#是時候想想你究竟做了一件怎麼樣的事

 

交代一下:

尋日原稿落左廠,應該十天後會印起,但今次釘裝有d複雜,可能再需要更多時間,預計七月中會開始,逐本簽名,包裝,再寄到府上。首批將會使用香港郵政,次批正在選擇郵遞公司,理應不會是中資公司,但又要確保資料安全,不要像xx新聞一樣,不見電腦,要大家說一句「不完美但可以接受」。

這是兩難,大家有冇咩高見?

 

~~~~~~~~~~~~~~~~~

#是時候想想你究竟做了一件怎麼樣的事

終於都最後階段,都要落機印。不計標點,中文字,英文字合共128,847字。計了標點,約15萬字元

點解仲要寫?呢年咁難過,不如放過自己,放過時間,大家唔會好過d咩?

我記得,大學時代,有一個朋友同我講,佢教我,唔好重覆自己唔開心既野。因為,咁樣好似落口供,要回憶自己既唔開心,對自己點都唔會有咩好處。

結果,校對果陣,好多次都睇唔落去。校左三次,每次都搵到錯字,每次都覺得自己做得唔夠好。每次都想改寫。

三個通頂,都搞唔掂。出書咁多年,未試過咁痛苦。

因為, 呢一年,真係好撚痛苦。

「點解仲要寫?」

呢個問題,有三個朋友問過我。

有一個識左二十年既朋友,有一晚飲完兩啖叫「朝開」既清酒(see? 我咁都靜雞雞介紹一支酒畀大家啦,都叫畀返d貨大家啦係咪?),你唔寫,你飲飲食食,你真係可以繼續過得舒舒服服。反正而家成行都冇晒野做,個個KOL 都係你屌下我我屌下你又一日。你唔出書,你做返自己野,唔會咁辛苦架?你而家辛苦程度,好似做返《人民大道中》咁。點解要辛苦自己?

搵野鬧好似係KOL既工作,係亮劍,係話畀人知你武功幾高強既事。好似武林中人,會好想參加武林大會,華山論劍,去證明自己原來好有料。天下武功出少林又點?總之邊個可以打贏你就叫天下第一。你贏左天下第一又點?其實冇意義。

我只係真心咁覺得,咁多年啦,好多人話由細睇到我大(呢句說話至少兩個港大學生會會長講過,一個姓周一個姓馮,哼,講埋啦,一個周永康一個馮敬恩),話好中意睇我寫既野(呢句說話呢兩隻可愛鬼都有講過!),咁點解寫字,而家係唔使錢?點解而家寫完網媒,唔可以生活,唔可以賺到足夠既錢,而係要賺名聲,之後等大有錢佬搞媒體果陣收編你,再唔係就要出黎選,出黎做KOL 去搵真銀?點解,寫字唔可以有多d 人願意畀錢睇?所以我做patreon(我都算係第一批用文字做patreon既人啦卦?),所以我決定要出呢一本書。

除左係,疫情令我身邊所有做書既朋友都冇野做之外,我係有啖氣係我喉頭,我點都要吐左佢。

我係唔服氣,係好唔忿氣。點解最後,全港人,一齊受左咁多野,咁辛苦,最後我地都只係得兩個幫派既人定義今年既故事?

就好似,早排,毛澤東係咪真係多謝日軍侵華咁,就算幾多史料講佢講過,你夠有錢,有夠多fans,你就可以定義歷史,而家有個page仲話呀,毛澤東係元祖matt 哥,話「多謝日軍」,係反諷,係曲筆呀。果個post 呢,仲學晒d 日本資訊網咁,個出圖格式學足九成,出左之後,仲有錢賣fb ad,仲有1000幾人like 同share 架果個post。

我得一個人,一個腦,一對手,幾個最頂尖隊員,都做到喊左好多次。

每校一次,我既團隊就問我,點解你寫得出黎?

點解會唔舒服?你睇返晒d 新聞,官員講咩,政客講咩,你見到既,係一堆空有長官意志,但冇領導能力同政治能力既官員,係度執行一d 都唔知係咪指令既指令。然後你見到好多拎住政工作者份人工,但係從來都冇諗過用力去學下點樣做政治決定先至啱,先至合理既政工作者,人人好似青山走犯咁講埋晒d自己都估唔撚到會有咩後果既說話,然後一堆人睇住果堆跳樑小丑講既野就話佢地講得好,靠晒你,我地覺醒啦,我地知點做,入錢入錢入錢。過去一年發生既事,就係過去二十年衍生既共業既總和。你而家決定要做返好件事,係咪真係扔一兩個樽,擺幾次路障,醫幾個傷者,請幾個手足,投兩張票,就會完成?

