薯仔與德國民族

上回《新大陸的瑰寶薯仔 係歐洲竟然曾經唔受歡迎？》去到篇章最尾，提到會繼續講薯仔點樣喺德國政治上發揮強大力量。所以，就有呢篇文了。順便，以此探討食物同政治，以至民族意識同認同感嘅循序漸進。

自古以嚟，食物都深深影響政治：日本發明和洋折衷嘅洋食炸豬扒丶入侵滿州取得更高產量嘅黑龍江米丶赫魯曉夫同粟米丶意大利左派侮辱麵餃而失勢，以至最近港台泰嘅奶茶聯盟，都係富說服力引證食物左右政冶嘅實例。

薯仔係好早就引入到德意志民族嘅神聖羅馬帝國。 事實上，原產於安第斯山脈嘅薯仔（上篇文講到），係三十年戰爭前後荷蘭傳入德國。

即使花費咗幾十年嘅時間，但薯仔依然傳遍全國，尤其因為佢可以係貧瘠或者多石嘅土壤中生長。 此外，佢嘅單位面積產量高於穀物，而且唔需要特殊工具種植或者收穫。

So，薯仔幫德國人度過飢荒，令佢成為德國人主食重要組成部分。

一七七八年，德國巴伐利亞爆發王位繼承戰爭。當時，對峙雙方試圖以搶對方糧食，迫使對方投降。因此呢場衝突亦有名「薯仔aka土蘋果戰爭」，當戰場上已經挖唔出薯仔一刻，衝突就終止了。①

咁做嘅緣由，係因為當打仗時，地面上嘅農作物就會不免得被摧毀，所以埋係地底嘅薯仔就可以有強大作用，交戰雙方都會以薯仔為主糧，所以後面就會有搶薯仔戰略嘞。

係2009年，默克爾曾經透露自己可以整出「非常好食的土豆湯」 。去到2017年選舉前夕，佢終於係公開自己的配方。佢係當時八月接受《 Bunte 》雜誌採訪時，仲話「我多數會搗碎而唔係攪拌薯仔，」呢位歐洲強權女性甚至以薯仔作為選舉前夕嘅拉票議題，可見薯仔係德國政治嘅強大：

歐盟之中，無一個國家好似德國一樣種植咁多薯仔。德國每年生產大約1100萬噸，幾乎係歐洲收成20% 嘅薯仔，令德國成為世界十大薯仔生產國之一。

而，德國人一年平均會食60公斤薯仔②，57公斤係咩概念？2019年，香港人平均耗米量為40公斤③，即係話德國人食薯仔仲多過香港人食飯。

係以上，我哋可以睇得出，薯仔係德國人心目中佔有巨大嘅空間，甚至建構佢哋嘅民族意識形態同刻版印象：德國人嘅美食，除咗腸仔同啤酒，第三名應該非薯仔莫屬。正如講起亞洲人就係只會食米，意大利人就係只會食意粉Pizza，法國人就係只會食法包，等等。

續上，一個食物，係建構佢哋嘅民族意識形態同刻版印象之後，就可以左右一個民族，甚至國家命運同政冶。薯仔咪就令到連德國總理，都要以此拉票；若果薯仔歉收，德國隨時動盪，就好似愛爾蘭咁。所以我提到——薯仔喺德國政治同民族意識上，發揮強大力量。

所以，香港人，都係時候諗一下，有無可能透過強化香港本土美食aka特產，加強同建構香港民族嘅身份認同？例如魚蛋丶蛋撻⋯⋯？呢個，絕對係如何渲染香港人民族同獨立思識問題上嘅一個好方向。當年德國統一，都有利用格林童話，建構德國民族嘅身份認同啦。（講開又講，真係有啲似而家搞粵語雜誌咁～）

①：A war over plums and potatoes （The World of Habsburge)

②：Per capita consumption of potatoes in Germany from 1950/51 to 2017/18，呢個係2017/18年數據，全盛時期（1950-1970)甚至超過100公斤。

③：工業貿易署網站中，食米統計資料網顯示，香港人每人平均耗米量係2019年只有40公斤，即使2010年亦只係46公斤。

作者：Lafayette

在讀學生，得閒會睇書寫文，無咩主見，只識講故事。

閱讀後覺得好，請多多讚好及分享～：）