無生意扮黃又好、真黃又好,細公司嘅老闆同員工只係想有錢開飯

 

一早見到「聽聞係總編分身」嘅大文,冷嘲熱諷雞仔鴨(Chickeeduck)周小龍「扮黃」。首先,我唔識周先生,亦無同雞仔鴨有生意來往。作為一個零售行業嘅中層管理者,呢位白木先生對周先生嘅講法,唔太公平,不得不批評一下。

首先,我唔知白木先生有幾了解周小龍先生?佢嘅文章並無具體咁形容周先生點樣「扮」?又或者提出例證周先生做咗好多「藍嘢」,有嘅白木先生唔會唔詳細羅列。手頭嘅資料,周先生有做嘢無做嘢、做藍又好做黃又好,似乎係一個UNKNOWN。而唯一話「扮」嘅證據,係雞仔鴨「食住大陸客條水」。大佬,380日之前,你講香港今日會變成咁,真係先知,真係無人會信架。喺香港賣衣服做零售,捱咁嘅租,養咁多人,唔食大陸條水點做?做生意一定係路徑依賴,以前賣開衫,越嚟越多大陸客,咁就一定做多啲大陸客嘅生意,唔通趕佢出去?咁大陸人識自己個牌子,去大陸賣多啲,去天貓賣嘢,又係藍呀?白木先生引用嘅文章係2019年6月19日出,講兩年前入大陸嘅電商。喂,2017呢啲時間已經唔算早,算係人有我有,唔好太執輸啫,咁都有錯?

周先生回應逃犯條例嘅COMMENT係好普通嘅商人睇法,起碼佢有講出佢嘅擔心。好明顯佢唔係盲目撐政府撐中共嘅人,亦唔見到有咩嘢明顯嘅政治取態。黃同藍?我真係唔想幫佢分,亦無資格去將佢定性係黃定係藍。

正如貴刊健吾先生經常講︰「我做咗幾多嘢駛唔駛講晒你知」一樣,我唔能夠排除周先生係真黃,佢真係想喺舖頭做文宣。之前呢,大股東係人大,唔方便做,佢解決咗呢個衝突,可以行出嚟表達自己啦,又得唔得?就算係扮黃拉生意又如何?證明錢係有實力改變商人嘅政治取態,咁唔係支持民主自由嘅朋友們想見到嘅效果咩?我睇翻昨日蘋果日報嘅新聞,講雞仔鴨(Chickeeduck)股東嘅變動,我見到,係雙方股東和平分手,雖然無講股份買賣值幾多錢,但肯定周先生作為獨資股東,要揹起租約同員工嘅責任,係唔容易嘅事。原大股東做到人大代表,有政治嘅取向,甚至要跟隨某啲路線,佢選擇賣盤俾管理層,我感覺到義氣唔係鬥氣。

為咗生意,變黃、扮黃,OK架,形象同服務係產品嘅一部份。神像、連儂牆都係「裝修」啫,以前去畫舫食,俾多啲錢都係食裝修啲黃金大龍鳳。女人買化妝品,一大舊錢係買廣告令自己感覺良好,撻落塊面嘅除咗化學物質仲有好多MARKETING。最緊要客戶開心,入嚟買嘢,啲貨去到,員工有錢開飯,交到租唔使執笠,呢啲每日放喺頭頂嘅刀斧,做老闆賺錢一直都唔容易。

另外,邊個估到下年會點。正如貴刊總編成日講,黃絲輸緊九條街,中共一直贏。店舖變黃,你要唔要計下長期代價?捱過今日,第時有無紅衛兵嚟搞事,明天綠色一片嚟關照下你仲有無得做生意,邊個敢寫包單?做生意計短又要計長,兼左又要顧右,唔容易架。

 

作者:白恩樑

好讀書,不求甚解,每有會意,便欣然忘食。(陶潛《五柳先生傳》) 為天地立心、為生民立命、為往聖繼絕學、為萬世開太平。(張載) 子曰:「飯疏食,飲水,曲肱而枕之,樂亦在其中矣。不義而富且貴,於我如浮雲。」(論語.述而) 創業要準備一桶血,而最大的創業就是打天下。(王強,《亞洲週刊》訪問2009)

閱讀後覺得好,請多多讚好及分享~:)

其他熱門文章

歡迎讚好我們的facebook page,免費資訊源源送上。

文章資訊

ID: 207734
Date: 2020-06-20 07:29:40
Generated at: 2020-10-27 19:56:50
Permalink: https://www.vjmedia.com.hk/articles/2020/06/20/207734/無生意扮黃又好、真黃又好,細公司嘅老闆同員工