【以國共內戰為鑑】中共勝利，然後呢？

就算你話我係唱淡都係咁講，自從中共宣佈香港被《國安法》以嚟反對派喺各方面嘅表現，都係一再強調緊「靠我哋搞香港獨立真係等死」；依家建制派形勢可以話係一片大好。不過，雖然建制派形勢一片大好，但建制中人就唔一定囉。本住反對派盲目樂觀嘅睇嘢方式，即係「只要建制中人好難過就係好事」咁睇，依家都係時候分析下等抗爭者死晒之後，包括建制中人在內，仲喺香港嘅幾種人仲會發生咩事先：

香港降民

圖一：1951年鎮反運動海報，當時仍然未有簡體字

首先，當然係一眾得把口抗爭嘅人啦。相信當抗爭者真係死晒嘅時候，會有唔少由頭到尾都係出口術嘅支持者（例如小弟）會突然變乖，好似冇事咁樣當場投降。然而，睇返中共以往嘅做法，正所謂「宜將剩勇追窮寇、不可沽名學霸王」，呢班人都係要追究嘅。喺1950年開始，當中共基本上完全佔據大陸之後，佢哋就發動咗「鎮壓反革命運動」，簡稱「鎮反運動」。一開始都只係針對幫會、山賊、特務，後嚟索性立咗條法叫《中華人民共和國懲治反革命條例》，設立「反革命罪」，定義反革命行為，當中包括咗「煽動群眾對抗政府」、「挑撥團結」、「製造散布謠言」、「窩藏包庇反革命罪犯」，而且只要係「意圖」就可以成罪。雖然中央話只係入過國民黨係冇罪，但去到地方之後，有少少錢都變成咗有罪囉；當時葉問要走嚟香港，原因都係佢喺國民政府手下做過啲低級職位，如果佢唔走，鎮反就夠鎮死佢。

亦即係話，此時此刻話香港警察殺咗好多人、聲稱差佬執勤時搶劫便利店、聲稱「一國兩制」已死嘅人，已經有晒證據做「反革命罪犯」，至於有啲人可能講過「我都想做家長接下人」嘅，即使佢根本就冇車，亦都係「反革命罪犯」。因為有意圖就可以成罪囉。至於反革命罪點判，根據毛主席嘅批示，冇咩害又應殺嘅教育界、經濟界反革命罪犯一律死緩，捉去勞改，一至兩年內表現良好改終身監禁，之後可以再減刑。但呢個已經係毛主席喺1951年鎮反後期宣佈停手時嘅批示囉，之前殺咗幾多，係多到中共自己都數唔到。

成個「鎮反運動」入面，中共自己宣稱殺咗71萬人、129萬人被監禁、「管制」咗120萬人，即係有起碼300萬個受害者。後嚟嘅90年代佢哋先改口話鎮壓咗157萬人，87萬人判死刑。

中立或親共黨派

圖二：反右運動

40年代嘅中國，政治團體其實唔止國民黨同共產黨，今日嘅香港都一樣，總係會有啲人唔係泛民又唔算建制。當時嘅中國，國共兩黨之外同樣係有一啲中立政黨，佢哋有一部份係比較親近共產黨嘅，喺中共基本上打贏國民黨，設立新政協嚟商量建國時仲參加埋。呢啲黨叫做「民主黨派」，到今日大部份都存在，以「參政黨」嘅身份，喺中共政權手上仲會分到少量官職做下──不過，中共分官畀佢哋做之前，首先要「反右」先。

1957年，毛澤東開展「整風運動」，呼籲民主黨派對中共提意見，稱為「大鳴大放」，而民主黨派以為真係任佢講，就講「停止一黨專政」、「共產黨下台」、「輪流坐莊」，觸動中共嘅亡國感（？），然後中共就一改年頭嘅開放態度，喺當年年中發動「反右運動」，將對黨提過意見嘅人通通劃成右派加以逼害，各大民主黨派嘅首腦首當其衝，到後期甚至指名所有部門都要有5%嘅人係右派，捉出嚟鬥，有啲人只係開緊會定右派名單時去屙咗個尿就變成右派，最後全國右派有55萬人，但好快就發現有53萬人唔係右派，不過喺文革時嗰53萬都照鬥無誤。到咗80年代文革完全結束時，中共確定真係嘅右派只係有96個人。

不過，過程之中民主黨派嘅領導層已經全部畀中共換晒血，就算依然存在，首腦人物其實都係共產黨嚟。例如話中國民主同盟喺1949年之後，一開始中央委員會主席仲係1949年之前真係中立黨派嘅人物，到第3個主席開始已經係啲原本潛伏嘅中國民主同盟入面嘅共諜楊明軒、史良，之後嘅楚圖南本身都係共產黨員嚟，直至最近呢幾屆先冇咁明目張膽。

無論係中立定親共都係一樣嘅結果架，上面提嘅中國民主同盟都只係傻更更走咗去支持中共對付一黨專政嘅國民黨，下面呢個就係貨真價實嘅共產黨駐台間諜：謝雪紅。

圖三：1949年，謝雪紅作為台灣代表參與新政協，籌建中華人民共和國

謝雪紅喺1925年加入中國共產黨，之後去咗莫斯科培訓，期間認識日本共產黨嘅人，之後再返上海成立台灣共產黨，原本係做台共駐日代表，但好快佢就畀日本人捉咗返台灣，獲釋之後喺台灣做「工作」，直至1931年台共被日本瓦解為止，佢亦都喺台灣坐咗9年監，出獄之後過咗幾年商人生活，1945年佢重出江湖，並喺二二八事件時成立台中人民政府，失敗後就走去編組台灣嘅中共游擊隊二七部隊，都失敗之後就潛逃香港，成立台灣民主自治同盟之後北上，喺1949年參與籌建中華人民共和國。

