去示威,腦筋都要進步

 

琴晚我又聽903 OSCAR嘅《失眠藥》,之前佢係IG問人有咩奇怪嘅習慣放係《迷狐大師》嘅環節去講,講得奇怪即係無乜人會同自己一樣啦~咁我就答咗佢兩個關於步行嘅習慣,第一個就係數地下階磚,三格三格咁行,有時面對啲大嘅階磚都會以自己長腿去挑戰,總之一望住地下行就忍唔住,另一個就係行樓梯會數定階級,有啲太長太多級就唔數定,數定嚟做咩呀?就係一定要以右腳踏上最後一級,即係無數定嗰啲臨最後幾級就會知道要唔要跨過一級以右腳作結尾。不出我所料,節目都話好多人不約而同咁有哩啲類似嘅習慣,其實係我細個就同朋友研究過好多都有數階磚或數樓梯嘅習慣,只係格數或方式唔同。所以大家都以為自己好特別嘅時候,而事實上唔係,當你以為你先諗到嘅嘢其實係世界某角落有人比你更早諗到都唔定。

其實人腦真係好得意,用科學一啲嘅角度去分析其實人腦都有一定嘅程式係道而且係大量,只係人類生存嘅環境都好類近,所以開啟到嘅程式都好相近,「大眾」亦都係咁嚟,為咗配合「大眾」生活所以人類以大眾嘅方向去設定一啲規則,法律就係咁嚟,為保護一啲小眾就出現法庭及律師,還佢地一個公義。群體生活嘅人類好易會羊群心理,有咁多個群體睇下邊個群體影響到你你就埋堆,一入咗群組你自然會跟住嗰群人嘅步伐,就算見到有唔對路都會盲目咁跟,靜靜掩蓋原本覺得唔妥嘅感覺,會有怕被排外嘅恐懼,所以就算仍然覺得有問題都未必講。群眾為咗自己嘅勢力見到有威脅性嘅異見者會進行攻擊,可以話已經唔會有理性,各種論點都只為維護群組,唔敢去打破思考框架作其他角度思考。就好似band5學校咁(我嘅年代係有band5㗎,咁先會顯得啲人思考有幾極端)大多同學都認為係哩間學校讀唔到書係理所當然嘅事,只係唔聽書無去搞事已經好好,通常嗰啲勤力讀書會被人笑戇居,得到老師寵愛嗰啲可能會被欺凌,非我族群必須排外咁。

人腦其實可以係好勁嘅嘢,但都可以話佢係好蠢,唔好咁相信自己個腦,就好似當你轉動彩色圓盤旋轉得好快時你只睇到白色一樣,因為你個腦就係慢。又講返大腦嘅程式,有啲人可能俾某啲人或事去開啟咗大眾無開嘅程式,所以有啲人會多出一啲技能,亦都有世上好少嘅天才,佢地個腦會比其他人容易開啟封鎖咗嘅程式,好似愛因斯坦同霍金咁。又有啲人因為一啲人或事而被封鎖咗原本開咗嘅程式,更有好多人一世都遇唔到叮嗰吓而一世都唔知自己才能,更大部分人會因為懶惰而有啲程式被自動封鎖不自知。

「眾人皆醉我獨醒」攞嚟形容自己嘅就視野狹窄唔知一山還比一山高,如果攞嚟揶揄人只係排除異己刻意破壞對方人格。所以去唔到天才嘅級數都唔好以為自己好醒(天才定義唔使教啦呱),多啲睇唔同角度嘅嘢先會幫助到自己清醒,完全相信自己個腦係件好危險嘅事,有好多嘅腦部惰性都唔自知,受情緒影響無法理智、受情緒勒索唔自知、潛而默化性受洗腦、羊群心理等等惰性追隨式思考根本就係日常發生嘅事。

嚟到哩到我講中心主旨啦~你有無勤力練體能?你有無去了解對家點樣練習?咁有無預計如果被捕時個黑警失控你會點?有無去聽過被捕者曾經係被質問嘅時候係點?你本身原有嘅背負(如你家人)已經安排好未?被捕後將會面對一場場嘅訴訟同去報到嘅壓力嘅心理準備有無?咁你本身有無一技之長就算坐十年監出返嚟都搵到食?了解抗爭必須有浪漫及激情先夠勇出去嘅,出面大量浪漫化文宣洗腦,咁總有睇到唔同角度嘅異見者同你講返貼地現實問題嘅。唔係話阻止啲人出去,根本無本事,只係想話俾遇到哩篇文章嘅你知,打開多啲腦部程式,唔好相信原本個腦,睇多啲異見人士嘅想法絕對無害而有助啟發連異見者都未開發嘅嘢,經多個程式分析後依然覺得自己承擔得起,你就去啦~我唔係特別有智慧,但肯定比起好多人唔忍心失去年輕人,所以好努力嘗試以不同嘅角度同年輕人講,保命好重要,做好所有身心嘅準備都算係其中一種保命方式,承擔好重要,計算好自己要承擔啲咩,可以承擔幾多,學識就知自己人生方向。

 

 

作者:紫玥

閱讀後覺得好,請多多讚好及分享~:)

其他熱門文章

  • Client 問我點解自己係「仆街磁石」(上) by Professor Chan
    佢自從中學由女校畢業之後就無試過單身⋯⋯連一個月都無。每次同一個男仔分手,佢好快就會同另一個人一齊,佢話佢已經唔記得單身係咩感覺。…
  • Client 問我點解自己係「仆街磁石」(下) by Professor Chan
    依家,你重新行一次,你由出世到依家呢廿五年嘅經歷。好似一段Video咁,由過去,由開始播放,播放到依家呢一刻⋯⋯你可以由得唔同嘅片段喺你個腦入面播放,唔需要去控制佢,一路播一路同我講你見到咩。」我講。…
  • 【國安法自保】除左刪fb post 之外,你應該做乜嘢? by 白木乩
    對於「唔怕」嘅人,已經唔需要睇落去,就義係高尚嘅,歷史會記得你,雖然好多人唔記得左歷史係由勝利者書寫。…
  • 香港人就係純樸到連日本人都可以喺度橫行霸道 by 白木乩
    就算係日本老母來到香港,無左其他日本人嘅目光,無左其他日本人文化監察,無左其他日本人鬧佢「打咩」、「巴加丫囉」、「渣媽」,出名桎梏出名壓抑嘅大和民族,都係會個性解放,係「個性」解放。…
  • 傷J人 by BEAR 兒
    低胸女徑自朝吧枱走去,被緊身裙包裹着的身體玲瓏有致。她走到男人旁邊,向酒保說了幾句,就在吧枱俯身等着,屁股翹得高高的。有容笑了笑搖頭說:「小婊子還挺厲害的。」…
  • 陳偉霆注定是香港人的一道傷口 by 阿享
    陳偉霆現在很紅,紅到他可以和香港完全切割。近年在大陸很紅的人,再怎樣也會偶爾在香港出現。佘詩曼因為《延禧攻略》爆紅,之後成了廠家寵兒,屢屢在香港大小活動出現。同公司的謝霆鋒,容祖兒等,雖然重心在大陸,但也會在香港開show,出歌。就算勢頭同…
歡迎讚好我們的facebook page,免費資訊源源送上。

文章資訊

ID: 206894
Date: 2020-05-26 06:43:30
Generated at: 2020-07-07 02:07:58
Permalink: https://www.vjmedia.com.hk/articles/2020/05/26/206894/去示威,腦筋都要進步