你買我咁多黃花，竟然唔畀錢？

喺清朝，才子紀昀嘅僕人王廷佑個阿媽話，青縣有一家人，除夕嗰日，有個賣蓪草花[1]嘅人係咁敲門，喺度嗌：「我企咗好耐喇，買花錢你仲唔畀？」不過，嗰一家人就話佢哋屋企真係冇人買花，但賣花嘅人就實牙實齒咁話係一個梳垂髻嘅女人拎咗佢啲花入咗去。拗拗下，就聽到個阿婆話：「真係怪！廁所支掃把棍上面插住幾朵花啝！」大家跟去睇下，真係頭先個女人拎走嘅花嚟。跟住，佢哋就即刻拗斷支掃把，然後燒咗佢。一路燒一路聽到呦呦聲，仲有血係咁流出嚟。

紀昀聽到呢件事，佢就認為，呢把掃把既然已經識幻化人形，就應該潛心修煉，涵養靈氣，做咩要變成人去拎花呢？搞到啲人知道佢喺度，咁就被人消滅咗，咁仲唔係自己攞嚟衰？啲人呀，做一件事，都未叫成功，就首先拎出嚟周圍曬，唔識得韜光養晦，咪好似呢把掃把咁囉。[2]

最近香港多故，就成日睇下清朝文人嘅筆記小說略解鬱結，尤其中意睇紀文達公昀嘅《閱微草堂筆記》。紀書雖然都係一啲道聽途說嘅故仔，不過呢啲故仔好多都畀佢寫到好警世。而且，每次揭開本書，睇咗幾個故事，腦入面浮現嘅並唔係乾隆盛世之下嘅士民風貌，而係今日香港袞袞諸公嘅群像。咁搞法唔止放鬆唔到，反而仲想寫啲嘢嚟諷刺下。

不過，為免開名直球正手抽擊會令某啲人面子不保，我都係將啲我覺得幾有意思嘅故事，譯成廣東話同大家分享下算啦。

[1]蓪草花：之前未聽過呢種花，簡單查完之後，話係一種產於南中國嘅植物，冬季開黃白色花，莖內有白芯，可以用嚟造紙，而且廣州仲有人用呢啲紙嚟製作蓪草畫賣畀歐洲人。然而青縣喺今日河北，離最近嘅蓪草花產地台灣都幾遠下……

[2]原文出自紀昀《如是我聞》卷一，該書於紀公晚年由其門人校對，同佢其他幾本著作合訂為《閱微草堂筆記》出版：

奴子王廷佑之母。言青縣一民家。歲除日。有賣蓪草花者叩門。呼曰竚立久矣。何花錢尚不送出耶。詰問家中實無人買花。而賣者堅執一垂髻女子持入。正紛擾間。聞一老媼急呼曰。真大怪事。廁中敝帚柄上插花數朵也。驗取果適所持入。乃銼而焚之。呦呦有聲。血出如縷。此魅既解化形。即應潛養靈氣。何乃作此變異。使人知而殲除。豈非自取其敗耶。天下未有所成。先自炫燿。甫有所得。不自韜晦者。類此帚也夫。

作者：薰華

塵世中一件無名廢青，除咗偏見同口水就冇嘢多。

閱讀後覺得好，請多多讚好及分享～：）