【新疆鬼故】(七)死者緝兇

 

 

一次完美嘅謀殺,真係會只有天知地知兇手知死者知。咁嘅情況下,除咗係兇手良心發現出嚟自首,睇怕都冇咩可能制裁到兇手。呢個時候,就唯有靠死者自己出手喇。紀曉嵐嘅人生入面,其實都聽過唔少殺人賠命嘅事例,即使係去到新疆都唔例外:

烏魯木齊有個流放犯叫劉剛,人就驍健絕倫,但就唔中意耕田,所以佢就乘機潛逃,離開流放嘅地方。他一路走,去到根忒克[1],已經好近烏魯木齊嘅地界[2]。夜晚,佢遇到個阿伯,阿伯話:「你係咪走緊佬呀?前面有卡倫[3]架,睇怕你會過唔到架。不過暫時匿喺我間屋度,等黎明時份耕田嘅人出嚟時,你再混入人群走啦。」劉剛聽佢話,就留咗喺阿伯間屋度。

等到個天慢慢光,開始可以分得到顏色時,佢就有種如夢初醒嘅感覺,然後先發現自己坐咗喺棵老樹入面,再望下個阿伯,亦都唔係尋晚個樣,佢再仔細睇清楚,原來係以前自己親手殺死,再棄屍深澗嗰個人嚟。劉剛嚇到即刻想起身走,不過巡邏嘅騎手已經嚟到,佢惟有自己出嚟投降。

軍屯入面規定,流放犯逃走,如果二十日之內自己返返嚟,可以免死。劉剛被捕時,啱啱係二十日嘅日出之前,責咗界。屯官本身想放佢一馬,但劉剛諗返之前嘅經歷,知道自己一定走唔甩,就自己要求受死,屯官見係咁亦都送咗佢去行刑。劉剛喺七八年前殺咗人,過咗咁耐都冇人發現,但死者嘅鬼魂最後都可以喺兩萬里之外嘅新疆整死佢,真係好驚。[4][5]

 

人死為鬼,可以變成阿伯,引仇人入死局。但呢個故事未夠奇,以下呢個就真係奇喇:

畜牲[6]可以劏嚟食,係常理嚟。但係如果殺得太多[7],就係造惡業,而如果唔係應該殺嘅人去殺,畜牲都可以報復架喎[8]。烏魯木齊把總[9]茹大業同我講,吉木薩遊擊[10]派家奴上山搵雪蓮,蕩失咗路返唔到嚟。有晚,遊擊夢見家奴全身浴血咁返咗嚟,話喺某座山度遇到瑪哈沁[11],已經被佢哋劏咗嚟食,食剩嘅骸骨仲喺橋南第幾棵松樹下面,想主人去搵返佢。遊擊派手下軍官去搵到嗰棵樹,真係周圍都有血跡,一片狼藉,但睇清楚啲骨就係羊骨嚟。睇嚟係有圉卒[12]一齊偷咗一隻官家養嘅羊,喺呢度劏咗。

不過,遊擊都仲係懷疑家奴喺另一個地方死咗。過咗兩日,家奴遇到個獵人帶咗佢返嚟,大家先知,原來係隻羊嘅鬼魂扮成家奴嘅鬼魂,嚟揭發圉卒嘅罪行咋。[13]

 


 

[1]原文為根克忒,疑為根忒克,係烏魯木齊同吐魯番之間一個地點。

[2]古代地方官員一般情況下唔可以離開轄境,即使係手下要去追捕逃犯,如果逃犯已經離開轄境,只就能夠靠鄰區官員捉,唔可以隨便跨境執法。所以劉剛只要走得到去吐魯番境內,吐魯番嘅官員就要等烏魯木齊通報先會知道佢入咗境再捉佢,公文來往嘅時間已經夠佢再走去另一個地方隱姓埋名。所以只要離開烏魯木齊地界就即係走甩咗。亦係因為咁,如果喺清朝香港有人畀深圳政府用洗頭艇捉走咗,事後都係要追究深圳嘅官員跨境執法。

[3]卡倫:清代於滿、蒙、新疆設立嘅駐軍哨站,名稱為滿語 karun 嘅音譯。

[4]呢度想講清楚少少:劉剛嘅流放罪,睇到呢度可以知,係唔關殺人事嘅,至少係唔關呢單兇殺案事。而佢殺嘅人,其實係借佢會遇上死刑嚟試下有冇可能攞佢命,而劉剛就揀咗受死。可能係見隻鬼兩萬里外都可以捉到佢,怕之後會死得更慘,寧願畀官家正式咁處死可能仲好過啲啦。

[5]原文出自《如是我聞》卷一:

烏魯木齊遣犯劉剛。驍健絕倫。不耐耕作。伺隙潛逃。至根克忒。將出境矣。夜遇一叟。曰。汝逋亡者耶。前有卡倫。恐不得過。不如暫匿我室中。候黎明耕者畢出。可雜其中以脫也。剛從之。比稍辨色。覺恍如夢醒。身坐老樹腹中。再視叟。亦非昨貌。諦審之。乃夙所手刃棄尸深澗者也。錯愕欲起。邏騎已至。乃弭首就擒。軍屯法遣犯私逃。二十日內自歸者。尚可貸死。剛就擒。在二十日將曙。介在兩歧。屯官欲遷就活之。剛目述所見。知必不免。願早伏法。乃送轅行刑。殺人於七八年前。久無覺者。而游魂為厲。終索命於二萬里外。其可畏也哉。

