老蘭嘅初夜

 

我記得第一次去蘭桂坊係喺2011年,已經係九年前嘅事。仲好記得第一晚去蘭桂坊時候嘅衣著,藍色書包杏色闊腳褲藍色花紋T裇,總之唔係可以稱為「戰鬥格」嘅裝束,好似白癡咁鑽入威靈頓街間T字頭O字尾嘅酒吧入面,入到去全部都大過當時嘅我至少十年,全部唔係戰鬥格就西裝。我嘅存在就好似二打六咁,我睇你唔到,你睇我唔到就算,如果唔係因為要同做實習間公司嘅同事打好關係兼慶祝同事生日,我好可能都唔會去。

但係是但啦,人生有幾多廿一歲,唔趁後生見識下,老咗就無機會。咁當我盲舂舂入到舞池之中搵到我同事然後坐低。即刻有一種無奈,總覺得自己格格不入,望著啲人UN下UN下,其實都不外如是啫。都依稀記得我有落場跳下咁嘅,但係唔會有人想搭我訕囉。所以我吹完……人哋嘅生日蠟燭後,就走咗。我對老蘭嘅第一印象好一般,唔係因為無人搭訕,而係個年齡組別錯哂。

然後年幾兩年之後偶爾都有去老蘭,但係印象唔深刻,因為都係啲所謂嘅商業聯誼。除咗有得喺雪房著大褸飲朱古力龍舌蘭酒同試均各種芝士之外,我已經唔記得仲有啲乜嘢特別。不過我對老蘭有好感嘅時間,應該係從2015年到2016年開始。因為酒店同事嘅關係,佢帶咗我去蘭桂坊,呢一個女同事最後更成為咗我嘅好朋友。佢明知我無「真正」體驗過老蘭而決定帶我去一次。尤其是佢聽完我同波蘭人嘅遭遇之後。呢件事,我都無從入手,總之就係啱timing又係啱嘅人,但因為一個過失而變成終身遺憾。

嗰晚我一早就喺屋企準備當晚去老蘭嘅妝容、衣著,仲記得係一件葵涌廣場買嘅白色T恤加U記牛仔褲。再一次唔著「戰鬥格」裝束。化咗個化完等同無化嘅妝,然後就會合佢同佢朋友。去到一間叫The G字頭E字尾嘅餐廳(間嘢而家被人話係藍),作為當晚嘅序幕。間嘢我就唔評論啦!只係記得佢哋好似久別重逢咁Bitch嚟bitch去,好典型嘅直女配攣男知音開場白。然後佢哋話要幫我改變待人接物技巧同人際關係嘅心態,即係要我放開啲。不過,當我見到碟Steak tartare,都會質疑究竟要放開到咩程度先夠?食生牛肉定見住人哋食生牛肉而唔覺得奇怪先夠?但當下,我的而且確係大開眼界,因為我未見過吖嘛!又好神奇,我無當面投訴過任何嘢,足以證明我係一嚿海綿。

席間,佢哋異口同聲咁話我生得唔算差吖,攪乜無男朋友?係,寫到呢度,我要曲線讚自己!但係我有一個缺點,就係「為何永遠放不低」。放唔低係死症嚟,然後佢哋就分享自己嘅個人心得同見解,仲話要happy下。好快我哋就埋單走人落下一場。

去咗間Shisha吧,我對呢間吧又係零印象,可能係因為當晚有更深刻嘅事值得我去記。間吧喺LKF Tower嘅隔離,有為數不少嘅本地薑光顧。咁我其實係好期待11點嘅到來,因為我嘅目標係Club吖嘛!但我仍然好有耐心同禮貌去同我朋友傾偈。我想要一個直男呀!而唔係直女加一個男同志,OK?可能因為未同過同自己年齡相若又合得嚟嘅人一齊出去玩,所以先至咁期待呢次嘅體驗會有唔同。

終於去到十一點,上咗雲咸街嘅Tonic(而家執咗)。間吧話大唔大,但入面有好多人跳緊舞,我哋一入去就瘋狂自拍,然後我請咗一round,然後大家就一齊跳舞,但係所謂嘅跳舞係原地跳。除咗同朋友跳之外,朋友都叫我睇下有無靚仔,我就周圍望下啦!然後唔夠半個鐘我就已經攬住個荷蘭仔。第一次嚟講,又唔係戰鬥格,我當贏咗架啦。其實去去蘭桂坊,啲人會睇你著成點咩?唔一定係。只要舒服,襯得好,係舞池或者喺酒吧盡顯你個人特色,實會有人睇上你,就算唔會變朋友情人,得一晚春宵你都有賺。而我賺咗接吻功力,佢同我打咗成晚車輪。佢藉由跳舞,順勢咁拖咗我去梳化坐埋一齊,又請我飲啤酒,仲將我對腳放上佢大脾,擁抱我且撫摸我胸圍嘅邊緣。但我拒絕咗俾佢摸我個胸,而佢亦都係一個紳士嚟,尊重我嘅意願。到而家回想起呢個吻,仍然感覺到佢嘅溫度同柔滑嘅唇舌,舌頭交織嘅一剎那,我輕撫佢頸肩,彷彿同佢接吻就係人生一大美事。兩個陌生人喺燈紅酒綠嘅環境下,忘我咁相濡以沫,以抵銷當晚嘅一時寂寞同慾望。