一定唔會啦屌你老味。不過點做先會得?亦都唔係有一個方法我講完大家即刻做就work 啦。

當要做既野既時候,好多人問你做過咩,然後眼見一堆根本唔係做野既人扮做野,然後一堆人話:「屌,你睇下人丫,人地做緊野你就分化你屌人你怨婦你乜乜乜,點解你唔落場你唔起支旗點點點。」

於是,我做我識做既事。我寫一本我認為係啱既事。呢個就係我做既實事。

有一日,有朋友請我食左一餐都幾勁既好西,雖然唔係好貴,但d野真係好好食。(好啦,唔介意爆埋,果餐佢請既,係水哥)。

食完,我地散左一陣步,佢同我講:「D左膠,泛民憎你,係因為你做到佢地做唔到既野。佢地要定義世界,佢地要定義正義同真理,而且佢地出親書去定義,都係冇錢畀大家見到既。而家你打破晒佢地條食物鍊,原來咁樣做到,只係佢地一直唔做。市場成功,又你有話語權,仲有定義故事既能力,佢地三樣都想要,你就全部得拎晒,佢地唔憎你就奇啦。」

將心比心,如果香港將來仲要存在,若然只係淪落到剩返精神上既存在,呢種事,我只可以做到一次,就做一次。做到下次,就再做下次,做到我唔想做,或者做唔到為止。

而同時,當全世界講攬炒攬炒,咁請問,攬炒之後,點算呢?

我既朋友,就度緊,就算做本土實業,都要有產出,有品牌,有設計,有內涵,有行銷,有故事,你先可以做到出黎。你唔做出黎,你點去應付攬炒之後既生活?

我只係一個寫字既人,我只可以,亦都只能夠係咁。

如果我要為呢一件事,留一個註腳,覺得我係做得唔夠好,或者可以改善既話,係我一直以黎,都畀大家「我活得不錯」既錯覺,等大家對我投放左一d 不合理既想像,覺得我可以救到世界。

我唔得。我一直都話,我唔得。我只係知道點處理我自己既世界,同埋對呢個我土生土長既地方,留一個交代。

至於我中唔中意錢?中意。未算好中意,但我都ok中意。

因為,銀碼,數字,好客觀,好量化,可以好實在咁話我知,有幾多人願意付出黎支持我。呢一點,我從來不否認。你唔用錢既?唔使用「點解你做野要收錢」黎鬧我。我真係唔覺得呢個有咩錯。我唔收你錢,之後要既野,你仲畀唔起,仲畀唔到。

如果呢個世界,有一樣野叫「勿忘初心」,我肯定我既初心就係,唔好同我講我有幾好,請用實際行動話我知,你覺得我好。而且,仲要係我知覺,我感覺到,知道既時候畀我知道。梵高咁冇意義架。佢死左先知好多人話佢好,佢肯肯定,感覺唔到既。

KOL又好,評論人又好,作家又好,佢地從來都唔係聖人。我今年畀自己既願望係,我對對我好既人好。對我唔好既,get out of my way。我同你,冇關係。以前冇,而家冇,將來,你都唔使旨意有。

#為自己寫一點字

#每天起來我都有一點莫名其妙的憤怒

#廣東話

#短小

#口語

#負面

#健吾

《未敢忘記 2019/20》可以去第二輪預售:https://gogetfunding.com/intheyearof201920part02

 

Become a Patron!

 

作者:健吾

健吾
專欄作家、記者、編輯……商業電台節目《903國民教育》、《光明頂》主持,香港中文大學日本研究學系講師。著書超過40本。email:[email protected] |Facebook: facebook.com/kengopage |微博:t.sina.com.cn/kengowrites

閱讀後覺得好,請多多讚好及分享~:)

其他熱門文章

歡迎讚好我們的facebook page,免費資訊源源送上。

文章資訊

ID: 207627
Date: 2020-06-16 15:47:03
Generated at: 2020-10-26 11:54:28
Permalink: https://www.vjmedia.com.hk/articles/2020/06/16/207627/#是時候想想你究竟做了一件怎麼樣的事