尋日Kelly 鬧得我好啱

 

我尋日同朋友食飯,大家都諗緊一個問題:究竟而家諗野仲有冇用。

好似國際線咁。究竟條線而家係邊呢?唔係話中共搞香港既話,就叫美國懲罰本皇咁架咩?咁即係話,而家中共要係香港立國安法,影響香港既高度自治(美國人眼中),即係國際線成功啦。成功遊說,成功攬炒。而家係咪下一步,就係打國際線既所謂手足,都可以係街度掛banner 話成功爭取?

原來唔係。原來唔係架。

最近,又有建制派既組織講話反攬炒。咁反攬炒係要點做呢?係叫中央唔好干預香港?定係叫香港人唔好去美國告洋狀?如果係咁既話,呢堆建制派唔係應該好好支持傳統泛民咩?佢地咁多年,成日講廣東話既時候,就話「一國兩制已死」,over my dead body,然後對住外國人就話一國兩制仍然良好,一國兩制基本正常架咩?咁如果而家要「反攬炒」,即係建制派呢一堆擺街站既人,唔係話支持國安法,而係話支持泛民啵。因為,而家攬炒既根源,係美國唔再對香港有特殊待遇丫嘛?乜唔係咩?咁即係話,而家國安法一立,美國如果覺得香港無撚用既話,即係可以收佢皮,然後就係「攬炒」嘛。咁究竟呢一堆人,係要支持泛民,定係支持國安法呢?泛民就話反國安法,因為立左,就真係一國兩制已死啵。

然後,有d 人又要講到話國安法其實唔係惡法。又話美國都有惡法,因為美國果條辣過香港呢條。我又唔明啦,點解你都知呢條法例點都會限制某d既自由(係囉,咩法例都係限制人身自由架啦,唔係咩?),咁

於是,諗下諗下,我又流左滴眼淚。我開始發現,你真係思考問題,係冇咩人想理你既。你點做,都唔夠係YouTube 講下呢個是非果個是非咁多人睇。當然,我都知道講野唔需要係多人睇多人聽先講,而係有d野,你想講,就會講。但當你一直都係度諗緊,丫 ,民主好重要,公民權利好重要,但以前sit 《民主與社會》既時候,聽陳健民教授講話民主社會最緊要有「公民」,但你做左呢十幾年啦,你教通識,你做公民教育,你做埋 #903國民教育 啦,原來大家都係對「思考」呢件事,放得好輕,而對是非人情呢d事,放到好大。係咪我唔夠叻,去得唔夠盡,度得唔夠深,去得唔夠癲,所以你就算諗幾多野都好,你都仲係小眾至中眾,去唔到是非做人情果種大眾?

當然,我而家都好識氹返自己既。我知道有d野唔係真係我一個人做到。咁叫大家一齊做啦。但人人都有自己既煩惱,人人都有自己既人生。你叫我關心社會,點關心?我都要返工,我都要畀家用,我都要供樓。你笑我食黃店唔夠,你話我努力方向錯左,咁你話我知點做丫。你咁叻,你教我丫?

呢d 野,呢大半年,日日都諗。究竟仲有咩未做夠,未做得夠好。

最後,都係冇答案既。一個由1982年起都冇處理既問題,忽然間有人覺得佢係,然後有d人要答案。之後你慢慢發現,係呢個所謂後真相年代,你睇到既聽到既信既,都係一d massaged facts 仲有 manipulated truth 既時候,你既所謂真相,真理,真實,都要伴隨著你有既話語權先成立。你冇話語權,你就係錯。正如,仍然有人堅持同我講,因為睇左某個網媒果篇35個黃big暈點都好過建制派篇文覺得,唔支持反對派既人出賣自己,係外國人面前講一套,係香港人面前講第二套,都係冇問題,冇所謂既。

公民社會要一齊進步,係2019年六月既時候我講既說話。當時我既講法係「大家要大個啦」。大個?邊有咁易。你說這叫長大,我說多麼的費解。

所以,都係抖下,食下好西,睇下書,諗下自己仲有咩識做,可以做。路漫漫,走出來的,才叫路。最近認識的朋友有一句口頭禪,叫「畀條生路行下」。我發覺,我做人,係自己劈一條生路出黎,而唔係叫人畀我既。我醜,唔好睇,連寫書都畀第一個編輯鬧我「你個人又唔得你d野又唔得,咁我捧你個人定捧你d野?」我先咬住啖怨氣行到今日既。既然大家而家都睇唔到生路,不如,自己搵囉。係咪?冇人要為自己既人生負責架,你老公你老婆你老豆你老母你個仔你個女,最後都唔可以亦唔會為你既人生負責。不如大家都大個,好唔好?

「妖,你真係大個就咪鬼寫呢d啦,諗下寫咩會有人畀錢你好過啦。」朋友咁講。

#尋晚kelly真係鬧得我好岩

 

#為自己寫一點字

這個欄目,本來只是noted with friends only。朋友話,可以既話都係畀多d 人睇啦。睇下,會好d 。用廣東話寫作,唔賺錢,亦都唔會有什麼台灣市場咩咩咩,難登大雅,亦都唔係大家喜歡既文體。不過,為自己寫字,一直都應該係作家既志業。我仍然認為,我是一個寫字的人。

 

Become a Patron!

 

作者:健吾

健吾
專欄作家、記者、編輯……商業電台節目《903國民教育》、《光明頂》主持,香港中文大學日本研究學系講師。著書超過40本。email:[email protected] |Facebook: facebook.com/kengopage |微博:t.sina.com.cn/kengowrites

閱讀後覺得好,請多多讚好及分享~:)

其他熱門文章

歡迎讚好我們的facebook page,免費資訊源源送上。

文章資訊

ID: 206988
Date: 2020-05-28 23:55:41
Generated at: 2020-07-06 08:00:43
Permalink: https://www.vjmedia.com.hk/articles/2020/05/28/206988/尋日kelly-鬧得我好啱