具中國特色的情緒勒索

 

自古以嚟,中國人有好多傳統美德,孝順就係其中之一。正所謂:不孝有三,無後為大。其中一個不孝就係不順從父母嘅意思,陷父母於不義,講白啲就係唔聽話、唔孝順。所以古人對父母都言聽計從,父母話一,佢地唔敢話二。所以以致依加有啲人上至結婚,下至着咩衫,全部都要聽曬父母話。講呢類孝順,中國人認第二,無人敢認第一。

雖然依加已經唔係盲婚啞嫁,係自由戀愛嘅時代。但實在睇唔過眼一啲孝順仔一面倒聽曬呀媽話。利申:無歧視,係某部分,某部分嚟自單親家庭同呀媽關係又勁好嘅男仔,姊妹們你地就要睇路了,佢呀媽中意你就好,唔中意你嘅你就可以返屋企吔蕉。通常呢啲呀媽知心肝寶貝仔拍拖後,就會當正自己個仔俾個妖女搶左,亦會有幾句類似嘅對白:

「你有女朋友之後唔使理我㗎啦!」

「我咁辛苦一個人養大你,你聽呀媽講啦,呢個女仔唔岩你㗎!」

「你對女朋友仲好過對呀媽!你聽曬佢話得㗎啦!」

如果你自問無做左啲咩特別事得罪auntie,而個男仔無意圖係佢呀媽面前美言你幾句,或試下破冰,教下你點討佢呀媽歡心,一味怕唔聽呀媽講就話曬俾啲姨媽姑姐三姑六婆,一齊夾攻自己,淨係識叫你忍忍忍,話佢係我呀媽你就下佢啦。咁結婚後發生咩拗撬你唔使指意佢會幫你。你諗下其實你夠人地個女,咁邊個就下你?

其實唔係應該係要互相尊重㗎咩?

唔知點解係中國人眼中,報答養育之恩同聽話同孝順係劃上等號。咁同中共話俾生意人地做就要人奶共有咩分別?

父母以前有份養大你,你就當然要報答佢地嘅養育之恩。但其實你有成就嘅話,都要靠自己努力嘅。咁供養父母係一定㗎啦,但又代唔代表100%聽曬佢地話呢?唔聽話就叫不孝嘅話,咁唔通佢地叫我去舔廁板你就舔咩?咁大個人識自己分析㗎啦。就算尊重屋企人,個決定權最後都係自己手到。人生係你自己嘅,何必成日俾道德標準管束住自己呢?

如果真心錫個仔嘅應該係想佢娶個好老婆然後建立家庭,唔係成日怕俾人搶走左。到底啲呀媽係對自己個仔無信心,定對自己無信心呢?親情同愛情一樣,咁易俾人搶得走嘅要唔要都罷啦。

孝順唔係愚孝,就好似我地細個咁,父母見我地做錯都會話下我地,提下我地,但唔代表唔錫我地。所以,唔係叫你地鬧呀爸呀媽,當佢地太蠻不講理時,不妨大家開心見誠拎岀嚟講啊。

 

作者:90後肥妹

九十後的我生於資訊科技爆炸的年代,愛上網,愛打機,但也愛看書。文字總有一種安撫別人的力量。現今社會上,誰不想得到別人的安慰呢?

閱讀後覺得好,請多多讚好及分享~:)

其他熱門文章

歡迎讚好我們的facebook page,免費資訊源源送上。

文章資訊

ID: 206636
Date: 2020-05-18 05:56:01
Generated at: 2020-06-06 09:36:18
Permalink: https://www.vjmedia.com.hk/articles/2020/05/18/206636/具中國特色的情緒勒索