歷史科考題批鬥考評局,只係教育界文革第一波。

 

– KEVIN CHENG PHOTOGRAPHY- 發佈於 2020年2月21日星期五

 

為免引錯,唔講名啦,正所謂人類最大嘅歷史教訓,就係唔識從歷史中吸取教訓。

文化大革命嘅本質係咩?係批鬥。咩係批鬥?就係社會競爭唔再講邊個叻啲,邊個好啲,而係講邊個左啲,邊個擁護毛主席多啲。

歷史科試題,問日本侵華,係咪利多於弊,然後建制輿論系統,就好似中宣部真係從中協調咁,上至人民日報,至本地建制派公眾人物,下至親建制blogger,你一句傷害人民感情,我一句罔顧歷史事實,好不熱鬧。

對人類社會發展進程有一點認識,就會知道戰爭帶領著人類科技進步,早至石器銅器,除左係人類對付大自然嘅武器,仲係人類與人類之間互相攻擊嘅武器,以後無論講冶鐵煉鋼、預測天氣、物流系統,有邊一樣唔係因為因為一場又一場嘅戰爭而帶動?比較近代嘅戰爭,第二次世界大戰就令飛機、電子通訊、槍械、火箭等等,而家睇來好普通嘅科技,喺嗰段時間突飛猛進。德國嚴禁討論「國家民族社會主義」(即NAZI,納粹),是作為戰敗國向其他國家的交代,即係「我以後唔講,你唔好再嘈」,然後納粹領導德國期間發展嘅工業科技,唔通全部毀滅晒佢咩?唔係架嘛。

要拗利弊,本身就係無定論,歷史本來就係無定論,嚴謹嘅歷史學固然喺研究上面有要求,但任何人都有權有自己嘅理解同詮釋,高中考試出現呢類題目,就正正係要分辨出邊類考生能夠明白「治史」嘅本質。呢個道理,係好明明白白,大概無咩討論需要。

問題在於,政治鬥爭,同你講「啱唔啱」架咩?係講邊個拳頭大。中共喺呢一年熾熱嘅社會運動之後,對於香港嘅管治會變成點呢?無論中共入面有咩類型嘅聲音,「極左」嘅勢力必然會進佔一部份嘅領域。「回歸咁多年,咩自由都有,仲搞埋通識,換來乜嘢呀,係暴動」,當極左勢力,例如梁振英之流,喺中共入面陳述利害之時,又真係駁唔到。

來緊嘅香港,「意識形態」呢個領域,我諗極左嘅力量一定會繼續嘗試收緊現有嘅嘢。乜嘢屬於「意識形態」?傳媒同埋教育都係。近日接連搞香港電台同考評局,就係最明顯不過。

咁有咩辦法應付。無。自從早大半年,多次有規模嘅罷工同被罷工出現(或稱不合作運動)中,教師拒絕參與罷工開始,教育界嘅被整治已經無任何道德力量感召其他人去捍衛佢,而以香港教師嘅普遍犬儒保守,上有好者下有甚焉,一定更加乖乖地做好份工,然後繼續投票俾教協,話自己係「心入面好黃」。

集中營入面,大家都係為左活多兩日而出賣隔離嗰個,教師已經率先垂範,大罷工嘅時候食花生,其他後生仔,到你地從歷史吸取教訓,好好感受下身教,保命要緊。

 

作者:白木乩

白木乩
聽聞係總編分身,專用來出D 與總編身份不符既膠文

閱讀後覺得好,請多多讚好及分享~:)

其他熱門文章

歡迎讚好我們的facebook page,免費資訊源源送上。

文章資訊

ID: 206731
Date: 2020-05-21 05:55:52
Generated at: 2020-06-06 08:03:28
Permalink: https://www.vjmedia.com.hk/articles/2020/05/21/206731/歷史科考題批鬥考評局,只係教育界文革第一波。