是枝裕和拍出暫時最好睇嘅有村架純——《有村架純的攝休》

 

睇劇雖然係我一個興趣,但其實近幾年開嘅劇多,睇晒嘅少之又少。就以前排好hit嘅《愛的迫降》,初段有好多北韓獵奇式嘅劇情,的確係幾過癮。但後尾越講越多感情,而且一集超過80分鐘,我發現自己撳手機嘅時間比望住個mon時間仲多,所以都係選擇棄劇。

而近期我成功睇晒嘅其中一套,就係由有村架純主演嘅《有村架純的攝休》。純B,或者大陸叫嘅「村花」近年之紅唔需要多講,絕對喺呢一代日本嘅宅男女神。我無睇過佢之前太多作品,只係睇過成名作《奇蹟補習社》,不過之後純B嘅作品,大部份都係劣評多,而對佢嘅評價都係「得個樣無演技」。

 

 

顧名思義,《有村架純的攝休》入面有村架純就係飾演有村架純,每一集嘅開頭都係劇組以唔同原因話聽日拍唔到,所以純B可以有一日假期。雖然劇入面純B係飾演有村架純,但除咗佢個人之外,其他都係假。全套劇只有8集,分別由4個導演操刀,當中內容亦全無關連。而真正吸引我睇呢部劇嘅唔係純B,係參與嘅導演竟然有國寶級導演是枝裕和。打個比喻,你可以想像王家衞或者杜琪峰執導一集《愛回家》嘅嗰種震撼?

作為奧斯卡同康城級別嘅導演,是枝裕和操刀嘅第一集係講純B返鄉下探阿媽,忽然知道自己多咗個同父異母嘅大佬,擺明就係是枝裕和招牌嘅家庭倫理戲碼。劇情越發展,純B發現呢個阿哥同阿媽嘅關係好好,仲比同自己親,嗰種妒忌但係講唔出口,純B亦表現得非常好,更有評論話誇張到話呢一集可能係純B從影以來最出色嘅演出。同時有好多細節位,係睇第一次個陣會睇唔出,根本就係電影嘅規格,短短40分鐘已經見到是枝裕和嘅功力。

 

 

之後嘅第三集亦係由是枝裕和執導,劇情係講純B把握一日放假機會去做body check,但過程中發現初戀男友原來喺醫療中心工作。劇入面一段初戀男友幫純B做腹部超聲波檢查,儀器喺純B嘅腰間反覆來回,加上兩個人講起往事充滿曖昧之情嘅對話,咁簡單嘅橋段都可以令人心跳加速,期待兩個人之間有更多事發生,但偏偏又點到即止。最尾仲要再嚟一個小「扭橋」,成個故事層次又提升咗,可以話係8集入面我最鍾意嘅一集。

不過8集由4位導演,唔同嘅編劇操刀,風格就一定有唔同,質素當然都會有高低。要鏈贏是枝裕和就無咩可能架喇,但其他幾集都有佳作,例如第6集講男友同埋第8集去打棒球,我自己就覺得幾有feel。至於其他,都係值得一睇,畢竟每集都只係廿幾分鐘,一日睇晒全無難度。雖然話劇情係虛構,但總係感覺唔多唔少都有純B自己嘅心聲,或者係有意無意嘅情緒投射。8集8個純B,雖然係做返自己,但每一個都有唔同嘅特點,說穿了其實呢套嘢係用嚟幫純B圈粉是吧?

 

作者:阿享

一個戒緊牛肉,但打邊爐仍然會忍唔住既耶青。

閱讀後覺得好,請多多讚好及分享~:)

其他熱門文章

  • 【辦公室智慧】Learn how to not give a fuck, you will be fine. by 沒有句號
    大佬個 Sales Assistant – Ann 姐入 form claim 電話費,一次過 claim 一至八月,公司 policy 講明只可以 claim 最近兩個月嘅單,會計部都係跟 policy 做嘢啫,過咗期自然就彈㗎啦,所以 …
  • 律師真係好型咩? by 烏龍
    大律師事務律師也是男人,男人的劣根性在法律界也不能免疫。相反,正正因為很多天真嬌對律師趨之若慕,主動獻身亦大不乏人,單是律師這張名片對某些女士來説可能是一卡傍身,世界通行,所以法律界的男人們在女性市場比較吃香,把妹相對容易也是相識吧。事實上…
  • 暫停六合彩,反映馬會進退失據 by 曾慶光
    今次為六合彩四十五年歷史上,因應疫症而暫停攪珠時間最長(超過二百日)的一次,而且有很多人質疑二零零三年「沙士」時無暫停六合彩。馬會早前公佈截至今年六月,上一年度六合彩投注額僅僅過五十億,對比前一年度大跌近四成,少近三十億。…
  • 【遊戲介紹】死又有咩可怕?《Chronos: Before the Ashes》死一次強一次 by 阿九
    2019 年大賣嘅《Remnant: From the Ashes》,大家都應該印象深刻。同樣由 Gunfir […]…
  • 「作為一個女仔識做家務係一件好可恥的事」 by 瓔庭
    「作為一個女仔識做家務係一件好可恥的事,你要同我記住。」細細個便響阿媽度學識呢句說話的Pat一家很完美的實行了這個「理論」,佢係一個十指不沾陽春水的大小姐。家中清潔、煮飯什麼的都是Pat的老竇同阿哥去做。甚至學校有家政堂寧願肥佬都唔肯去做任…
  • TikTok 其實好重要 by 毛言地
    每個社交媒體都會有唔同嘅低能及危險玩意,就好似Facebook早前都有出現藍鯨遊戲,不過「危險」始終唔係Facebook嘅主流,大家上Facebook嘅主因唔會係為咗睇藍鯨遊戲比咩任務你。但TikTok當中低能嘅影片基本上係主流,咩Skul…
歡迎讚好我們的facebook page,免費資訊源源送上。

文章資訊

ID: 206654
Date: 2020-05-19 05:55:15
Generated at: 2020-09-19 13:55:32
Permalink: https://www.vjmedia.com.hk/articles/2020/05/19/206654/是枝裕和拍出暫時最好睇嘅有村架純-《有村架