打邊爐吹吓水——其實香港真係好差,邊有人想住喺香港?

 

嚟到墨西哥已經接近半年,正好在香港WhatsApp群組有朋友話遲下相約打邊爐。隔着半個地球嘅我當然也想參與,但係而家疫情嘅關係唔知幾時先可以安全返到去。

 

所以開始在身處的托盧卡找尋火鍋的材料,諗住同班朋友線上打邊爐。

我身處嘅城市冇乜華人,只可以搵到搵到簡單的材料類似香腸同蟹柳,搵唔到肥牛冇辦法, 始終冇肥牛嘅邊爐始終唔可以叫做打邊爐。

再係一小時車程外嘅超級市場搵到李錦記海鮮醬同埋生抽,喺旅館房間搶咗一個電磁爐,向着托盧卡嘅山脈開始嘗試自己打邊爐。

旁邊嘅墨西哥朋友望住我點解可以明明一次過煮好嘅嘢,卻要一次一次放入鍋中,這麼複雜的過程為何不一次過煮熟就算。我差點兒一句「你識條金屬咩」沖口而出,不過諗起自己唔識得用西班牙語講呢句說話,所以就此作罷。

 

廉價嘅香腸同埋蟹柳足以令我回味在香港的時光,就係香港僅餘$100上下可以食到嘅自助廉價火鍋。不過始終缺乏了打邊爐最重要的東西—-就是一班兄弟和朋友。

打邊爐嘅精髓就係在於你見到朋友就嚟滾熟嘅食物,然後鬥快用筷子夾起佢搶着放入自己口中,再喺朋友起身去洗手間嘅時候偷偷將豉油倒入佢杯可樂度。無聊幼稚卻是和一班兄弟成長的回憶,最後要食到飽到就嚟嘔,然之後喺混亂嘈吵嘅火鍋店同朋友飲住啤酒或者可樂天南地北乜都吹一餐。

 

好多人都話想移民要移民,我當然明白。例如我喺墨西哥住得好食得好,生活壓力又細,好多時間陪朋友同埋佢哋嘅屋企人周圍去玩。呢啲唔係就係好多香港人辛苦努力一世想要嘅生活咩?

 

但到底有幾多人真係明白,當你喺其他地方居住嘅時候你心入邊會有多麼想念香港。

我曾經居住在國外不同地方,每次當快要習慣當地生活的時候都會諗起香港,我喺日本居住嘅時候可以成日食到超級好食嘅拉麵,但係有時我淨係想食一碗頹廢五香肉丁麵;我喺墨西哥可以品嚐到佢哋製作taco烤得非常香嘅烤肉,但係嗰一刻我淨係想食魚香茄子煲。

喺墨西哥我居住嘅環境過千尺,但係我淨係諗起香港好似豆腐潤咁細嘅屋企,至少唔會蕩失路。

 

香港真係好差嘅一個地方,

樓價高企物價貴—係墨西哥我身處嘅城市2000港幣一個月已經有過千尺嘅地方。

生活壓力又大—我呢邊啲人逢星期一至五工作,星期六日就係陪屋企人去玩、去飲酒、去開派對

年輕人沒有上游的空間—我依家淨係需要用喺香港1%嘅勤力,已經可以過住相當富裕的生活

好多食物又比唔上其他國家—尤其係一啲亂咁煮嘅茶餐廳,頹廢嘅自助火鍋等等。我喺呢邊食1公斤烤肉加薄餅,成班朋友加埋都只係50港幣,又平又好食。

試下問身邊嘅朋友有邊一個鍾意香港,佢哋大部份會同你講佢哋更加鍾意日本、更加鍾意台灣,邊有人會鍾意香港㗎?!

無可否認香港差根本唔適合人生活係事實,好多人都想逃離香港呢個地方,但係去到最後你會發現始終唔可以放低香港,有好多情感你冇得逃避同欺騙自己。呢個地方真係好垃圾但係你真係好愛佢。你嘅一切回憶一切情感都係出現喺呢個彈丸之地,你想知道自己有幾掛住呢個城市的話,好似我咁去其他地方居住半年你就會知道了。

香港一輩子都會係我嘅地方,永遠唔會改變。

我真係好掛住香港。

 

 

作者:Keanu Ho

Keanu Ho
香港90後魔術師,用變魔術環遊世界歷險,遇見不同的奇人奇事

閱讀後覺得好,請多多讚好及分享~:)

其他熱門文章

歡迎讚好我們的facebook page,免費資訊源源送上。

文章資訊

ID: 207889
Date: 2020-06-29 06:06:11
Generated at: 2020-07-09 01:38:03
Permalink: https://www.vjmedia.com.hk/articles/2020/06/29/207889/打邊爐吹吓水-其實香港真係好差,邊有人想住