一個咁根正苗紅嘅人，可以話成世都幫緊共產黨服務，最後下場係點呢？

1957年，謝雪紅被打成右派，開除中共黨籍，隨後喺文革時多次被批鬥直至肺癌病死。所以真係唔好諗住有啲人做民建聯做到可以喺全國人大常委就冇事，做到參政黨領導嘅謝雪紅都要死呀。

商界

圖四：公私合營之後嘅王老吉廣告，50年代中共以公私合營為名將全廣州所有中成藥廠收歸國有，合併成今日嘅廣藥集團

做生意，同政府交好係不可避免，所以我向來都唔會去特登捉咩藍店，因為商家都係要做生意、要養員工。不過，如果以為保持親建制就冇事，就太睇小共產黨喇。

1949年之後，好多喺中國嘅企業一開始都以為係冇事架，仲話打完仗營商環境好咗，喺1949至1951年之間甚至可以用欣欣向榮嚟形容，不過有見識嘅商家就趁呢段時間走晒嚟香港囉。

至於商界嘅第一場惡夢就由1951年「三反五反」開始，一開始只係「三反」，主要係一場反貪運動嚟，針對嘅係官員，所以「三反」係「反貪污」、「反浪費」、「反官僚主義」。「三反」本嚟都冇咩嘢，但反反下，唔係係想淡化黨內官員受賄嘅問題，定係諉過於人，竟然變成「反行賄」、「反偷稅漏稅」、「反偷工減料」、「反盜騙國家財產」、「反盜竊國家經濟情報」嘅「五反」，大量揭發商家舉報日日喺報紙上面出現，被針對嘅係商家，極端嘅情況下，商店老闆不堪受壓自殺，而頂得順冇死嘅，就索性停工停產，停止收發商品，等中共運動完先諗做唔做生意。

當時，陳雲就向中共報告話全國商家有貨都唔敢運、有料都唔敢開工，可見營商環境之差，根本係做唔做生意都係死。

喺呢個時候，中共又拋出「資本主義工商業社會主義改造」，要同商戶搞「公私合營」，意思係公司收歸國有，但原本嘅老闆可以喺20年內收5%「定息」，無論賺蝕都有得分，定息到期之後就即係間公司已經完全社會主義改造咗。就咁睇好似非常搵笨咁，但見到之前幾年嘅政治運動，中國嘅商人似乎認為前途無望，都唔知啲生意仲有冇得做，就相當順攤咁答應就算數；而「公私合營」就係中國商界嘅末日：一啲由前清甚至係明代就存在嘅品牌全部都收歸國有，交畀啲唔識做生意嘅共產黨幹部做，做到執嘅所在多有，而劫餘嘅商家，例如上海商業銀行、太平館、潘高壽、陳李濟、李眾勝堂、蓮香樓、梁蘇記遮廠，就係因為本嚟喺香港有分店或者係公私合營之前就搬咗嚟香港或者去咗台灣先至冇事。

至於各位老闆本人又點呢？畀個例子大家：1954年，北京同仁堂第十三代傳人，時任經理樂松生交出公司，仍然任總經理，之後仲有得做北京副市長。然後到文革時被紅衛兵監生打死。

警界

圖五：內戰期間投降中共嘅士兵，好多被編入中國人民志願軍，送去韓戰戰場做炮灰

中國內戰期間，中共曾經開出非常優厚嘅待遇勸降國軍同民國官員，部份優待嘅程度甚至係可以由得降官咩都唔做日日白逗人工，而且仲可以高過喺民國政府時。隨住戰局明朗化，大量國軍士兵投降，一度引起中共嘅財政危機，成為人民幣一發行就貶值一萬倍嘅其中一個原因（詳情睇《陳雲文選》，講明先唔係城邦論總集篇嚟）。當時，降兵被編入解放軍，稱為「解放戰士」，人數分分鐘仲多過原本嘅解放軍。當內戰結束，緊接而嚟就係韓戰，表面上令新生中共政權陷入危機，但同時又畀咗中共一個機會去處理解放戰士。

點處理？中共將好多解放戰士編入中國人民志願軍，送去朝鮮半島支援北韓。由於中共軍隊裝備極端落後，面對大量重型武器嘅聯合國部隊，佢哋係用人海戰術對抗火海戰術，最終全軍78萬人，有15萬左右陣亡或者MIA，2萬人被俘，當中被俘嘅解放戰士好多都揀遣返自由中國，至少冇好似揀返去中共治下嗰班咁畀中共逼害到80年代。

所以我都幾期待國家有一日派鄧炳強去新疆和闐一帶某個疆獨勢力強大嘅地區公安局度做，最好畀佢帶多幾百個做過速龍嘅精銳去，睇下佢哋面對真係刀刀攞命嘅疆獨志士要點搞。

不過啦，以上呢啲都只會喺所有抗爭者都真係死晒之後先會發生，無論今日坐喺度寫嘅我，或者依家睇緊嘅你，都有幾大機會睇唔到建制中人嘅下場。所以呢，我個人嚟講會傾向努力唔好死先嘅；而且，其實仲有一種方法係唔使抗爭者死晒都可以睇到佢哋嘅下場嘅。

總之，唔好死啦。

作者：薰華

塵世中一件無名廢青，除咗偏見同口水就冇嘢多。

閱讀後覺得好，請多多讚好及分享～：）