【另類本土遊】試跑九龍半島1860年的海岸線

九龍半島1860年海岸線,而家絕大部份都遠離海岸了,除左…..

 

九龍有無得「環島」?原來九龍半島填海之前唔係咁大,而且有一大段係「新九龍」,上網查考「九龍填海」加「九龍半島、北京條約」,睇番歷史地圖,比對今日嘅街道走向、山勢地貌,就規劃好一條以前無跑過嘅路線︰「九龍半島1860」。其實出發之前嘅準備,只算係大膽假設,好多嘢係要行到去嗰度,印證對比,親身睇到啲無為意到嘅街名、公園、山勢、地貌,行萬里路,其實就真係始於足下。

 

夏天太陽極端猛烈,唔想晒死,唯有早啲起身,早啲出發。所以,五點半,太陽出咗嚟幾分鐘嘅時候,就行到去上海街,160年前嘅「九龍塘」嘅海邊起步,其時街燈都仲著住,但個天嘅藍好靚,預告住呢次一定熱到HIHI。

0530上海街出發

 

開始都係慢慢行下跑下,向北幾個街口,就到咗水渠道。一直都奇怪,點解九龍嘅街都係四正方格,無端端呢條水渠道會打斜行。原來呢度係一個海灣凹咗入去嘅位置,可能係地勢同去水位嘅安排,呢個海邊位置就攞咗嚟做水渠,咁就有咗「水渠道」。計劃路線就應該去到太子道嘅位置左轉往西行出大角咀,而大角咀真係一個咀嚟,係陸地伸延出海嘅尖端,依家填咗海,大角咀都變咗「內陸」廿幾年了。

0540 水渠道

 

我跑嗰陣唔記得左轉入太子道,見到緑燈就急急過馬路,沿住花墟公園旁邊有條斜線行人路,一陣就去到界限街。算了,唔番轉頭,繼續前進吧。界限街係真嘅「界限」,條街以南係「割讓」,以北係「租借」,兩邊土地嘅「身份」唔同,南邊好多地嘅地契期限好長好長,以北嘅就到一九九七玩完。咁「根據《中英聯合聲明》同《基本法》」,界限街以北嘅新界土地,九七到期日之後就自動同政府續契五十年,交幾個巴仙租值嘅地租(唔係地價,係租值,即係樓價嘅幾個巴仙嘅幾個巴仙,細單位一年幾百蚊咋),像徵國家主權喎。又以前有個親戚回憶佢地在深水埗買樓嘅過程,佢話在七十年代,同一條街,一段在界限街以南、一段在界限街以北,價錢唔同喎,佢地覺得買界限街以南穩陣啲,吖,點知攬炒咗。

 

0545 轉入界限街

 

依家界限街由九龍塘一路去到九龍城兩邊都係豪宅,去到聯合道就喺天橋底下見到獅子山喎。一路都係車路同石屎森林,就影番張偷窺獅子嘅相,獅子山下體現乜乜乜咁。去到界限街嘅盡頭就轉個大彎入馬頭圍。十三街、馬頭涌道都係以前嘅岸邊,對出啟德依家就全部都係建築吊臂,將來就係一片高樓大廈,呢個位唔會再見到飛鵝山。之後轉入馬頭涌道,喺《北京條約》嘅地圖入面,係標示咗「馬頭涌」同「土家灣」在九龍半島嘅東岸。而喺馬頭涌道嘅左邊,橫街望出去,會見到個比較大嘅「海心公園」,入面有舊「海心石」,嗰處以前真係喺海中心有堆大石,地圖都有劃到。撐船游水過去,好似係好多土瓜灣老街坊嘅回憶。

 

0600 橋底偷窺獅子山

 

去到鶴園街,大環山仍在旁邊,穿過海逸豪園啲樓,去到海濱長廊,海邊風景一流,望出去鯉魚門,左邊九龍東、右邊港島東,無敵海景嘅豪宅,一定有米之人先可以喺度住洋樓啦。對於跑友嚟講,單係呢個海邊公園,直連尖東,一路平川唔駛過馬路嘅跑道,真係夫復何求?

