【現代巫師點滴】睇新聞都連結到死於非命女童?順手送埋佢上路,其實唔難

文教 / 最新文章綜覽

 

 

首先多謝大家支持,見大家咁鍾意睇,我就出多啲文啦~好似從來都無講,點解小白好似骨格精奇咁嘅樣,因爲小白八字純陰阿,陰年陰月陰日陰時出世,仲要撞正十五月圓之夜… 真係生左條撞鬼命羅~呢單又係新鮮滾熱辣丫~

話說,前日咪有一單四川大媽碎屍12歲女女嘅案件嘅?(十二碎…)我通常見到呢啲奇怪新聞,我都好少Click入去睇嘅,因爲我啲文都成日講,靈界其實係無時間同空間概念,一張相、一段影片、甚至一念之間,就可以接通兩個時空。而通常我一望啲死於非命嘅遺照,隻鬼差唔多係必定狗衝埋黎捉住我,命中率簡單直逼100%…

咁我都唔知自己屁痕、想幫小妹妹、定係直覺感應到啲咩,我係禁左入去段新聞入面,仲睇哂啲內容同當事人相片,咁當然亦都極度頭疼啦,我感覺到啲奇怪野已經黎齊我呢邊。

首先見到嘅,就係案件中嘅小妹妹,其實怨念就不大,點解咁講?因爲佢至少無狗衝捉住我,真係辛苦哂!當我想超渡妹妹嘅時候,我就突然暈到七彩,成個人好似被大石壓住左咁,亦都好難集中到精神。喺我不知不覺之中,圍住我好似起左一層霧咁,真係肉眼都覺得視野好模糊。我之前都講過,平時陰陽眼睇到呢啲畫面,都只係合埋見冥想,腦入面好似有另一個視角咁,或者喺眼角邊緣見到顏色或者有野閃過,如果喺現實世界用肉眼都見到嘅野,就係一啲非常勁揪嘅惡靈先會咁…

原本諗住幫手超渡下個小妹妹就算,點知又黎大鑊野…

我嘗試由個天到叫啲光落黎,想打散啲霧氣先,結果係完全無用嘅!但同時我腦入面就不停loop緊一句經文,由於小白對各個宗教文獻都好熟,一聽到就知道係佛教蓮花生大師嘅經文。

點解係蓮花生大師?唔好問我,我點知點解啫…

呢啲時候我就會去YouTube開返個段經文嘅歌,之後跟住一齊唱,通常呢啲歌都計好念頌次數,好多都係108次完結(或者108倍數),正確次數係有效倍大個力量。一路跟住唱頌,我就見到啲霧氣開始散開,喺我面前就出現一個紅眼發光嘅恐怖阿婆乾屍,佢脅持住左阿妹妹項住佢條頸,個陣我就明白哂,原來媽咪就係比呢隻阿婆上左身(注一),成日又打女,仲整死埋佢。阿婆專登揀個小妹妹落手,係一隻好惡嘅怨靈,佢殺害嘅人肯定唔止一個,應該已經殺上癮了,想變返做人嘅初心都已經忘記左。

我嘗試分開個阿婆同妹妹,用咩方法都唔成功,佢地仲開始溶合埋一齊,其實都幾核突下… 其實小朋友係有一種特別嘅力量,正如啲電影成日都吹奏童子尿、處女,唔係無原因架,因爲佢地嘅能量構造簡單,無咁多世俗思想。純就一定架啦!但未必代表純潔架~就好似呢位妹妹嘅case咁,佢係好純正嘅負能量載體,應該平時比屋企人日打夜打,儲存左大量高純度負能量… 我相信係個阿婆花好長時間養出黎,諗住養大左先食。如果我無發現嘅話,過一排之後比阿婆完全溶合左,佢應該會成功變女妖啦,咁以後又多幾個人被佢害死…

我當然唔可以比呢件事發生啦,由其是,佢黎左我屋企阿大佬… 我點可以唔KO佢?最後我只可以整一張路票,拎張符紙寫左佢地兩個嘅能量印記(注2),之後燒左張符就可以強行送客,送佢地上路。靈性世界裡面,我地相信煙喺可以去到另一邊嘅世界,所以燒野嘅方式都幾常用下。

如果有拜過下神嘅大家,都知道正常符紙好易著火,一燒就掉都掉唔切架嘛,我嘗試燒呢張符紙,係要用火槍燒,燒完唔夠一秒就熄,又要點過,來來回回我點左成五次,最後要開住個火槍黎燒佢,燒完都好奇怪,唔係變成灰燼,變左一舊黑色嘅黏液咁樣… 呢種情況,喺我十年前第一次對付黑魔法先出現過,燒符燒唔著,仲要燒勁耐… 通常係好嚴重嘅情況,先會引致三維世界都產生扭曲。

點都好啦,夾硬送左佢地上路,希望佢地經過一啲歲月之後,可以道化歸真,唔洗再喺怨恨痛苦之中啦。

做完一大輪之後,我就明白點解會聽到蓮花生大師嘅經文… 咁清楚聽到段經文,其實個神都已經到左架啦… 上天成日都會突然間派任務,時不時都係咁樣… 只可以講句,能者多勞啦… 學師傅話齋,橫掂想升仙都要儲唔知幾大量功德架啦,咁咪當解任務積德羅!

雖然小白係時不時頭暈身興,做人麻煩啲… 不過由第一日學呢啲野開始,都預左架啦~寫返哂啲故事出黎,其實都幾歡樂丫(你地)~做左咁多年人,我啲故事多過TVB編劇丫,期待下一篇啦,拜拜!

 

注一:之前啲文都有講過,吸毒係會令意識缺失,靈魂出體,當一個人嘅三魂七魄不齊,就會有空隙被入侵。吸引力法則,掉返轉黎講都可以,一個人靈魂缺失,亦都會引起瘋狂或自毀行爲,吸毒只係其中一種。

注二:能量印記即係名阿,靈魂嘅名,寫人名,就只處理到靈魂呢個名個一世嘅事情,如果寫靈魂名,就係成個Package處理哂。

 

後記:有師兄問如果自己係賣二手玩具,自己唔知,但又賣左啲有附靈嘅玩具比人,咁樣有無業?其實點都會有少少架,但相比起明知固犯,個業力係輕非常非常之多。加上,其實做人無時無刻都做緊業,唔洗驚咁多,要講到極致嘅,食肉都做業啦,係咪唔食先?善待身邊嘅人多啲,又加返啲Credit架啦~

但係又咁講,其實可以成功無病無痛賣二手物品嘅話,店主本身都要係骨格精奇先得,少啲陽氣都壓唔住啲貨阿。

 

作者:小白

擁有超凡視力的人,低調解說平行空間。

閱讀後覺得好,請多多讚好及分享~:)

其他熱門文章

歡迎讚好我們的facebook page,免費資訊源源送上。

文章資訊

ID: 206741
Date: 2020-05-21 08:15:23
Generated at: 2020-06-06 08:33:53
Permalink: https://www.vjmedia.com.hk/articles/2020/05/21/206741/【現代巫師點滴】睇新聞都連結到死於非命女童?