如何搭巴士都溝到女?

 

 

好多讀者問我,話佢地成日坐巴士都會咁岩有個索女坐係格離。佢地反映比我聽,除左偷偷地望兩眼,個心跳到一分鐘150下之外,佢地唔知可以點做先識到個女仔⁣

我明,呢個感覺係非常無奈,因為你知道,個女仔好可能唔會再遇得返⁣

我以下會分享一個親身經歷比你地聽…⁣

有一日,我坐巴士出旺角行街,上到巴士上層,全層得一個女仔坐係度,係一個窗口位⁣

抬起你個頭,唔好猶豫,自信咁行埋個佢格離,坐底就可以⁣

呢個時侯,個女仔一定會諗,甚至問:
「玩野咩你,咁多位唔坐,係要坐呢度?」 ⁣

唔洗比佢拋到,教大家一個講法⁣ 「小姐,實不相滿,我每次坐巴士都一定會揀呢個位…如果你唔嫌棄,我想同你分享吓。」 ⁣

跟住就拎一早Set 左係電話WallPaper 既女女合照出黎,要Sweet 既純愛Feel 既⁣ 「呢個係我女朋友,我地中一既時候,上天安排左我地坐隔離,而佢又咁岩住我隔離邨,所以好自然地我地就成為好朋友,每日都會一齊坐巴士返學放學。」⁣
⁣ 「佢每次都一定會坐係你呢個位,佢話因為呢個位睇到電視(果陣Roadshow 仲未執),唔會俾人遮住喎。」 ⁣

「慢慢,佢既習慣變左我既習慣,佢既喜好變左我既喜好,我地亦都成為情侶。」⁣
⁣ 「我地一齊原校升中六,講好要一齊入大學,搵份安穩既工,生一仔一女,組織一個小家庭,然後一齊老死。」 ⁣

「點知,有一日,我同佢係自修室溫書既時候,佢突然間暈左。我以為佢只係M到貧血,送左佢去醫院,點知呢個係我地命運既分岔口…」

「醫生話佢有第二期既腦癌,即使切左腫瘤,亦都可能會復發,估計活唔過30歲。」⁣

「果一刻,我地一直以黎既計劃就好似被一下抹乾淨。我雖然內心好悲哀,但我知道,如果連我都表現悲觀,我女朋友仲點會樂觀面對佢既病,所以我一直安慰佢,同佢講要相信神蹟。」⁣

「住院果一晚,我同佢由夜晚傾到凌晨,最後我係床邊拖住佢訓。我同自己講,即使要我放棄學業,去照顧佢都值得,因為生命只有一次,考試每年都有。」⁣

「第二朝,女朋友話我成晚坐係度訓,一定訓得好差,叫我返屋企休息下先再出黎,佢屋企人會照顧佢。既然佢有屋企人照顧,咁我都只好聽話返去休息同梳洗下。」⁣

「點知,去到夜晚。我去醫院既時候,發現病房空無一人,我問護士,佢地就話病人私隱唔可以透露。我睇一睇電話,發現佢WhatsApp FB IG都block左我。我不停打不停打佢手提,但都無人聽。」⁣

「係我試過哂所有方法都搵唔到佢,萬念俱灰既時候,護士長拎出一封信俾我,同我講「呀仔,唔駛搵啦,佢有心避開你」」⁣

「封信既內容大約係話,我仲後生,佢唔想因為佢既病誤左我既前途,佢會去外國接受新型既療法,將來有緣再見」⁣

「我深深相信佢手術成功,總有一日會返黎香港。所以我每次坐巴士都堅持要坐返呢個位,即使Roadshow都已經消失,但我同佢既回憶同默契唔會消失,我同佢會係呢個位再相遇。」⁣

「唔好意思小姐,我啱啱奇怪地望實你,因為你既側面好似我女朋友,我以為我等左十年終於等到。最後,都好多謝你聽我講哂成個故事」⁣

「我既故事希望能夠俾到你一啲啟發,就係人生無常,要未雨綢繆。」⁣

「我聽我女朋友話,努力讀書,終於做到保誠既港九區域總監,唔知你有無諗過買危疾同人壽保險呢?依家我地做緊優惠儲蓄計劃……..⁣

 

 

作者:溝女學(理論)大師

溝女學(理論)大師
大師係一個90後創作團隊,成立既宗旨係想幫助毒撚們,令佢地知道只要走正確的道路,佢地都可以享受初戀。 大師其實係一個精神,人人都可以係大師。

閱讀後覺得好,請多多讚好及分享~:)

其他熱門文章

  • 【辦公室智慧】Learn how to not give a fuck, you will be fine. by 沒有句號
    大佬個 Sales Assistant – Ann 姐入 form claim 電話費,一次過 claim 一至八月,公司 policy 講明只可以 claim 最近兩個月嘅單,會計部都係跟 policy 做嘢啫,過咗期自然就彈㗎啦,所以 …
  • 去到英國做警花(自稱),見盡社會光怪陸離。 by 英國警花
    早排見d移民谷,個個都好擔心治安,人人好似會抬個夾萬日日出街等人打劫咁款,好似治安除左偷竊打劫外就無野要考慮。講到治安,你有冇諗過英國好多警力其實花了在照顧精神病人身上?…
  • 解鎖記 by 健吾
    在泰國演藝圈工作的朋友說,聽說泰國演員之間,都會看不起「拍BL走紅的演員」,會覺得他們沒有演技,用旁門左道上位。只是,在這個時代,如果他們仍看不穿《sex and the city》中,samantha 說的現世代走紅秘笈:「首先是gay,…
  • 【PR】LEGO Bricktober 與你《共闖遊「樂」園》 四款限量版機動遊戲歡度 10 月節慶嘉年華 by VJGamer
     2020 年不經不覺已渡過大半年,準備踏入 10 月之際, 意味著 LEGO® Bricktober「玩」樂 […]…
  • TikTok 其實好重要 by 毛言地
    每個社交媒體都會有唔同嘅低能及危險玩意,就好似Facebook早前都有出現藍鯨遊戲,不過「危險」始終唔係Facebook嘅主流,大家上Facebook嘅主因唔會係為咗睇藍鯨遊戲比咩任務你。但TikTok當中低能嘅影片基本上係主流,咩Skul…
  • 「作為一個女仔識做家務係一件好可恥的事」 by 瓔庭
    「作為一個女仔識做家務係一件好可恥的事,你要同我記住。」細細個便響阿媽度學識呢句說話的Pat一家很完美的實行了這個「理論」,佢係一個十指不沾陽春水的大小姐。家中清潔、煮飯什麼的都是Pat的老竇同阿哥去做。甚至學校有家政堂寧願肥佬都唔肯去做任…
歡迎讚好我們的facebook page,免費資訊源源送上。

文章資訊

ID: 208121
Date: 2020-07-10 03:24:47
Generated at: 2020-09-20 10:03:54
Permalink: https://www.vjmedia.com.hk/articles/2020/07/10/208121/如何搭巴士都溝到女?