[6]原文為「六畜」,係指馬牛羊雞狗豬六種喺華人常見嘅畜牲,全部都食得,全部都好好味(利申食過晒)。

[7]原文為「殺之過當」,我覺得可以解殺得太多(我理解係浪費肉食,唔係單指一個人成日劏畜牲)或者係殺得太殘忍(例如澆驢肉、三吱兒呢啲食法)。我個人認為解殺得太多會譯得順啲,但如果睇原文,同時又理解成殺得太殘忍,亦利於勸人向善嘅。

[8]唔係該殺畜牲嘅人殺,即係畜牲呢世未生存夠就死咗,當然會生怨。

[9]把總為明代及清代綠營最低階嘅軍官,為正七品官,統一汛兵力(幾十人至一百人),清廷喺香港亦曾經設有九龍汛、紅香爐汛等汛兵,當然亦會有呢啲正七品把總喺度任職(不過紅香爐汛係有千總喺度,高把總一級)。九龍汛後嚟擴建為九龍寨城,而紅香爐汛喺夏歷嘅《香港東區街道故事》入面認為營房就喺今日銅鑼灣嘅天后廟,但丁新豹《紅香爐與紅香爐天后廟》就認為夏歷未有提出實據,此說流於臆測。

[10]吉木薩,《清史稿》作濟木薩,今新疆吉木薩爾縣,建有愷安城,光緒時設為孚遠縣,1952年改今名。遊擊為軍官名,之前啲鬼故有解過。

[11]瑪哈沁:為乾隆時喺新疆出現嘅一種流民,「瑪哈沁」為當地衛拉特蒙古語入面「劫盜」嘅意思。根據紀曉嵐書中其他地方形容,佢哋係清朝滅準噶爾之後流散嘅蒙古流民,呢班人會打下劫並唔出奇,出奇嘅係佢哋係捉到咩就食咩,餓起上嚟捉到人都會劏嚟食。所以瑪哈沁可以話係中國最後嘅食人族。

[12]圉卒:古稱養馬人為圉人,應該係指當地負責養馬養羊嘅士兵。

[13]原文出自《灤陽消夏錄》卷五:

六畜充庖。常理也。然殺之過當。則為惡業。非所應殺之人而殺之。亦能報冤。烏魯木齊把總茹大業言。吉木薩遊擊遣奴入山尋雪蓮。迷不得歸。一夜。夢奴浴血來曰。在某山遇瑪哈沁為臠。食殘骸骨。猶在橋南第幾松樹下。乞往迹之。遊擊遣軍校尋至樹下。果血污狼藉。然視之皆羊骨。蓋圉卒共盜一官羊。殺於是也。猶疑奴或死他所。越兩日。奴得遇獵者引歸。始知羊假奴之魂。以發圉卒之罪耳。

真係唔好以為羊好哈……

 

作者:薰華

薰華
塵世中一件無名廢青,除咗偏見同口水就冇嘢多。

閱讀後覺得好,請多多讚好及分享~:)

其他熱門文章

  • 【遊戲攻略】解鎖二三艘潛艇教學 《Monster Hunter Rise》刷國王獨角仙悶到瞓著 by 滅盡殺手
    早兩日我哋嘅一篇小知識技巧篇入面有提到要盡快解鎖收集道具必備嘅潛水艇,雖然做村任好快就會有第一隻潛水艇,但係要 […]…
  • 「媽劇停」之苦 by 小盛女
    最緊忙緊咩?忙緊請人,你無睇錯,我終於可以請人喇!唔使再一個人頂晒所有嘢,好感動!起初我滿心歡喜,以為會有好多CV send過嚟,點知原來10份都無,仲要有幾份係印度人,我唔係歧視佢地,只係唔識中文真係搞唔掂,好難勝任「媽劇停」嘅工作。…
  • 【轉工適用】Reference Check 又黎料啦 by HR 扮工週記
    Reference check 一般會喺個 Candidate 拎咗 Offer 之後做,公司會跟據 Candidate 俾嘅資料,然後向以前嘅僱主查詢所提供資料係咪屬實。不過唔係所有公司都會做,一般某啲特定行業或者有少少規模嘅先會去做。其…
  • 香港警察的政治智慧 by 健吾
    當時特首梁振英叫盧偉聰向習近平交代香港犯罪率情況,盧偉聰即說道:「現在我們的犯罪率是1978年以來最低的一年。」習近平指出香港社會情況變得複雜,人口亦愈來愈多,但犯罪率反而有所下降。盧偉聰答道:「要感謝我們內地的公安部對我們的支持,沒有他們…
  • 《彼岸島》絕對是我人生中看的其中一套最令我無言的漫畫。 by 鵝鑾鼻燈塔
    如果你沒有看過,恭喜你,你的人生是完全沒有任何損失的。這種比狗血更狗血的劇情,永無休止又不斷無限loop的橋段,看了也想把自己雙眼也插盲。簡單來說,主角不論做了甚麼,也無法打死早已不死的吸血鬼之王,只能眼看自己的同伴一個又一個的死去(有時甚…
  • 如何成為護士?(包括登記護士與註冊護士) by Su子
    呢篇野係寫俾考完DSE,有志投身護理界既所有同學。…
歡迎讚好我們的facebook page,免費資訊源源送上。

文章資訊

ID: 206686
Date: 2020-05-20 07:58:03
Generated at: 2022-06-29 12:03:42
Permalink: https://www.vjmedia.com.hk/articles/2020/05/20/206686/【新疆鬼故】(七)死者緝兇