【外賣仔日記】見字飲水

呢排咁熱，令我諗起一件事。

有一年嘅夏天連續某幾日特別熱，講緊係熱到區區都38度－40度走唔甩，個幾日我係返工要瘋狂飲水，飲晒就去到餐廳攞餐嗰陣問下餐廳有無水可以斟返晒成支（通常餐廳都會幫我哋斟返晒成支）。每日講緊係咁流一公升嘅汗水，日日件衫放工之後係濕晒嘅，仲要一定帶多一件替換先得，因為收工嗰陣件衫真係可以好大味，唔換衫就搭交通工具收工嘅話，就會被其他乘客自動隔離我。

我嗰日係要上一個響山上面嘅屋苑送餐。午市嚟，出面唔止陽光普照，係直頭去搵塊坑渠蓋煎蛋都仲得阿，入到屋苑地下大堂以至屋苑附近嘅路都係無瓦遮頭，能見度非常好，入到大堂之後做登記，保安唔係即刻問我去邊個單位送外賣。

而係拎起隻手指指住窗外嘅太陽，同我講：

「死人㗎喎」

嗰陣其實我已經係熱到咩都唔太講到咁滯，微微回應一句：

「OK 啦」

跟住登記完就上樓送餐。

其實我哋點解會有生意做，同埋人工好似高過好多藍領行業咁，響呢啲天氣你就會好易明白到。

夏天到啦，天氣開始比較熱。戶外工作嘅朋友，記得飲多啲水，見唔見到字都要飲多啲水。

BTW，見字飲水。

專題：【外賣仔日記】

作者：外賣仔

閱讀後覺得好，請多多讚好及分享～：）