林作——高產冧唔掂冧中產,中產冧唔掂冧低產,低產冧唔掂就冧____產

 

 

見林作咁紅我又加把口先。

聽聞英國啲紳士都好興玩 self-deprecation,笑下自己懶係謙虛咁。 對於原本高高在上嘅貴族嚟講,咁做可能會比較平易近人。

唔知係咪林公子去英國學嘢學得唔到家,佢玩 self-deprecation 就變咗特登做柒自己。

做到咁柒其實係有難度架,恥力差少少都唔掂。你諗下香港八卦圈[1]仲有咩人柒得過佢?就係要柒先至有人闗注佢,佢嘅賣點就係柒。你話佢 carry 唔到套西裝? So99ry 西裝唔係重點,重點係柒呀。香港 700 萬人全城只有林公子一個人先 carry 到佢呢份柒。

事實上有時柒啲真係好架。正如我上面所講,適當嘅 self-deprecation 會令高高在上嘅人顯得更加親民。林公子雖然自身貌似一無是處,但呢個只係你同我嘅觀點。你認真諗下就會發現,佢其實假假地都中產家庭出身,名牌大學畢業,有車有樓,仲媾過港姐𠻹!一般人邊敢高攀?

林公子既然喺「真.名流」圈子碰到一鼻子灰[2],撈唔掂唯有往下層發展。高產冧唔掂冧中產,中產冧唔掂冧低產,低產冧唔掂就冧無產階級,學毛主席同草根平民一齊搞革命。佢越向下發展就越需要發揮佢 self-deprecation 嘅能力,越需要靠整柒自己令自己更「親民」。

正所謂行行出狀元,會考 10A 又係狀元,全城最柒都係狀元,網上班智者淨係識笑人,完全唔明白佢背後嘅動機,真係要睇下 who gets the last laugh 喇,哈哈哈哈⋯

 

——–

 

[1] 差啲想講「娛樂圈」,但佢又唔係;「社交名流」佢更加唔係;但佢啲新聞又會上到 C1 同八卦集誌架喎,有冇更貼切嘅名詞?

[2] 官話入文

 

作者:散彈一號

散彈一號
全職文字工作者、應用哲學家。對「邏輯一致性」、「系統複雜度」之類的偏門學問獨有心得。在美利堅合眾帝國邪惡資本主義集團的領導下,嘗試改變世界。

閱讀後覺得好,請多多讚好及分享~:)

其他熱門文章

歡迎讚好我們的facebook page,免費資訊源源送上。

文章資訊

ID: 208387
Date: 2020-07-20 13:48:51
Generated at: 2020-10-30 10:06:20
Permalink: https://www.vjmedia.com.hk/articles/2020/07/20/208387/林作-高產冧唔掂冧中產,中產冧唔掂冧低產,