《金都》——香港好彩仲有鄧麗欣

記得以前有人喺高登預言過，以香港人重古輕今嘅性格，鄧麗欣Stephy終有一日都會上神檯。以前香港人會用「屎塔肥」、「鄧走音」嚟稱呼Stephy，然後笑佢唱功唔得、做戲將把聲提高八度扮弱智港女、仲有講「very thanks them」。不過過咗好幾年，Stephy由大陸回流，再次喺香港觀眾面前出現，大家又忽然好掛住佢拍嘅嗰啲葉念琛電影，突然成為香港呢一代愛情片女王，神檯已上，預言又中。

但唔誇張地講，《金都》係一部足以令鄧麗欣上神檯嘅電影。睇完《金都》嘅人，冇一個人唔驚訝係咁平淡嘅妝容同咁hea嘅衣著之下，Stephy依然係咁靚，而且仲好似上咗一個層次。連帶佢嘅演出同個人魅力，都好成功咁帶動成套戲，而呢樣嘢係80後一代嘅香港演員入面係少之又少。

由新導演黃綺林自編自導嘅《金都》，以成本嚟計，絕對係水準以上嘅作品，稱得上係近幾年香港電影嘅其中一部佳作。從電影入面可以睇到，因為資源有限，所以出現嘅場景好少，同時登場人物都唔多，但反而更令觀眾感受到張莉芳想逃出金都/太子呢個狹少空間嘅慾望同掙扎。

電影係近年少見嘅港產喜劇，但唔胡鬧，同時劇本亦唔嘗試走穩陣尋常路線，唔執坊間口水尾，突破咗同類型以婚姻做主題電影嘅框框。由年過30女人嘅婚姻壓力講到中港差異，再提升到個人自由選擇，以小觀大，從一個命題再睇唔同議題，層次分明，係有野心嘅作品。而且同時執行得到，無因為諗得太多而影響劇本成戲，在於新導演嚟講無疑係一個驚喜。

對90後嘅人嚟講，睇Stephy演愛情片，有啲似跟進老朋友嘅愛情故事一樣，只不過今次佢唔係一個新婚無耐老公出軌嘅少婦、又唔再係呃男人嘅玩家，都唔係搵老千呃前度現任女友嘅無知少女。張莉芳年紀唔少，而且有唔見得光嘅過去，講嘢唔多，睇落無咩諗法，只係一個為咗迎合男友咩都無所謂嘅女人。

一個外面好無嘢，但內心有一種渴求自由嘅慾望，落到依家嘅Stephy手上，就好似渾然天成咁。多年愛情片嘅訓練，加上自身閱歷多咗，張莉芳內心嘅矛盾同掙扎，淋善同情緒爆發Stephy簡直駕輕就熟，演得不著行跡，無晒以前嗰種造作。你會覺得身邊就有一個張莉芳咁嘅人，你戥佢著緊，你擔心佢咁嘅年紀唔結就會分，但其實佢本人唔想咁，不過又話唔到你知佢想點，就一直同矛盾共處。張莉芳唔係嗰啲籠統開口埋口不婚主義嘅女人，亦唔係以前阿寶嘅「要愛就要搶」，當中嘅轉變，無論鄧麗欣個人嘅演技，抑或香港人對於婚姻或者生活，甚至係未來嘅理解，都因為大環境而起咗變化。

《金都》令我諗到嘅另一樣嘢，就係到底依家仲有幾多未夠40歲嘅香港女演員，可以自己帶到一部戲，觀眾係受落願意入場？80後一代香港女演員之中，張柏芝同梁洛施最早喺演技上得到肯定，但依家都處於退休狀態。阿嬌因為淫照風波影響仕途，近幾年返出嚟都冇晒以前嘅靈氣。阿Sa一直好努力想成為演技派，但就算英皇再努力度身訂造開戲，阿Sa係咪識做戲仍然係一個謎題。薛凱琪、周秀娜、江若琳等就偶爾有令人驚喜演出，但因為機會太少，就算喺大片有演出機會都係過場角色，想再上一層樓難度太高。

時至今日，香港電影嘅大片依然係4，5個50幾就嚟60歲嘅男人做主軸，開一部女人戲本身已經難、開一部畀香港女演員嘅戲就更難、開一部搵中生代80後女演員做主角嘅戲簡直就難過登天。難得有有心人願意畀新導演開一部女人戲，又搵到Stephy嚟演，成件事對家下嘅香港影壇嚟講，就更顯珍貴。睇完，你好難唔由心講一句，香港好彩仲有鄧麗欣。回頭發現，經歷咗咁多嘢之後，佢已經係80後一代香港女演員最有象徵性嘅代表人物，雖然平淡，但依然亮眼；雖然柒過，但一直努力就會得到認同。

作者：阿享

一個戒緊牛肉，但打邊爐仍然會忍唔住既耶青。

閱讀後覺得好，請多多讚好及分享～：）