 

0634 海逸遠眺鯉魚門

 

0635 海逸遠眺鯉魚門,全景圖

 

今朝係跑「舊的海岸線」,之前又係經常跑呢條海濱長廊,而且紅碪灣係一個大灣,唔應該忽略,就轉番入紅磡嘅蕪湖街。紅磡嘅黃埔船塢,係填海出嚟嘅,依家變咗大型屋苑,李嘉誠就留低咗隻「船」俾大家記得尼段歷史。咁隻船就唔係博物館,係賺錢嘅商場。過多兩步,有條搞洋涇濱譯名嘅「孖庶街」,「孖庶」英語MARSH,沼澤是也。沼澤已經填平咗百年,留下一條街名,香港經常見到嘅。

 

0644 黃埔嘅船的商場

0649 有名你叫「孖庶街」,即係海邊嘅沼澤喇

 

蕪湖街前望係山,到山腳下就漆咸道,依家係海底隧道外圍,而在繁忙嘅交迴處嘅底下,收埋咗俾行人通過嘅隧道,左轉右轉就見到理工大學嘅門口,有南亞保安看守。以前就一定走入去大學校園吸收下靈氣,依家「猛於虎」咩都驚,閒人唔准入校園喎,咁唯有運路行。有文章話,尖沙咀漆咸道以前係沙灘,1841年香港開埠之後,泊香港嘅船員水手,會走過嚟英國人管唔到嘅尖沙咀村玩個喎,令尖沙咀村由幾個漁農貧戶「發展」到好多服務業,好似深圳咁一時繁榮昌盛添。

 

0652 漆咸道,前面就係理工大學

 

尖沙咀嘅尖端就係對正中環嘅天星碼頭,今日天氣太好,藍天白雲,想影下景就無去廣東道,跑咗入去海港城嘅嗎頭岸邊,以前嘅碼頭依家變咗停車場,影番張海港全景。對番地圖,半島酒店、天星碼頭同海港城都係填海造地。之後走番入去廣東道,原本嘅岩石岸,已經成名店街,回頭一望,呢度朝早無咩人,有幾多名店都好,咪又係一條街。

 

0717 尖沙咀鐘樓和天星碼頭

 

0724-海運大廈、上環同ICC

 

0729 廣東道

 

廣東道因為「油麻地—九龍塘」填海就一直向北延伸,九龍塘喺《北京條約》嘅地圖入面,係今日上海街以西對出嘅海灣,「塘」唔係九龍中央嘅小水池,似係「避風塘」之「塘」嗰種海灣。廣東道同佐敦道文界嘅岬角,1940年起咗個公園,原來大有來頭︰「九龍佐治五世紀念公園於1940年8月興建……正門原為 Raoul Bigazzi 製作的精緻中國牌坊式青銅門,頗為壯觀。當年園裡中央豎立英國已故國王佐治五世的銅像,並闢有遊戲場,由「兒童遊樂場委員會」捐獻鞦韆等設備。公園名稱紀念英國已故國王佐治五世,佔地94,000平方呎,是當時九龍最具規模的公園。」下次要跑入去睇睇。

 

0741 又轉番入上海街

 

過馬路就見番上海街,熟識的街道,一陣間就回到最初的起點,「環島」完成!

 

呢半年無得離開香港,俾機會自己再發掘香港我地嘅屋企。我地好多書本網站見過嘅嘢,其實無親身去感受過。去吓跑步,點知原來咁複雜,路上有咁多故事,查考故舊又知道咗更多細節。點解條街乜乜斜斜?歷史嚟。點解條街咁改名?歷史嚟。160年嘅滄海桑田,我地自己去親身感受,才是滋味之所在。

 

 

另外,呢條路線唔係一條適合跑步嘅路線,行經嘅街道正常係超多車,唔係五六點咁早,吸廢氣可能會短幾年命。旺角同土瓜灣就不繼過馬路,要睇燈睇車。從運動嘅角度,呢條線唔好玩。

2020-06-11-實際跑步路線

 

作者:白恩樑

好讀書,不求甚解,每有會意,便欣然忘食。(陶潛《五柳先生傳》) 為天地立心、為生民立命、為往聖繼絕學、為萬世開太平。(張載) 子曰:「飯疏食,飲水,曲肱而枕之,樂亦在其中矣。不義而富且貴,於我如浮雲。」(論語.述而) 創業要準備一桶血,而最大的創業就是打天下。(王強,《亞洲週刊》訪問2009)

閱讀後覺得好,請多多讚好及分享~:)

其他熱門文章

歡迎讚好我們的facebook page,免費資訊源源送上。

文章資訊

ID: 207560
Date: 2020-06-13 07:46:56
Generated at: 2020-07-09 08:50:55
Permalink: https://www.vjmedia.com.hk/articles/2020/06/13/207560/【另類本土遊】試跑九龍半島1860年的海岸線