如果有靚仔同毒撚搭你訕,下場係點?

 

 

我曾經返過唔同工種,又鍾意去戶外音樂節去蒲,所以都有好表面咁體驗過唔同生活。然而,我竟然有被人搭訕,但係幾次會引致唔同結果。點解?個標題提示咗一半。

八年前嘅某日,喺中環律師行放工之後,準備搭東涌線返屋企,就遇上一個毒撚走嚟搭我訕。係毒撚都唔緊要,但係佢矮過我啊!我對矮過我嘅男人真係唔會有太多好感,至少都高我一厘米都好呀!不過,我好欣賞佢嘅勇氣同自信,係被人當癡線佬嘅勇氣,覺得自己靠搭訕就可抱得美人歸嘅自信。我已經夠癡線,但我唔會癲到周圍問人攞電話。如果佢唔係咁矮又開始禿頭,以佢衣著,應該係做會計精算IT金融,總之出現得喺中環就係人中之龍或者係蟲。都應該有幾個錢,唔係窮到燶。

好明顯「your face, your fate.」但佢當下嘅行為令當時嘅我感覺到佢係推銷員,我面帶狐疑咁乜斜,直行直過。大佬,我就算好開心咁被搭訕,並唔代表我會落搭買你啲產品。亦有可能佢真係想識我,但係我都係一個有要求嘅人。唔係係俾我,我就要受。如果係咁,我寧願等多三十年都唔會退而求其次「袋住先」,更何況,我又唔係無機會,世界咁大,實會有人要。唔使飢渴到人哋俾個四不象都迫自己默默接受,就算自己幾入屋都無用,啲嘢唔啱唔夾就無謂勉強。

另一次係有晚喺蘇豪區某酒吧收工,著到成身黑色咁,諗住返屋企瞓,頂你個肺,有幾個荷蘭仔彈出嚟話自己係Calvin Klein個仔!先生,咪玩咁大好喎!Calvin Klein係美國人,得個女叫Marci。總之,佢哋就話要合照。咁我好勉為其難咁同佢哋影咗張相。但佢哋之後問咗一個問題,而令我呢個外冷內熱嘅小妮子放棄瞓覺嘅念頭。佢哋問,有咩吧介紹?你問得我呢個問題就預咗我好人做到底,送佛送到西。曾經接待過不少遊客嘅我,最鍾意分享自己......鍾意嘅酒吧。然後一齊玩咗一個夜晚,席間仲同咗個最正常嘅單獨相處一段時間。不過,What happened in Hong Kong,stays in Hong Kong。反正佢女朋友唔會好似某國咁,明明唔關你事嘅嘢都話人哋干預內政,Come on James,it is just a kiss!我同邊個接吻都係 No string attached,大家覺得舒服無過界咪無事囉!唔好次次都彈出嚟遣責自己男朋友或者我。我可以好似法國人咁俾個朋友之間嘅吻都唔得?

不過,真係畀到個超入屋又靚仔嘅搭你訕又點?你都唔睬人嘅,仲要話番人哋轉頭,想要嘅嘢要爭取架嘛!即使失敗咗至少你會更清楚自己要乜吖!但好可惜,蘇州過後無艇搭,然後日日攬住冇用又無可能達成嘅原則,喊苦喊忽咁話我無仔溝,喂!你都要放開你啲矛盾標準先得架!我幾次喺音樂節遇到啱傾嘅搭訕都嘗試去馬,被人貼住身跳舞,被吻到成面人哋嘅口水,但發現佢哋虛有其表咪算囉,至少都有享受過一刻快樂吖,你估個個都似美國咩,講得出做得到?

總之,一切都係關乎時機同選擇,但深明唔會日日有男神搭我訕,實會有啲無咁吸引但又唔係奇怪嘅人會搭訕,咪接受囉!只要佢唔係徹頭徹尾嘅怪叔叔毒撚就好。

 

作者:SAZI

沙一粒。重要咩?

閱讀後覺得好,請多多讚好及分享~:)

其他熱門文章

歡迎讚好我們的facebook page,免費資訊源源送上。

文章資訊

ID: 207252
Date: 2020-06-06 07:40:34
Generated at: 2021-06-16 16:22:37
Permalink: https://www.vjmedia.com.hk/articles/2020/06/06/207252/如果有靚仔同毒撚搭你訕,下場係點?