如何鳩寫一篇黃絲黃店食評?

 

食西餐唔一定要貴既,食野最重要係味道,好食先係幫襯,唔好食既係施捨,今次就為大家介紹下依間感受人生既隱細餐廳啦

 

環境開揚:

你可以邊進食邊觀賞係商場入面路過既遊客,坐外圍既仲可以同遊客互動,好funny呀;同一般餐廳唔同,采用開放式既設計,即使坐係餐廳入面,都仲可以感受到外面既清新冷氣,合埋雙眼輕輕咁深呼吸,感受一下商人合一既感覺,好relax 好mindfulness呀。

 

 

龍蝦湯:

有埋龍蝦肉係湯入面,濃濃既龍蝦味好正呀,同時仲可以係口中感受到龍蝦仔生前堅韌既性格,堅毅不屈既精神實在令人去學習呀。

 

 

牛扒:

舊牛好有牛味,五成熟又真係好唔成熟,睇相就知隻牛係到呼喚緊人地食佢添呀,食材好fresh,牛牛好juicy呀;唔成熟亦唔代表係壞事,睇相都知隻牛有一顆赤子之心,當你食落口果陣會感受到佢既體液點樣反映到佢既內在美出黎。

 

配菜:

有薯條、蘑菇、豆豆同西蘭花,薯條炸得好均衡,每條都係黃色,同時絕不拖泥帶水咁好平均分佈係個板既角落位,就好似知道自己只係配角,默默在旁守護壓在身上既主角咁。

蘑菇食落口就知道佢有不少陰暗既經歷,係食既時候心情都忍不住沉重左一下,唯有希望我內在既溫暖可以溶解到佢黑暗既過往,同時亦感受到「經歷過陰暗,蘑菇才能成長」依個大道理。

豆豆同西蘭花簡直就係絕配!!顏色上大家都係綠色系,仲有不同既深淺色,陪伴係蘑菇身邊,為菇生帶來一點愛,「愛是一道光 綠到你發芳」,生命添上一隻色彩,難怪配菜不遜於主菜啦。

 

醬汁:

濃郁既醬汁同精緻既主菜相遇,帶出不能用文字形容既層次,就好似pooh pooh同譚譚邂逅既一刻,擦出不同層次既火花。

 

鐵板:

鐵板設計特別,係經過終華五千年人類既智慧進行中西合壁既改良再誕生出既器皿。鐵板采取長方形既design,板上一條又一條既坑紋,就好似一個里程碑咁,見證住人類歷史一次又一次既波折。係用膳既時候會深心感受歷史既味道,別有一番風味。

 

 

飲品:

桃茶好有原味,根據安排佢係唔會比飲筒你飲用,因為每當你飲一啖,冰同桃茶既配合令到每分鐘都可以品嚐到唔同既茶味,我就感受到味道由淺至深,淡到濃,清甜到甘甜,尤如人生一樣,需要慢慢至體會到各種層次。

#jm9
#成個facebook比人污染晒喇
#高質膠定膠質高
#鳩嗡當秘笈 #影幅相話自己係model #唱首歌話自己係網絡歌手
#出個樣當自己係KOL #睇黎我一定係作家添啦
#KOL同LOL只差一線
#係9up定係鳩嗡
#其實間野唔錯架 #但我on9症發作

 

________________________

 

近期睇到好多黃絲食評,佢地唔係一般個人acc仔同朋友分享下咁,而係地球post、fan page及ig出現。佢地寫食評係有條公式,啲語氣假到tbb啲飲食節目啲主持咁,而且食評內容都幾明顯係利益收授下去寫,雖然會有一、兩點係踩,一讚就讚得過份或明顯夾硬去讚,完全形容唔到食物嘅味道同質感。而哩啲黃食評盲撐嘅程度直達可恥,收咗利益就俾下心機寫好啲啦,hea寫到個個post一樣公式,今時今日有得上網就可以做KOL,真心痴線。

有次忍唔住俾個妹妹睇,佢睇完話想好好效法一下去寫喎,咁啱嗰次啲嘢又真係好食嘅,咪俾個地方佢歡樂下囉~話說哩個妹妹叫水樹,大家俾啲掌聲佢,咁樣鳩寫都好過班黃絲………………完全係浮誇式揶揄。

 

 

作者:牛靈

牛靈
屯門開荒牛加盟成員

閱讀後覺得好,請多多讚好及分享~:)

其他熱門文章

  • 見工過份自信,其實都幾乞人憎 by 小盛女
    其實我唔係淨係想見仔,但係打咗十幾個電話都無人聽,有啲又放我飛機,得佢同另一個女人肯嚟見,呢個女人大我7、8年,經理級人馬,我係請助理,即係under我,其實我都知佢未必啱做,但見佢人工都唔貴就見吓。我不嬲對嚟見工嘅人都好客氣,首先我比咗張…
  • 我們都是活在Jonestown by 《輔仁媒體》編輯組
    Jonestown的教訓其實跟香港的命運相似得可怕。一群當初相信民主回歸的領袖,帶領香港人及其下一代「回歸祖國」,跟隨「中國人堀起」的路。「回歸」後中國人政經社全方位掠奪港人所有,理想崩潰而留下殘酷現實。這些領袖,有的醒覺了,卻做不了甚麼事…
  • 溝俄妹的技術研究 by 技術官僚主義者
    平心而論,俄妹同香港女仔嘅主要分別,係佢哋平均得分較極端:大部分唔係高過70分,就係低過40分;香港女仔係完全相反。大部分人在40至70分區間,成日見啲女有80分,已經俾窮ABC狗衝。因為中庸之道嘛。好似係。即係高過70分會俾同事/同學鬧死…
  • 跳老舞 by 健吾
    中環的教舞老師,年薪可以比做刁的ibanker 人工連bonus 高。有人在做不正經的勾當是事實,香港人愛看不起做不正經勾當,出賣頸以下的身體賺錢這回事,也是事實。…
  • 望住個EX 攬住新女友嗰種感覺真係呢. . . . . . by 莎拉舒
    成個人即刻頹曬,好想衝番屋企,唔想同任何人應酬,個天就真係好似同自己開緊玩笑咁,之前分手後一直都好想係條街撞番佢,見到有佢身上特徵既男仔都會停低望一望,例如釘黑色耳環既,成個情形就好似電視劇感動畫面,以為大家無見好耐,再次見番會發現原來好掛…
  • 【遊戲短評】勁好玩種米模擬器 《天穗之咲稻姬》落田及戰鬥皆令人欲罷不能 by 五木
    《天穗之咲稻姬》(天穂のサクナヒメ)公佈初期無乜人留意,推出後因為超認真嘅耕種系統意外地喺外國引發熱潮。實際上 […]…
歡迎讚好我們的facebook page,免費資訊源源送上。

文章資訊

ID: 207635
Date: 2020-06-17 06:05:29
Generated at: 2020-11-30 06:14:21
Permalink: https://www.vjmedia.com.hk/articles/2020/06/17/207635/如何鳩寫一篇黃絲黃店食評?