拖拖拉拉成個幾月，5月尾話立嘅《中華人民共和國香港特別行政區維護國家安全法》終於即立、即簽、即刊憲、即生效。老實講，筆者對於呢條「香港國安法」到底會立成點，本身真係冇咩興趣。因為澳門一早就立過國安法，中共所謂嘅國家安全問題，嚟嚟去去咪就係嗰幾樣；而且佢就算唔立，都一直利用啲唔關事嘅法律搞緊香港人架啦。吖不過又估唔到佢咁有創意，整咗條「國安38」出嚟，呢條法律就勁囉，因為有「國安38」，中華人民共和國同香港特別行政區嘅司法管豁權，係全宇宙！
我哋首先嚟睇下「國安38」係咩嚟，原文係咁：
第三十八條 不具有香港特別行政區永久性居民身份的人在香港特別行政區以外針對香港特別行政區實施本法規定的犯罪的，適用本法。
一般嚟講，其實犯罪總會有啲「在地原則」咁，即係話一個人犯某個地方嘅法律，基本上佢首先要人喺某個地方，或者話佢身份上同呢個地方有一定關係（呢樣就同在地原則無關，講明先）。因為呢個在地原則，所以香港係冇辦法控告阿陳同佳謀殺嘅，因為佢涉嫌殺人嘅案件唔喺香港發生。
不過，呢條「國安38」，就話「香港國安法」嘅適用範圍係可以包括非香港人（呢種人冇義務效忠中國或者香港），而且無論佢人喺唔喺香港，都可以適用於呢條「香港國安法」。
具體情況係點呢？首先我哋知道，中國政府係要求所有中國媒體提及香港時一定要講中國香港嘅，咁我哋可以簡單理解成佢哋認為只提香港係暗示香港唔係中國嘅一部份，而實際上佢哋唔少人真係咁諗。
咁依家，有個美國土生土長嘅太空人，收到個任務派咗上國際太空站，然後佢工餘時望下地球，啱啱好飛到香港上空，佢同個同僚講咗句：
Look, Hong Kong is over there!
根據「香港國安法」嘅第20條，佢將香港稱為香港，已經有「將香港特別行政區或者中華人民共和國其他任何部分轉歸外國統治」嘅嫌疑，因為「香港」就係1841年1月26日至1997年6月30日期間，香港唔受中華人民共和國管治時嘅正式名稱，可以話係暗示甚至明示要英殖重臨。而且因為無論係唔係武力進行都係犯罪，所以呢位美國太空人呢個行為已經犯咗「香港國安法」。加埋「國安38」已經將「香港國安法」嘅適用範圍擴大到所有係或唔係香港居民嘅人，同埋所有喺或唔喺香港嘅人，所以香港警察同未來就快會出現嘅香港國安公署，係有權拉咗呢位太空人嘅。
太空人講句Hong Kong都拉得，咁全世界所以聲援香港嘅人，又點會唔拉得呢？
所以話，有咗「國安38」，香港警察同未來就快會出現嘅香港國安公署，佢哋管轄嘅範圍，就包括咗2020年6月30日晚上11點正之後嘅所有時間同空間入面嘅所有人類，仲唔係宇宙警察？侵侵總統搞USSF都唔夠佢哋威呀！
【遊戲新聞】Bug 助你速通拿S+ 《生化危機 4 重製版》狙擊槍土遁大法輕鬆越過鎖上的門
當女朋友仲鹹濕過自己
Pokémon朱/紫！發掘古代，超越未來！訓練員進入開放世界！
女神新標準出爐！毒燃唔可以唔識嘅5位隱藏版女神MULCE
我在孤獨中找到了快樂
真正愛對方，唔好晚晚傾電話
2020年7月1日
