條。至於話喺墓地呢啲多狐狸嘅地方生活，因為同類多，就容易引到獵人嚟，更加唔可以遠離禍害，所以我唔住近人、亦唔同狐狸一齊住。」
屯弁中意老翁夠真，所以亦都冇驚，仲話同佢做兄弟添，老翁亦都答應咗。之後屯弁就出門口圍住間屋裝下裝下，老翁笑笑口咁話：「凡係變幻成人形嘅狐狸，佢啲屋都係變出嚟嘅，我哋蛻變成人形嘅狐狸，啲屋就係真嘅。老夫屍解[4]之後，好似人咁樣生活咗好耐，呢間屋係我自己親自收集茅草木材起嘅，你唔使懷疑係幻象。」
第日屯弁再嚟到，提到屯兵話喺月光明亮嘅夜晚，明明冇人，但喺牧場嘅石壁上面會見到有兩個人影，高丈幾，佢哋懷疑係鬼怪之類，話想搬咗個牧場。屯弁問老翁點睇，老翁話：「呢啲就係所謂嘅『木石之怪夔罔兩』[5]嚟喇。佢哋係自然界嘅精氣聚合生成嘅，一開始好似嘅泡沫同露水咁，耐咗就會變成煙霧咁，再耐啲就會凝聚成形，但仲係冇實質嘅形體嘅，所以喺月光之下只係見到佢哋嘅影。再過多百幾年，佢哋嘅氣聚夠就會有形體架喇。佢兩個，我都見過，唔會害人嘅，唔使避開佢啦。」
後嚟，屯弁洩露咗老翁嘅事，狐狸就搬走咗嚕，不過嗰兩個影就仲喺度。呢件事係哈密嘅徐守備[6]同我講嘅。徐守備話想叫屯弁帶佢去睇嗰兩個影好耐，但去一次要幾日先可以來回，仲未有時間喎。[7]
[1]今新疆哈密市，當時有屯田，另外亦都有一位信奉伊斯蘭教嘅哈密回王喺當地。
[2]屯弁係負責管理屯田嘅吏員。
[3]我相信係哈密瓜。
[4]屍解係道教嘅一種概念，係指修道之人得道之後蛻去肉體（屍體）而成仙。呢度嘅狐仙話自己係蛻變而人形嘅狐狸，套用返道教屍解一說，即係話佢已經修煉到一個境界可以蛻去原本狐狸嘅肉體，再成為人形出現喺人前。
[5]《國語》入面，有記載孔子提過嘅一啲怪物，當中木石之怪就係叫夔罔兩，後世有人認為係「夔」同「罔兩」兩樣嘢。「罔兩」就係後世寫嘅「魍魎」。
[6]守備，清代綠營正五品軍官，下級為千總、上級為都司。
[7]原文出自紀曉嵐《姑妄聽之》卷一：
哈密屯軍多牧馬西北深山中。屯弁或往考牧。中途恆憩一民家。主翁或具瓜果。意其恭謹。久漸欵洽。然竊怪其無鄰無里。不圃不農。寂歷空山。作何生計。一日。偶詰其故。翁無詞自解。云實蛻形之狐。問狐喜近人。何以僻處。狐多聚族。何以獨居。曰。修道必世外幽棲。始精神堅定。如往來城市。則嗜慾日生。難以鍊形服氣。不免於媚人採補。攝取外丹。倘所害過半。終干天律。至往來墟墓。種類太繁。則踪跡彰明。易招弋獵。尤非遠害之方。故均不為也。屯弁喜其樸誠。亦不懼。約為兄弟。翁亦欣然。因出便旋。循牆環視。翁笑曰。凡變形之狐。其室皆幻。蛻形之狐。其室皆真。老夫尸解以來。久歸人道。此並葺茅伐木。手自經營。公毋疑如海市也。他日再往。屯軍告月明之夕。不睹人形。而石壁時現二人影。高並丈餘。疑為鬼物。欲改牧廠。屯弁以此問此翁。曰。此所謂木石之怪。夔罔兩也。山川精氣，翕合而生，其始如泡露，久而漸如煙霧，久而凝聚成形，尚空虛無質，故月下惟見其影。再百餘年，則氣足而有質矣。二物吾亦嘗見之，不為人害，無庸避也。後屯弁洩其事。狐遂徙去。惟二影今尚存焉。此哈密徐守備所說。徐云久擬同屯弁往觀。以往返須數日。尚未暇也。
呢個故事我見過兩個版本，但只係後半狐仙講解人影時嘅詳略有差異，我揀咗比較詳細嘅版本嚟講，睇落有頭有尾啲。
【遊戲新聞】Bug 助你速通拿S+ 《生化危機 4 重製版》狙擊槍土遁大法輕鬆越過鎖上的門
當女朋友仲鹹濕過自己
Pokémon朱/紫！發掘古代，超越未來！訓練員進入開放世界！
女神新標準出爐！毒燃唔可以唔識嘅5位隱藏版女神MULCE
我在孤獨中找到了快樂
真正愛對方，唔好晚晚傾電話
2020年5月17日