去到咁上下,我朋友都過嚟睇下我有冇出事,見到我冇出事就離開落下一間Club。佢哋離開嘅時候,我都差唔多想返屋企,佢都好直接表明想同我上床。雖然我好欣賞佢嘅直接,但我都係想返屋企多啲。最後交換咗聯絡方法就各散東西。

後來,我無同佢聯絡,但我哋喺幾年之後成為咗莫名其妙嘅Facebook 朋友。人嘅關係就係咁,可以曾經擁有最親密嘅一刻,但到離開嘅時候,可以形同陌路人。一切因緣故,至少我哋可以記住最開心嘅一刻,無痛無故咁離開彼此嘅生活,只留下記憶嘅殘影。人生之中,我哋多多少少會遇到唔同嘅人,有啲會帶嚟快樂甜蜜嘅回憶,有啲只會帶嚟痛苦,但更多嘅係甘苦交集嘅回憶。比起放下,我哋更應該著重點樣去處理呢啲回憶。因為同一個曾經親密過嘅人分開,總是別有一番滋味在心頭。然而,如果我哋識得緣份有時,我哋更會著重當下,而離開嘅時候不至於留下遺憾。

呢個係我從第一、二次喺落老蘭嘅經驗得出嚟嘅想法,自此之後,我越來越沉迷蘭桂坊呢個地方,期待會搵到不一樣嘅自己,不一樣嘅伴侶,體驗更多光怪陸離。更甚者藉以用短暫嘅快感去麻醉自己對錯失嘅懊悔。而呢個錯,可能已回天乏術。

 

作者:SAZI

沙一粒。重要咩?

閱讀後覺得好,請多多讚好及分享~:)

其他熱門文章

  • Client 問我點解自己係「仆街磁石」(上) by Professor Chan
    佢自從中學由女校畢業之後就無試過單身⋯⋯連一個月都無。每次同一個男仔分手,佢好快就會同另一個人一齊,佢話佢已經唔記得單身係咩感覺。…
  • Client 問我點解自己係「仆街磁石」(下) by Professor Chan
    依家,你重新行一次,你由出世到依家呢廿五年嘅經歷。好似一段Video咁,由過去,由開始播放,播放到依家呢一刻⋯⋯你可以由得唔同嘅片段喺你個腦入面播放,唔需要去控制佢,一路播一路同我講你見到咩。」我講。…
  • 【國安法自保】除左刪fb post 之外,你應該做乜嘢? by 白木乩
    對於「唔怕」嘅人,已經唔需要睇落去,就義係高尚嘅,歷史會記得你,雖然好多人唔記得左歷史係由勝利者書寫。…
  • 香港人就係純樸到連日本人都可以喺度橫行霸道 by 白木乩
    就算係日本老母來到香港,無左其他日本人嘅目光,無左其他日本人文化監察,無左其他日本人鬧佢「打咩」、「巴加丫囉」、「渣媽」,出名桎梏出名壓抑嘅大和民族,都係會個性解放,係「個性」解放。…
  • 傷J人 by BEAR 兒
    低胸女徑自朝吧枱走去,被緊身裙包裹着的身體玲瓏有致。她走到男人旁邊,向酒保說了幾句,就在吧枱俯身等着,屁股翹得高高的。有容笑了笑搖頭說:「小婊子還挺厲害的。」…
  • 陳偉霆注定是香港人的一道傷口 by 阿享
    陳偉霆現在很紅,紅到他可以和香港完全切割。近年在大陸很紅的人,再怎樣也會偶爾在香港出現。佘詩曼因為《延禧攻略》爆紅,之後成了廠家寵兒,屢屢在香港大小活動出現。同公司的謝霆鋒,容祖兒等,雖然重心在大陸,但也會在香港開show,出歌。就算勢頭同…
歡迎讚好我們的facebook page,免費資訊源源送上。

文章資訊

ID: 206951
Date: 2020-05-28 07:45:14
Generated at: 2020-07-07 01:34:07
Permalink: https://www.vjmedia.com.hk/articles/2020/05/28/206951/老蘭嘅初夜