如果黃絲指證藍店純靠感覺

 

承上文,黃色經濟圈另一致命傷(唔好再寫「硬傷」唔該)正是普遍黃絲嗰種根本說服唔到人嘅(1)辨證方式及(2)自由心證。

友人問我:如果某黃食店裝咗八達通及銀聯卡機,咁佢係藍定黃?

呢個問題很有趣:

 

1)「黃食店」何謂黃?

– 由老闆到所有員工政治立場都係黃?

– 裝修食材包裝原料全部都係Made in HK and not made in China?

– 喺撐警撐港共嘅業主度租鋪又點計?

– 顯眼位置必須貼某個比例面積嘅文宣及3M貼?

– 必須定期十一奉獻(或更高比例)資助所有同黃營有關嘅媒體/小隊/組織/ETC?呢度都未考慮「如何界定呢啲受助單位點至算黃(無限Loop⋯⋯)?

– 營運必須盡量請所謂「手足」(Sorry 但凡講「手足」我都會毛管戙,一來我唔配,二來好佩服某啲人「手足手足」當芝麻開門咁肉麻地嗌)?下一步又係點去界定何謂「手足」?(又Loop⋯⋯)

– 如果某(仲生存到嘅)黃食店主要生意原來係嚟自藍尸/撐警組織/港共政權(例如:之前經營 #黑警恐怖分子總部飯堂 嗰位棄經營權老闆),咁佢仲經唔經營落去好?

如果我一路問呢啲問題去辨證黃絲理想中嘅「黃店」,吾,「黃店」睇嚟只能夠喺伊甸園或烏托邦中做生意。黃絲黃衛兵「何謂黃」呢種苦行僧式無限上綱上線塔利班式批鬥,除咗提供足夠彈藥畀有心人用來排除異己之外,對抗爭抗敵並冇乜好處。

 

2)自由心證

在下攞附圖呢位柯先生及佢嘅某飲食連鎖集團做例子。

 

所謂「柯先生禁止同事參加反港共示威」及「柯先生參加撐警集會」,當我Fact check 一下呢兩個論點時發現:指證柯某嘅流言源頭就係附圖中連登呢個post,一張冇頭冇尾嘅通訊軟件截圖就做咗判官,然後黃營中人傳人傳人傳人⋯⋯加埋TG黃藍店分類圖廣泛流傳,至於「柯某參加撐警集會」,我連撐警大聯盟之類嘔心page & post & news 都睇咗一堆,冇資料顯示柯某有做過呢件事,亦搵唔到一張柯某出席撐警集會照片,照計如果呢位擁有超過一百間餐廳嘅大老闆出席撐警集會,畀你係呢啲濕鳩活動負責人都會捉住佢影相打卡呃光環吧。

結果就係

柯某 = 撐警 = 佢經營嘅餐廳都係撐警 = 要杯葛

喂阿哥,咁樣做鳩一個人去判定佢係藍定黃,然後順勢打佢落去牛鬼蛇神名單,之後就各界同路人用哂同一個消息來源頗存疑嘅連登 Post & 截圖去做「證據」,繼續滑坡謬誤落去就係「你幫襯柯某嘅『藍』餐廳 = 你唔夠黃 = 你唔係同唔路人,呢種做法根本唔係想做大黃圈嘅餅,而只係一班黃絲靠自由心證將中立人士踢畀親港共陣營,呢種圍爐取暖心態連社運都不如,遑論革命。

如果黃絲指證藍店純靠感覺,那就別怪敵人照辦煮碗就能打爆黃色經濟圈,因為閣下判斷敵我是非嘅邏輯其實同藍尸差唔幾,經不起基本嘅邏輯推理及考驗。

 

利伸:完全唔識上文提及柯先生,亦唔係幫佢打工,純粹以事論事。

 

作者:爽健

爽健
不求聞達於諸侯,只願笑傲賞江湖。

閱讀後覺得好,請多多讚好及分享~:)

其他熱門文章

歡迎讚好我們的facebook page,免費資訊源源送上。

文章資訊

ID: 207792
Date: 2020-06-23 06:48:28
Generated at: 2020-07-09 02:19:22
Permalink: https://www.vjmedia.com.hk/articles/2020/06/23/207792/如果黃絲指證藍店純靠感覺