入正苦做公務員？睇你運氣值、有幾命硬

朋友A，由去年尾已經不停搵獨撚呻話遇到個癲婆上司。話說，朋友A係食物鏈嘅最底層。唔知好彩定唔好彩，去年入職就遇到社會運動。胡椒、催淚彈橫飛唔在講；設施要臨時臨急關閉，搞到人好繃緊、好緊張。但 A 無怨過一句，交通唔暢順就行多個站或者兜遠啲用其他交通工具，亦參與過遊行。A 覺得未來好灰無咩希望，又遇著癲婆上司成日「受靶」，所以好後悔入職「正苦」。

癲婆上司係典型扮工室人士；「是非當人情」、「傳聲筒」、「刷鞋、收風」、「埋堆、搞小圈子」……佢仲好識玩，趁無人時會不停挑釁A：「你有無腦㗎？」、「望住我做咩呀？（唔望又話無禮貌）」、「你適合企街望男人！（兜個圈話你做雞）」、「衷心，你搵過第二份工依度屈就你呀。」、「某職位請人，你快啲去申請。」、「答我清楚明白呀！唔係，好同唔該。依家我係上司定你係上司，唔係同你匯報。」、「正一跎衰家，論盡……（工人唔小心整傷A，癲婆上司問候一句都無，就孟鬧A論盡）」…….。

A開始有驚恐症先兆，對住癲婆會心跳加速好緊張，亦成日諗住想死。佢妹妹勸佢睇精神科，但佢又覺得睇精神科好嚴重。結果成日怕俾癲婆上司鬧做錯野，結果越做越錯。A背後嘅閒言閒語變得更多，同事間「微言」成日要執A手尾，話佢連個「真智障」同事都不如，唔敢正面面對癲婆上司，反而智障同事無迴避過癲婆上司……。作為新人嘅A孤掌難嗚；有啲同事抱著食花生心態，有啲附和，有啲落井下石加鹽、加醋、加把口…..。獨撚唔知點樣安慰A，由去年「運動」到「武肺」；如果勸佢辭職，出去一定好難再搵到。A 身邊嘅親朋戚友亦不斷同佢講：「你就好啦！唔駛返工都有糧出！」。 A話有苦自己知，返工係返少咗日數但唔係唔駛返，所有事只不過推遲最終都係會「湧番返嚟」同做「特」。A亦因為依家疫情情緒更差；好想辭職但無奈現實環境而要低頭，嗰種無力感「如人飲水，冷暖自知」。

獨撚相信A，唔係第一個亦唔會係最後一個。A 之前係「正苦」做過短期「煙腸」；試過俾old seafood 跣，亦見過 old seafood 「搞」新嚟嘅正職同事。嗰位妹妹等唔切精神科，「急急腳」睇私人精神醫生再轉職。獨撚奉勸，各位心理質素強大先好考慮入「正苦」，否則無謂精神受創「後悔終身」！

作者：六月的物管

真係做左六個月物業管理

閱讀後覺得好，請多多讚好及分享～：）